Balak Korner
Ni Roger Mar Lasco
Panganti
Mitukas tabil-
Langit sa kasakit
Mi buhagay'ng kalipay;
Gibanlas sa pagmahay,
Lawon hinuktok
Gitarok damgong gabok
Ibabaw batong bantilis,
Pero tanan nahilis-
Damgo lang ang tanan
Gipugas ibabaw's parnaso
Sa Utopyang metriko
Lohikong de kalkulo!
o0o
Molupad ko's panimpalad-
Tadlas sa kapunawpunawan
Pangitaon ang giingong bathala,
Tadhang Agila aron makigtagay
Sa alak ni Bachos ang demonyo
Sa mga palahubog pamasin
Ang kapait sa iyang katam-is
Maoy mopasulbong kanako
Sa kalibotan sa pantasya
Dili na unya ako tawgon
Ug tamsing pisot
Kon dili higanting banog
Kusog modagit sa kuyabog,
Mitago ilawom sa pako
Sa himunga-an.
o0o
Apan anus-a pa mahitsas ang dagang-
Unya nabag mangaputi ang mga uwak
Sa akongalimpulo?
Usa lang kini ka panganti
Dili matuman kay pulos lang lamlam
Way pagsulay aron masukod
Ang kalig-on sa sungkod ni Moises
Nga makalabang sa dakong lawod sa
Tintirohan.
Ang sukdanan sa mga magdadagang
Ang hurado sa imo kunohay'ng
Gipagarpar nga obra maestro
Makalabang kaha sa lawod sa panganti?
No comments:
Post a Comment