NewsRecord Weekly Publication

Bantay Banat

Ni Rics Cañisarez

Bag-ong dagan sa politika na kaha?

Ako nagtuo nga duna gayuy mahitabo nga kausaban sa lakat sa pamolitika  dinhi sa dakbayan San Carlos sa umaabot nga eleksyon. Kausaban gumikan kay sigon sa balita nga akong nadawat, ang mga kandidato sa pagka board member sa administrasyon nga si Nene Dela Cruz lang ang mokandidato pagbalik kay si Board Member Rene Gustilo hulipan kuno ni kanhi mayor sa lungsod sa Calatrava, Boy Baguio. Tungod kuno kini kay dili mosugot si Gobernador Freddie Maranon. Unsa kaha ang nalagutan sa gobernador sa kang Board Member Rene Gustilo? Kon mao kini ang mahitabo, asa man siya padulong? Mokandidato na lang ba siya sa pagka konsehal dinhi sa San Carlos?

**********

Kon mokandidato man si Rene Gustilo para konsehal sa San Carlos okay man lang unta pero, murag puno na man tingali ang linyada kay usa ang mohuman na sa iyang term karong 2013, si SP Member Greg Santillan. Samtang kining anak ni Dr. Filped Maisog nga si PJ kutob lang siya sa 2013 kay silbing hulip lang sa nabakante nga posisyon sa iyang amahan nga tua na sa America. Kining duha ka posisyon sa akong nahibaloan may nag-akupar na.

Asa man managil-ot ang nahisgutang board member? Wala na man koy nahunahuna-an nga pwesto. Pero kon may P 70 M siya nga gastuhon para sa eleksyon sa 2013, pwede tingali. Sulayi kuno, Sir Rene, dagan ka na lang ug kongresman!

**********

Si kanhi Mayor Boy Baguio ang mahimong kauban ni Board Member Nene Dela Cruz. Mao kini ang kusog nga balita karon. Unya ang problema kon nahibalo na ba ang iyang mga sumosunod sa Calatrava? Kay tingali baya unya ug makalitan ni sila ug maka-ingon nga gisiguro man lang niya ang iyang kaugalingon. Sayud man ta nga ang eleksyon baya, weder-weder lang. Kon lain na usab ang mayor syempre ang mga tawo na usab niya ang patrabahuon. Busa, kon tinuod man gayud nga mag board member si kanhi mayor Boy Baguio, asa na man lang intawon niya ipahimutang ang iyang mga followers?

**********

Mga mulo sa mga pumapalit diha sa merkado tali sa mga timbangan nga dili husto nakadangat ngadto sa kang SP Member Criston Carmona. Matud niya nga kon nagduda sila (ang mga pumapalit) sa ilang napalit nga isda, karne ug uban pa, pwede nilang timbangon diha sa pampublikong timbangan diha sa merkado ang ilang mga pinalit.

Sayud man kita nga bisan pa man ug aduna tay periodic check-up sa mga timbangan sa merkado, duna pa gihapon mamintaha nga mogamit ug timbangan nga dili insakto. Tungod niini, sigon sa kang SPM Carmona, ibalik na lang nila ang Bantay Timbangan diha sa public market.

Matud pa usab niya nga kinsa kadtong madakpan nga naggamit sa peke kon dili husto nga timbangan, ang first offense gub-on ang timbangan ug sa ikaduha, dili na pwede nga makabaligya pa diha sa sulod merkado. Gani sa mga manindahay diha sa merkado pag matngon kay tingali baya unya dili na kamo makapamaligya  ug balik diha.

**********

Dunay pipila ka kritiko sa administrasyon karon ni Mayor Ginggo Valmayor ang nag-ingon nga sukad sa pagpungko niya agig mayor sa siyudad, halos tanan kuno niya nga paryente naa na sa City Hall kon wala diha sa City Hall naa sa Barangay Hall. 

Ako siyang gipangutana bahin niini ug wala gayud siyay gihinago, ug matud niya, tinuod kana gani, may gimandu-an na siya diha sa City Hall nga hunongon na ang mga aplikasyon para trabaho sa mga paryente. Walay lipod-lipod siyang motubag sa mga pangutana nga makaapekto sa iyang administrasyon, siya midugang pag-ingon.

Sa akong bahin maarang-arang na lang kini kon itandi sa kurakot nga administrasyon. Bisan tinuod nga daghan na siyang mga paryente nga nagtrabaho diha sa City Hall pero, wala man mag ligoy-ligoy ug nagtrabaho man sa husto. Weder-weder lang.                

Bisan pa man niini, angay baya ikapasigarbo sa mga taga San Carlos nga ang tanang kwarta nga mosulod para sa siyudad ug kwarta nga magasto para sa mga proyekto "are all accounted for," subay sa ilang Financial Performance sa Source of Income, Expenditure Program, Statement of Receipts and Expenditures. Kini ang angay nga masayran sa mga taga San Carlos.