NewsRecord Weekly Publication

Bantay Banat

Ni Rics Cañisarez

Kagaw sa politika

Pagka lisud gayud diay kon molamay na ang kagaw sa poltika kay kon moabot na gani ang panahon sa eleksyon, hasulon ka sa imong tanlag kon mo-apil ba o dili. Dinhi lang sa San Carlos, dunay uban nga bisan lisud su-ayon ang kadaugan tungod sa controlled votes sa administration party, musolay gayud pamasin nga basi baya unya nga magmata na ang mga botantes.

Gani karon daghan na ang mga ngalan sa mga aspirantes sa pagka-konsehal ang mitumaw. Dili pareho kaniadto nga may kaatbang na ang administrasyon. Mahibaw-an unya nato karong umaabot nga Oktubre 1-5 kon duna ba gayuy mo-file sa pagka-mayor ug bise-mayor lakip na ang mga konsehales.

**********

Bitaw, dinhi sa San Carlos mag puli-puli lang kining atong mga konsehal, kon mahuman na gani ang termino sa usa kadtong nipahulay mobalik na usab.

Wala ba kini sila mapul-i? Kon ikaw ba ang ma-konsehal lalim ba?

Kay halos tanan nimong paryente, ang uban mga anak pa gani naa nagtrabaho sa City Hall pero, usa ray akong nahibalo-an nga konsehal nga wala gayuy paryente nga nagtrabaho diha sa City Hall. Maayo unta kon sundon kini sa uban.

**********

Sa kadaghan diha nga nanggungis nga matawag nato nga mga public servants (mao man kini nga ilang gamiton sa panahon sa kampanya nga sila kuno mga suloguon sa katawhan). Pero, sa panahon nga makalingkod na, kitang katawhan man diay ang suloguon.

Nangaraan na lang sa konseho pero, walay usa nga nakahuna-huna nga mopalabang ug balaodnon nga tukoron ang poloy-an sa mga tigulang (home for the aged) para unta nga may mapasilongan kon mapuy-an kining mga makaluluoy nga mga tigulang nga magsuroy-suroy nga magpakilimos aron intawon nga mabuhi. Wala gayuy nakahuna-huna niini.

Galing kining mga tigulang hanap na man ang panan-aw ug dili na makatunong sa pagsulat kon kinsa ang ilang botohon, labi na gayud kay built-bulit na ra ba ning pagboto karon. Mao nga wala nila mahunahuna-i kining home for the aged.

**********

Hastilan ning politika, mahibulong ka lang nga mausab ang batasan. Duna dihay dili na gani mopakita sa tawo kon makapungko na. Ang ilang balay lisud ka nang makasulod kay duna nay gwardiya. Usahay mobalibad nga sakit ang ulo ug dili padistorbo kay importante ang gisulat pero, sa panahon sa kampanya maayo na kaayo motimbaya sa mga botantes bisag hugaw ang kamot pugson nga kamustahon. Ang batang gikugos nga nagtabisay ang sip-on pahiran kunohay. Pagka hilas tan-awon!

Unya duna say mayor karon nga napanid-an nga kanunay lang abuton sa sapot unya ang mga tawo sa opisina nga napasulod sa trabaho sa iyang kontra sa politika gitangtang. Murag dili kini maayo nga senyales da.

You must remember, Mayor, that politics is an addition not subtraction.

**********

Daghan na karon ang mangingilad nga napadpad dinhi sa San Carlos ug lain-laing istilo ang ilang gigamit sa pagpang-guwatsi sa mga tawo.

Dihay mangingilad nga ang nailad mga inila ug dagkong tungha-an ug mga computer ug mga laptop ang gisakiyo. Ambot kon unsa nga istilo ang gigamit kay mga dagkong tungha-an nalutsan pa.

Unsa man ang kaso nga ipasaka niini nga mga tungha-an kay kalit man lang nawala ang suspetsado? Wala lang ba? Kulisaw nga daku!

Nia say laing mangingilad nga nagpaila nga tag-deliver kunohay ug mga mga construction materials. Taga Cebu kuno siya ug nagsunod na ang barko nga gikargahan sa mga materials. Grabe gayud tingali ang lana nga gipanghaplas aning tawhana kay nakakita man dayon ug transaksiyon nga mailad. Ngano usab nga natultolan man niya dayon ang balay ni Coling Logarta ug na-istoriya si Jun Logarta nga anak ni Coling kon nagkinahanglan ba sila ug mga construction materials.

Tungod tingali kinahanglan nila ang mga materials para sa ilang balay nga gitukod, nagkasabot. Pagka Septyembre 17 miabot ang truck sa Uyking Po nga nagkarga sa mga materials.

Ug nganong misugot ang Uyking Po nga dili man si Coling Logarta ang niadto sa ilang tindahan?

Kay sigon kuno niini nga swindler, dili kuno makaadto kay tigulang na. Ug ngano man usab nga mituo man ang taga Uyking Po nga tigulang na si Coling nga bisag pakatkaton pa ni siya ug mangga dili ba kaha lubi makasarang pa ni siya. Mao nga na-deliver gayud ang mga materials sa COD nga paagi. Pag-abot sa truck, gibayran ang materials sa kantidad nga bale

P 28,000.