Broker-broker

Bantay Banat

Ni Rics Cañisarez

                Lisod na gyud kaayo ang kahimtang karon, kay hasta ang uban diha sa City Assesor's Office intra na man ug broker-broker. Dihay usa ka buyer nga nagdala sa photocopy sa usa ka house and lot ug nangutana kon pila daw ang market value. Wala pa gani kuno matud pa mahuman ang istorya, duna say miingon nga taga opisina ra usab nga, "Ah, gamay ra man ang market value niana kon gusto ka naa say ako tan-awa unya."

                Nag broker-broker na sad mo diha?

                         **********

                Pastilan ning mga tulisan karon dinhi sa atong syudad, dili na bati-on ug kahadlok kay bisag adlawang daku mang hold-up. Niadtong nakalabay nga semana dihay usa ka tig-supply ug mga tambal diha sa City Health Office ang gi-holdup. Gikan tingali ni sya sa Victorias unya, pag-abot sa San Carlos, misakay ug motor paingon sa pantalan kay moadto sa Cebu mopalit ug mga tambal aron i-deliver diha sa City Health. Pag-abot sa terminal gidunganan pag-sakay sa duha ka lalaki nga armado ug gimandaran ang driver nga diretso sa Oriental. (Dili ba kaha connivance ang driver?)

                Samtang nagdagan ang motor, mideklarar ang usa nga hold-up kini ug miingon nga, "Ug dili ka gustong mamatay ihatag nang imong bag kanamo." Walay nahimo ang babaye nga nagpakiluoy nga dili lang intawon sya unsa-on ug ipakuha lang niya ang sulod sa iyang bag. Ang sulod sa bag mao ang tulo ka tseke sa BDO Victorias branch ug cash.  Pagkahuman gipakanaug ang babaye nga gibaya-an sa mga hinampak nga dagku. May miagi nga salakyan ug nagpakiluoy sya nga mosakay paingon diri sa San Carlos.

                Dili lang kini nga holdup ang nahitabo diri sa atong dakbayan. Pero may nadakpan ba? Dili ba nga duna na man tay CCTV camera? Ang ato diay mga pulis, hain na man?

                         **********

                Daghan na gyud kaayo ang nagreklamo aning polusyon gikan sa SCBI. Gawas sa water pollution, naa pa gyud ning ashfall (kining agiw gikan sa simboryo) nga kon mapuling ka sakit sa mata. Sa mga linabhan nga gihay-hay mangitom tungod sa agiw. Sa mga taga ethanol, ayaw na intawon mo ug pabungol-bungol uy!

                Tan-awa ra gud na ninyo nang dagat diha sa Preking sa Barangay I kaniadto mura ug tiaw-te pero, karon mura na gyud ug kolor gasolina ug baho pa gyud. Sa among pag-adto didto hasta kuno ang fish pond (punong) apektado pa sa polusyon. Akong gipangutana ang mga tawo kon ngano nga wala man lagiy mga isda nang mga kanal sa punong, matud nila wala na kay nangamatay na man tungod sa hugaw gikan sa SCBI.

                Hinaut pa unta nga dili maliso ang resulta sa water sample sa dagat nga gikuha sa taga DENR niadtong milabay nga semana kay kini ra bang DENR dili ra ba usahay masaligan. Tan-awa ra ba tubig nga bahong baklag nga mo-ilig sa kanal sa atbang sa ilang opisina wala gyud sila makapanimaho. Unsa-on man kay gitabunan man ug...panyo.

**********

                Wala kanay mabati-an nga palapaw sa mga semento kon materials sa mga proyekto sa syudad sa San Carlos. Ang solusyon diay mao nga kini nga mga proyekto ipa-sub contract lang sa mga pribadong contractor. Lahi ra kaniadtong miaging administrasyon nga kanunay lang may mabatian ka nga kinawatay sa mga materials. Labor and materials ang palapaw sa mga natungdan nga proyekto sa gobyerno. Karon kay gipa sub-contract na sa syudad ang mga proyekto, ang engineer supervision na lang ang trabaho.

                Kon nahuna-hunaan kini kaniadto wala untay dagkong kantidad sa salapi nga nawala ang gobyerno. Tapos na ang maliligayang araw niadtong mga si-aw nga engineer. Da, usab pa mo?