NewsRecord Weekly Publication

Pikpik Sa Abaga
Ni Henry Sandoval

Low-cost housing

Gikan sa Sta. Barbara sila si  Marton Cui, Escalante Mayor Beboy Yap ug si kanhi Bise -Gobernador Robert Armada sa Iloilo nga mihapit ug bisita silang tulo sa opisina sa Bise-Presidente sa Pilipinas. Matud pa ni Cui nga sa opisina ni Bise Presidente Jejomar Binay nakita sila ni kanhi Kongresista Apolinario Lozada, Jr. sa ikalimang distrito sa Negros Occidental. Nagkaistorya sila ug gipahimamat sila ni Binay. Sa usa ka bisita naapil sa istorya ang usa sa mga prioridad ni Bise Presidente ang Low-Cost Housing. Gikan niadtong istoryaha nahimong usa ka realidad. Niadtong milabay nga Abril 19, 2012 mipahigayun ug usa ka assembly ang tanan nga cooperatiba sa siyudad sa San Carlos ug ang gihisgutan mao ang Housing Project ni Bise Presidente pinaagi ni Congressman Jules Ledesma.

Matud pa ni Cui ang unang distrito gigahinan ug 3,000 ka balay ug ang San Carlos adunay bahin nga 2,000 ka balay, ang Calatrava 500, ang Toboso 250 ka balay ug ang syudad sa Escalante gigahinan usab ug 750 ka balay. Sa San Carlos matud pa ni Cui adunay 30 hectares para sa maong proyekto ug kini nahimutang sa may Hacienda Vascuña, sa duol sa gitukoran sa bag-ong San Carlos City Hospital ug dinha dapit sa may Hacienda Galicia. Ang gidak-on sa yuta sa usa ka balay matud pa niya 80 metro kuadrado ug adunay floor plan nga 25 metro kuadrado. Ang balay ug yuta hulug-hulugan sa pagbayad sa applikante sa kantidad nga P3,000 ngadto sa P 5,000 matag bulan sulod sa 30 ka tuig.

Adunay mga myembro sa kooperatiba nga gimahalan sa maong hulugan sa balay apan kung imong hunahuna-on balay ug yuta na ang imong gibayran. Labot pa wala na kini (equity) nga ipabayad sa mga empleyado nga mo-avail ining programaha. Ug ang mga bag-ong na-regular, nga mga trabahante dako na kaayo kini nga tsansa nga makaangkon ka ug balay ug yuta human sa imo unyang pagpanrabaho sa gobyerno. Apan sa mga regular employee nga nahigot na sa utang o di ba adunay college nga duha ka buok maglisod ug nagbinulan ka lang ug P 14,000. Matud pa ni Cui kulang kini nga 2,000  ka balay kay ang Gamboa nga mga myembro sa Pag-ibig 800 ka buok nga interesado usab mokuha sa maong programa.

**********

Nakuratan kog kadali kay samtang gamaneho ko sa akong motor pauli na unta kalit lang ko naka dungog ug usa ka buto diha dapit sa may San Carlos Doctor's Hospital. Si PO2 Demetria akong nalantawan nga gabitbit sa iyahang Service Firearm gagukod ug usa ka tawo pasulod sa gamay nga dalan diha sa may panimalay kilid sa gasolinahan. Kusog man ang dagan ni PO2 Demetria pero mas kusog gayud ang tawo nga iyahang gigukod.  Nangutana ko ug nganong gigukod ang tawo sa pulis.

Na espatan diay sa tag-iya sa motor ang nawala niyang motor duha na ka semana ang milabay.  Aksyon agad ang kapulisan apan wala gayud madakpi ang suspetsadong si Joseph Barientos, ulitawo ug walay permanente nga puy-anan. Nagtrabaho ang suspek sa bulkitan sa iyaha ra usab nga kadugo diha sa kilid sa gasolinahan pila na ka bulan ang milabay. Natingala gani iyahang paryente nganong naka motor nga galisod man gani kuno tong tawhana. Mga duha na diay ka semana katong motor nga gisakay-sakayan sa suspetsado.

Dili gayud angay nga mokumpyansa karong panahuna. Ang usa ka lugar nga magkadako ang populasyon magka daghan usab ang problema sa sosyedad. Ang depensa mao ra gayud ang dili pagkumpyansa. I-park ang motor sa lugar nga imo ra usab nga makita sa imong adtu-an. Dili kalimtan pag lock para lisod makawat.

**********

Usa ka residente sa Barangay Quezon ang mibisita ug tuyo dinhi sa opisina sa NewsRecord ug misumbong kini mahitungod sa usa ka seminar nga gihimo diha sa eskuylahan sa Barangay Quezon. Daghan kuno ang nanambong sa maong seminar apan natingala sila ug daku kay ang uban duna may taklos sa ilahang kilid nga pusil nga kaila man sila nga katong mga tawhana nukanok nga sibilyan. Pagkahuman pa gayud kuno nag praktis ug tiro-tiro didto ra usab sa site nga ilahang gi seminaran.

Akong gihinabi si Col. Harold Tuzon, hepe sa San Carlos City Police Office ug ako siyang gipangutana mahitungod ato nga seminar. Matud pa ni Col. Tuzon malipay kaayo siya kung adunay grupo nga mutabang ug hatag impormasyun sa kapulisan apan wala siya gatugot ni bisan kinsa nga modala-dala ug armas labi pa gayud ug ang armas walay mga papeles.

Ako siyang gipangutana ug gahatag ba siya ug mga mission order aning pinili nga mga myembro sa maong grupo. Mitubag si Col. Tuzon nga walay bisan usa nga gihatagan ug espesyal nga pribilihiyo dinhi sa siyudad sa San Carlos. Kay sa akong pagka hibalo ang Chief PNP lang ang maka isyu ug ingon ana nga mga papel ngadto sa usa ka tawo. Pero matud pa kuno sa mga nag seminar nga nagdala ug armas sa dihang gipangutana ug may sweldo ba sila sa ilang trabaho. Miingon ra man sad kuno nga bahalag way sweldo basta kadala lang sila ug armas. Na masugat-an gani mo ug otoridad nga nagdala mo ug armas ako lang mong pahibaw-on nga ang kisame sa detention cell puthaw ug karong panahon sa ting-init malitson gyud ka.