Wala Untay Bulok Sa Politika

Pikpik sa Abaga

Ni Henry Sandoval

Wala untay bulok sa politika

               Daghan ang midayeg sa lihok sa mga NGO ug mga opisyal sa gobyerno ning atong syudad sa tabang nga gipaabot ngadto sa silingang dapit sa Negros Oriental.  Ang dali nga pagtabang sa atong syudad sa paghatag ug tubig ngadto sa nagkinahanglan sa mga lugar sa Negros Oriental nga nakabsan ug tubig. Way labot niana may mga hinabang pa nga mga gagmay nga pinutos para sa mga biktima  sa linog.

                Apan aduna usab mikomentaryo nga ug ingon sad unta ana ang paghatag sa mga indigent diri sa atua, kana ba kunong way pili kun unsang kang bulok sa politika. Kana ba kunong way tan-away sa computer ug tan-awon ug naa ba ka sa lista sa ilahang bando. Kay gani kuno dili man gani taga atua ang gitabangan apan full force kita nga mitabang kanila. Ingon sad ana unta ang pagtabang sa atong mga indigent dinhi sa syudad sa San Carlos way pili-on kun unsa ang kolor sa politika. Kay ug sa uban pang mahilig sa politika unsa pa may  tan-awon nga wala na may kontra. Hakpa na lang na ninyo, mga Sir!

**********

                Komentaryo sa kilid-kilid mahitungod atong nahitabong linog kaniadtong milabay nga Pebrero 6. Matud pa sa among mahinabi nga duna silay nakit-an nga opisyal sa syudad sa San Carlos nga naglibot-libot-ang Mayor sa syudad. May usa sad kuno didto sa highway nga nag akatar sa mga disaster group. Duna sad silay nasiplatan nga gasakay apan atua padulong sa Medina apil sad diay sa kahadlok sa tsunami.

                Ang kinatibuk-an nga komentaryo nga wala kaayo nakita sa katawhan ang kadaghanan sa opisyal sa gobyerno nga gibuto sa tawo nga sa pagtuo nga kining mga tawhana ang mogiya kanila sa panahon sa kalipay ug kasakit.  Pero moingon man sad ni sila nga, "Biktima sad baya mi."  Mao nang didto na ninyo kit-i ang uban sa Medina murag nag sightseeing ba.

**********

                Dili na gyud madugay may bag-o na unya kita nga City Hospital dinhi sa syudad sa San Carlos. Sa akong nahibaw-an ang initial budget niini didto gikuha sa funding ni Congressman Julio Ledesma. Layo-layo ug dyutay sa siyudad nga dili gyud malikayan nga ang mga pedicab driver nga anaa magsige ug atang dinha sa atong City Hospital karon gibati ug kabalaka kay dili na man gyud sila makabiyahe padulong unya sa bag-o nga hospital. Kinsa pa man pud ang musakay ug pedicab padulong didto nga layo-layo ug tungasan pa kini bisan pa man ug sementohon ang dalan niini. Mao kini ang mga sentemento sa mga driver sa pedicab nga sigurado gayud nga maglisod na sila ug pagkuha sa abang ug sa ilaha usab nga kunsomo sa ilahang balay.

                Tinuod nga makuhaan kay ug inyong makita ang hospital usa sa pinakadaghan ang pasahero nga musakay ug pedicab. Pero basin adunay alternatibo nga paagi ang atong Mayor sa pag-kahuman na unya sa bag-ong Hospital nga gitukod karon.

**********

                Sa nahitabo nga linog nga miagi niadtong Pebrero 6, makita nga ang labing gikinahanglan sa tawo mao ang pagka-on ug tambal sa mga nabiktima niini. Sa mga bukiran nga bahin sa Negros Oriental didto nalang gani nila gisulat ang mga pulong nga "FOODS AND MEDICINE."

                Ikaduha nga mahinungdanon kaayo sa panahon nga sama niatong miaging linog mao ang salakyan ug back hoe para nga makalkal ang mga yuta ug bato nga gaali sa dalan. Ang panghitabo sa Negros Oriental maoy usa ka ehemplo nga angay tan-awon sa magbabalaod ug unsa-on paggamit ang Calamity Fund nga allocated sa matag syudad.