NewsRecord Weekly Publication

Bantay Banat 

Ni Ni Rics Cañisarez

Guadalupe may isyu na sad

Ubay- ubay gayud sa mga barangay tanod ang nagreklamo  diha sa Barangay Guadalupe bahin sa ilang honorarium nga dili kuno nila madawat inig tapos sa bulan. Duna kunoy nakadawat pero, gi-anam-anam lang kuno ug hatag.

Uy! Unsa gud diay ni? Ingon nila daghan kunog kwarta ang barangay. Ug natingala kuno sila nga ngano man nga ang ilang mga ngalan naa man sa payroll sa foot road. Dili ba nga dugay na man nahuman ang foot road? Unsa na pud ni nga gimik? Pagka daghang milagro ning Barangay Guadalupe karon uy!

  **********

Dili baya sad ko gahi ug kasing-kasing nga pagka tawo nga dili mobatyag ug kalipay bahin ining gibuhat sa SCBI sa paghatag ug mga hinabang ngadto sa mga lumolopyo sa mga lugar dinhi sa San Carlos. Hinabang sama sa pagkaon, cash assistance, used clothing ug uban pa. Nalipay baya ko niini. Kinsa may dili malipay nga bisan tinuod ug daku ang alkanse sa SCBI (daku kay minilyon gud) pero, tabang pa gihapon sa mga tawo?

Pero, katingalahan kay kon wala magsige ug banat ang NewsRecord sa ilang polusyon nga bahong baklag, wala gayud maglihok ang SCBI.

Hain man ang mas maayo kon ang inyong tabang sa mga tawo ubanan usab ug mga tambal para dili madaut sa polusyon? Remember that health is wealth, dili ba? Maayo man na kay motabang na kamo sa mga tawo pero, unaha baya ninyo ang inyong kaugalingon kay hangtud karon ang bahong baklag nisamot hinuon.                                   Mentras tanto nga dili mawala nang bahong baklag dili sad mahunong ning akong banat. Tan-awa ra gud na ninyo nang katubhan diha sa inyong atubangan sa national highway mura nag nibatyag sa bahong baklag kay mura man gud nangalaya. Hasta gani ang tubo nakabatyag gani sa kabaho gikan sa SCBI, tawo pa kaha. Nakatabang na man mo sa mga tawo (unsa man ni ulo-ulo?) Tabangi na usab ang inyong kaugalingon!

                                      **********

Karon kay sila (ethanol plant) na usab ang gisentro sa mga tawo tungod sa bahong baklag nga halos mikuyanap na sa tibuok dakbayan, nagpahigayon na usab sila ug pulong-pulong aron ilaron ang mga tawo nga matud pa, ang bahong baklag nga gikan sa ilang planta minimal na kuno matud pa. Minimal na kay hasta ang agiw gikan sa panghaw kon mapuling ka, pwerting halanga. Mao ning ilang giingon nga minimal na kuno.

Ngano man sad ning ethanol nga gikan sa pagsugod nila ug galing hangtud na lang karon wala pa gayud kasulbad nianang baho nga polusyon? Unsa man nang inyong gipang-hire nga pollution engineers wala bay nahibalo-an?

Na hala sige! Agwantahon ta na lang kining bahong baklag gikan sa ethanol total daku bitaw ang ilang natampo sa ekonomiya. Ulo-ulohi pa gayud ninyo ang mga tawo pinaagi kunohay sa tabang kay kana ra bang tabang dili ra ba gayud nakalapas sa kadaut nga inyong namugna sa atong kalikopan ug kaakohan.

**********

Niadtong nakalabay nga semana diha atbang sa Chef Nitoy's sa may Center Mall na dapit usa ka ginang sakay sa usa ka pedicab nga mangumpra unta para sa iyang tindahan ang kalit lang gilabnihan sa iyang bag sa duha ka mga tawo sakay sa motorsiklo nga nagtabon sa nawong.                        Ang sulod sa bag sigon sa maong ginang, P 14,000 nga inogpalit ug mga groceries. Wala gayuy nahimo ang maong ginang gawas lamang nga ipa-blotter sa police ang maong hitabo mga alas nuebe sa buntag.

Kon atong hunahuna-on nganong nasayud man kini nga mga manlabnihay nga may dala nga kwarta ning maong ginang? Kay adlawang daku man kini nahitabo, asa man diay ang atong kapulisan? Ang atong mga sakop sa intelligence sa San Carlos PNP?                               Kon wala kamoy mga foot patrol naa man tay mga sakyanan ug tingali walay problema sa gasolina kay duna may P 1.2 M ang gigahin ang syudad para hinabang sa atong kapulisan.

Mao lagi ni kay sige rag sakay sa patrol pero way nadakpan!