Sa kadugayan

Pikpik sa Abaga

Ni Henry Sandoval

Better late than never.

Mao kana ang akong nadunggan sa mga batan-on nga nanagtapok didto sa may hagdanan sa San Carlos City Hall. Naabot gayud ang dugay na nila  nga gipaabot, ang bayad sa ilahang pagtrabaho sa maong programa sa gobyerno national pinaagi sa Department of Social Welfare and Development.

Sa akong pagpangutana sa mga namirma sa tseke, mga 91 ra gayud ang ngalan nga anaa sa payroll nga may kantidad unta nga tag

P 14,000. Ang matag usa sa 91 ka tawo anaa sa payroll.  Apan kay ang nag-ubra miabot man ug 322 ka buok ang kinatibuk-an nga kwarta gibahin kini sa tanan nga nakatrabaho.

Midawat ang matag-usa sa 322 ug bali P 4,043. Ang ilahang gihandum nga makadawat sila ug tag P14,000 wala na matuman.

Bisan pa man dili mao na ang kantidad nga ilahang nadawat naa gihapoy kalipay sa mga nawong sa mga batan-on nga nakatrabaho ug nakasweldo. Apan duna say mga nagguol labi na gayud tong naka-utang ug daku-dako kay dili man gayud to sila mabayran ug dali-dali. Naa say uban nga miingon nga sa dihang nakit-an nila ang amount sa tseke nga ilahang gipirmahan kanami gayud kuno idagan. Apan tungod lagi kay dili man lang sad sila ang nabiktima sa sistema misugot na lang sila nga bahinon sa tanan.

Naka-higayun ko ug hinabi kang Cynthia Mirande nga maoy department head sa City Social Welfare and Development Office. Nangutana ko niya ug kaning nadawat sa mga nagtrabaho sa Expanded Government Internship Program nga tag P 4,000 kapin aduna pa bay sunod silang madawat. Matud pa ni Madam nga wala na kuno kay mao ra gayud katong kwartaha nga allotted alang sa maong programa.

Ug miingon siya nga wala na lang gani kuno sa bangko i-deposit kay gusto sila nga makadawat ang mga bata dayon ug kung sa bangko i-clearing pa kuno ug madugayan pa.

Tag 14,000 gayud unta  ang madawat kung na insakto pag-relay sa instruction sa national nganhi padulong sa CSWDO. Ug galing lang di malikayan nga ang atong mga politiko mangayo gayud ug ilaha sang mapasulod para makatrabaho sa maong programa.

Pero aduna akoy namatikdan nga murag laban naman ang mga estudyante sa nakatrabaho, nga sa akong pagsabot ang programa para sa mga wala maka pa-enroll sa college ug  kani unta nga programa makatabang kaayo kanila. Mao lagi ni dayun basta trabaho ang istoryahan. Imbis para gayud sa mga wala maapil ang naa na daan.

Sama sa 4Ps sa unang pag-implementar niini, miguwa ang mga reklamo nga hasta anak sa maestro naapil sa maong programa sa 4Ps. Kay nalubog man to nawala.

Maayo unta nga sa sunod ug duna pa may lain nga EGIP kana na gayud tinuod nga mga kwalipikado sa guidelines sa maong programa. Kay pareho sa hinatagay nga adunay amahan nga mianha kay ang iyahang anak wala diri kay tua sa Bacolod ga-eskuyla. Nawala na ang tinuod nga intensiyon sa maong programa para pagtabang sa mga kabos ug na alang-alang nga mga ginikanan nga maka pa-eskuyla unta sa ilahang mga anak sa kolehiyo.