NewsRecord Weekly Publication

Pikpik sa Abaga

Ni Henry Sandoval

Paypay ang babay

Ang politika karon sa San Carlos ang nahimong topiko sa bisan asa na lang nga suok. Bisan mga driver sa pedicab maghisgot na ug politika.

Nahimong interesado ang publiko tungod nga ang kasamtangan nga namungko karon nga mga opisyal sa gobiyerno aduna nay kontra. Mga bag-ong nawong ang kalabanan sa midagan ubos sa linya ni Gobernador Alfredo Marañon, Jr. 

Aduna puy midagang batan-on nga ang apohan ug iya mismong ginikanan nag serbisyo na sa tawo sa San Carlos pinaagi sa pribadong mga negosyo dinhi sa siyudad. Kalabanan ani mga magtutudlo ang naserbisyohan.

Si Jovan Laguda  usa ka batan-on nga apo sa mga Laguda nga dagko ug negosyo dinhi sa siyudad. Graduwado kini sa kurso nga Bachelor of Science in Agriculture sa West Negros College. Kasamtangan nga manager sa ilahang kaugalingong negosyo nga anaa mahimutang sa dalan Gustilo.

Akong nahinabi si Juvan sa wala pa siya maka-file ug COC matud pa niya pipila na ka mga katuigan nga ang ilahang mga katigulangan gaserbisyo nang daan sa mga katawhan sa San Carlos. Karon matud pa niya ug tagaan ug tsantsa sa panahon ang bag-o ug batan-on nga Laguda makaserbisyo na usab sa serbisyong pampubliko.

**********

Matud pa sa mga driver sa pedicab nga akong nahinabi may mga kamot na nga murag paypay kon mubabay kanila. May pakapin pa nga smile ug matud pa nila sinugdanan na ni nga ang ilaha kunong palad nga nagkahugaw kaptan na usab sa mga kandidato nga magpapili karong umaabot nga eleksyon.

Sumpay pa niya nga mao na sad ning panahuna nga daghang libre. Dili na man na ikatingala kay gani duna naman koy nakit-ang politiko nga mipainit na sa ka Titing's Cafe.                   Dili pa ni mao ang mga senyales nga makita. Daghan pang moabot labi na nga duol na ang Disyembre ug Pasko nga murag daghan sad ang manago ani kay dili man malikayan nga naa man gayuy magdala ug resita nga niadto pang 2009 giresita sa doktor.

**********

Asa naman karon ang 24 K Firm nga murag nahanaw daw aso na man gayud tawon?

Murag namingaw na ang mga saad nga makapaginhawa unta, nadugang na hinuon ka pigado kay nakagasto man gayud ug daku-dako ang mga nagpamyembro niini.

Ako kining nabalik pagsulat kay ug mahinumduman niadtong miaging eleksyon miapil ang 24 K Firm sa politika. Karon mura man ug mingaw ang grupo sa 24 K Firm. Murag wala man gani ko kakita na sa mga karatola nila. Siguro goodbye na sa milyones nga saad sa mga ga-organize niining grupoha.

**********

Daghan kaayo ang natingala nga naa may daghan kaayong mga tindahang gitukod diha sa atubangan sa Gaisano Mall. Matud pa sa uban nga nangutana nga ug dinha ba ang kalingawan sa pista ibutang.

Sa among pagpangutana among nahibaw-an nga ang maong lugar naabangan nila ni Liwelyn Agravante ug ilahang gipabutangan pud sa mga langyaw nga negosyante nga mupahimulos sa usa ka higayun sama sa mga pista sa siyudad. Matingala lang ka kay duna man say site sa Trade Fair didto sa luyo sa City Hall.

Ug gani gibisitahan sila dinha sa site sa may Gaisano sa Business Processing and Licensing Office ug nangutana ug aduna na bay Mayor's Permit sila nga nakuha sa Mayor's Office. Murag wala sila magkasabot sa organizer sa maong Trade Fair ug gani sa sulat nga amo ang nabasa gikan sa organizer, iya pa gani nga gipangutana ang taga BPLO ug kanus-a  gasugod nga milukat ug Mayor's Permit ang organizer niadtong milabay nga mga pista dinhi sa siyudad sa San Carlos.

Ang problema among nahibaw-an nga na-refer na sa opisina ni Mayor Ginggo Valmayor. Ug matud pa, gitagaan sila ug lugway haron makakuha ug Mayor’s Permit aron dili sila mapapahawa sa ilang pwesto.

Aw, maayo man sad ni kay may kapilian gayud ang mga tawo. Depende na ninyog asa mo mangukay!