Hold-up!

Bantay Banat

Ni Rics Cañisarez

                Ang akong sinaligan nga tigpani-id, misumbong kanako nga niadto kunong nakalabay nga semana dunay usa ka konsehal nga nagdala ug tsik diha sa Center Mall gitulis, wala lang niya gisugid kon unsa nga armas ang gidala  sa nagtulis apan, nahibalo sya nga ang nakuha mao ang kwarta (hinuon gamay ra) ug ang cellphone (mahal ra ba to nga cellphone da).

                Ining hitabo-a ako nagtuo nga kung pangutan-on sa asawa kon hain ang cellphone ni Sir Konsehal, ang tubag tingali nga nawala kay natagak.  Maayo lang gani kay wala unsa-a sa tulisan ang tsik nga dala ni konsehal.

                Kung mangutana mo kung si kinsa ni nga konsehal, adto lang mo pangutana sa mga nanagan sa dihang nahitabo ang tulis. Ang akong nakulba-an ug may nahitabo sa tsik nga kuyog ni Sir Konsehal mabani-og gyud sa tibuok dakbayan.

                        **********

                Angayan gyud nga tutokan sa chairman sa Committee on Public Works and Engineering kung kinsa ang nag-tap sa kuryente nga gigamit sa barangay hall. Ayaw ko ug ingna nga walay nagsugo niini. Imagine, tungod sa illegal wire tapping ang Guadalupe walay gibayran nga kunsomo sa kuryente sulod sa unom ka tuig.

                Wala na koy pagduda nga kini nagpakita nga may malisya gyud kay ang kuryente nga nagamit gikan sa barangay hall padulong sa street light pwerteng taasa gyud. Tuyo gyud nga kawaton ang kuryente. Ang VRESCO nagbutang na ug check meter aron mahibalo-an kung pila gyud ang dapat nga bayaran sa barangay hall gikan sa pag construct niini ug nianang pader kay naggamit man ug electric welding.

                Hinuon matud sa manager sa VRESCO open ra sila para negosasyon. Ug kung mobayad sila sa kuryente nga ilang nakunsomo, takdan ug metro aron mahibalik ang sugang dagitab sa ilang barangay hall. Apan, kung magmagahi, mapugos sila nga mopasaka ug kaso for illegal wire tapping.

                Bayri lang na ninyo uy kay simbako nga duna nay kaso, magpaabot na lang mo sa 12 katuig nga pagka bilanggo ug P20,000 nga multa. Ug hinumdumi gyud ang reclusion perpetua, dili na kamong katrabaho sa gobyerno ana! Para sayon basaha lang ninyo ang Anti-Electricity Pilferage Law o RA 7832.

                         **********

                Abi nako ug nahilom na ang dynamite fishing  diha sa Sipaway. O dili ba kaha nahilom kay sa ilawom na man sa dagat moboto ang dinamita? Mao ni tingali nga dili maka-alinggat ang atong mga Bantay Dagat kay hilom na man nga moboto sa ilawon sa dagat. Mura man hinuon ug walay katapusan ning problema sa taga Sipaway kay karon naa na say lain kining cyanide fishing. Kon kini ang kanunay mahitabo diha sa Sipaway mahurot gyud nang mga isda. Unsa man usab ang gibuhat sa mga barangay officials diha sa isla sa Sipaway? Nangatulog?