NewsRecord Weekly Publication

Bantay Banat

Ni Rics Cañisarez

Politica ala familia

Gisugdan na sa Commission On Elections (COMELEC) ang paghas-has sa mga party-list. Dapat lang nga wad-on na kining uban nga party-list nga dili mapuslan ug nahimo lang nga buloyagon sa mata sa katawhan, nag usik-usik lang sa salapi sa gobierno. Kataw-anan gumikan kay ang uban nagrepresentar kuno sa tingog sa mga mangngingisda unya diay kini siya/sila pulos mga milyonaryo.

Naa say uban nga nagdala kuno sa tingog sa mga security guards, unya tinuod ba gayud nga suhito sila sa kinabuhi sa mga security guards kay kon subayon sa sinugdanan wala man maka-agi ug security guard kay lagi milyonaryo man. Hinuon dili man tanan kay duna may uban diha nga tinuod gayud nga nag-alagad sa party-list nga ilang gi-representahan apan, kanang uban nag usik-usik lang sa salapi sa gobierno angayan na gayud nga wad-on kay dili mapuslan sa katawhan.

**********

Mag eleksiyon na usab pero, dili gayud mapunggan o malikayan kining political dynasty. Nganong dili man mawala ang political dynasty? Uso na kini karon nga ang amahan usa ka senador, ang asawa kongresista, ang anak mayor, ang laing anak konsehal. Naa pay lain, ang bana kongresista, ang asawa mayor ang mga anak naghupot ug katungdanan sa gobierno. Nganong dili man kini mawala? Basaha ninyo pag-ayo.

Ang COMELEC namahayag nga sila walay igong gahum nga sumpuon kining political dynasty gumikan kay ang kongreso kinahanglan mopasar pa ug enabling law para sa constitutional prohibition.

Pero, ang COMELEC Chairman Sixto Brillantes mipadayag nga kadtong magsige ug banat kanila, mahimong mogamit sa "people's initiative" o kaha massive signature campaign aron mababagan ang ilang pagdominar sa natad sa politika. Sigon pa usab ni Brillantes nga imposible para kanila ang pagbabag niadtong mga suod nga mga paryente sa mga incumbent officials nga magpapili karong palaabuton nga 2013 elections.

"There is no enabling law that prohibits political dynasties even if it is not allowed under the Constitution."

Imagine, bisag wala gitugot sa batakang balaod pero, nagkadaghan na man hinuon kining political dynasty. Napugos gayud si Brillantes nga motubag niini tungod kay ubay-ubay na gayud ang petition didto sa Korte Suprema nga naghangyo sa mga justices nga orderan ang COMELEC nga i-impose ang constitutional ban sa political dynasties karong umaabot nga eleksiyon.Walay mahimo ang COMELEC pero, niay maayong solution aron mawala kining political dynasty walay lain kon dili ang people's initiative.

Sa Article 17 Section 2 sa atong Constitution nag-ingon:

"Amendments to the Constitution may likewise be directly proposed by the people through initiative upon a petition of at least 12 percent of the total registered voters."

Nia ra man diay ning peoples initiative, ato kunong sulayan.