NewsRecord Weekly Publication

BantayBanat
Ni Rics Cañisarez

Air-con para kay keriding

    Nia nay uban nga kandidato nga mag sige na ug adto ug mga panimalay unya kunohay mangamusta pero, ang tinuod mangampanya. Ang akong natingad-an kay nganong bansay na man kini sila manultol ug mga balay karon? Unya kon mahimutang na gani sa puesto moadto pa ba kaha ni sila ug magamusta? Ingna kong bakakon kon makatultol pa ba ni sila. Kita usab nga mga botante dili na gayud kita palingla sa mga gimmick aning pila ka politiko nga maayo na gayung manultol ug mga panimalay karon. Kining uban nila dili gayud taga San Carlos.
************
    Unsa may assurance ining peace covenant nga pirmahan ining mga politko sa mag timbang nga bahin? Nakaseguro ba ang katawhan nga sa umaabot nga pinili-ay walay mahitabo nga kagubot sa ubang bahin dinhi sa atong syudad ug sa tibuok distrito? Kay simbako nga may mahitabo nga kasikas nga dili mao, kamo ra baya gayud ang basulon sa mga botantes. Manghinaut usab ako nga sa umaabot nga pinili-ay mag pabilin ang kalinong ug katawhay alang sa katawhan nga gustong mopili sa ilang nagustuhan nga mga kandidato.
************
     Sa natad sa pinili-ay kini ra bang mga kandidato walay huna-huna nga mapirdi ang naa sa ilang huna-huna ang kadaugan. Ang kandidato nga adunahan mangita gayud ug paagi kon unsaon pagdaug ug may posibilidad nga mogamit ug dili hustong paagi aron modaug, sa unsang paagi? Mogamit sa kuarta, panghulga ug armas. Kon mao kini, mahimong walay pulos ang peace covenant nga ilang gipirmahan. Kon mahimo pa lang, ang mga kandidato mag han-ay na lang ug kasugtanan dili na lang ta ni-anang peace covenant kon dili sa usa ka kasugtanan nga kutob sa mga kandidato nga dili makatuman sa ilang gisaad sa katawhan moluwat sa katungdanan. Ambot kon mosugot ba usab ni sila.
************
    Ni-a say kandidato nga nagpabuyag. Kini nga kandidato naghupot ug taas nga katungdanan unya karon nikandidato. Ang iyang opisina de-aircon. Ang kataw-anan, kay nawala kuno matud pa, ang air-con. Tagsa ra gayud mahitabo kay kasagaran sa opisina, kon may mawala kon dili kuarta mga office supplies pero, kining hitabo-a air-con gayud ang nawala. Labihang suko-a sa mayor ug gipatawag ang guardia ug ang guardia mibalibad ug matud pa, dili kuno siya ang mikulimbat sa air-con, gisugo lang ko ni Sir (kinsa kaha ni nga Sir?) Ang nakaparat pa gayud kay kini nga balita nabulabog na sa radio. Matud sa guardia nga gisugo kuno siya ni Sir nga tang-tangon ang air-con, unya dugang pangutana ngadto sa guardia, di-in man dad-a ang air-con? Hinay ang tubag intawon sa guardia… “didto sa balay sa keriding” (ikaduhang bathala) ni Sir.