NewsRecord Weekly Publication

Pik-pik Sa Abaga

Ni Henry Sandoval

Misencounter ug uban pa 

   Kinsa may mutuo anang ‘misencounter’ nga kuno maoy nahitabo sa engkwentro  sa Mamasapano , Maguindanao tali sa Special Action Force  (SAF) sa Philippine National Police (PNP) , Moro Islamic Liberation Front (MILF) ug Bansamoro Islamic Freedom Fighters (BIFF) ug lain pa gyud nga grupo.

   Sa kadugay sa mga eksperto mohimo ug bomba sa ilahang lugar wala gyud ni makuha sa giingon nga area sa MILF? Karon nga gisulod sa mga SAF commandos ang ila katarungan nga walay nahitabong coordination sa dihang misulod sa ilang area. Unya sa ‘volume of fire’ ang ilahang armas tua ra gyud padulong sa mga SAF commando nga kuno natalang didto  sa lugar sa BIFF ug laing grupo nga mibanat sa mga pulis.

   Pero ang atong leader wala gyud gani ka sukmat sa MILF nga maoy respsonsable sa kamatayon sa 44 kabuok pulis. Unta  dili gobyerno ang mokalma kay kita may namatyan. Sila untay moingon nga, “Husayon ta ni.” Kita man hinuoy sigeg hisgotan ang Peace Talks nga natikangkang na manang mga pulis nato. Ang mga armas sa pulis tua gipamaligya na sa mga MILF nga mibanat sa mga pulis.

   Si General Espina nanawagan nga ipauli ang mga armas. Ug gigukod nang mga tawhana sa atong  mga sundalo sila nay mangayo ug kariyo ug dinha mo-demand na ta nga iuli ang armas ug ipa-surrender ang nang ambush. Dili ta gusto ug ‘all out war’ daghan ang maangin ana pero dili honungan ang paggukod ana nila.

   Matud pa ni kanhi Senador Ping Lacson sa dihang  mihatag sya ug opinyon sa programa sa telebisyon, “Ang tuong kamot sa MILF nakig-negosyar apan ang wala naa sa likod sigeg engkwentro sa gobyerno.”

  Unsa may nahitabo sa dihang nakig-istorya si Presidente sa mga SAF? Katulo nga nangutana siya ug katulo sad nga walay usa nga mitingog sa SAF nga naminaw igo lang mitan-aw. Dismayado ang mga SAF commando sa nahitabo sa ilahang mga kauban nga nalagas sa maong operasyon. Ang dako kaayong pangutana nga nganong si  PNP Chief Alan Purisima nga suspendido man unta sya pero mao ra man gihapon ang gamando sa maong operation?   

   Unya karon nga berepikado na sa Federal Bureau of Investigation (FBI) nga ang namatay nga si Marwan mao gyud ang bomb expert nga dugay nang gahagis ug lagim sa Asia kay gani hianggaan man kini siya ug ‘Usama Bin Ladin og Asia.’ Ug daghan na sad diay kining na-train nga mohimo ug bomba sa mga rebelde.

   Pero kaning namatay may patong man nga unon ka milyon ka dolyares, ang pangutana asa man ni padulong? May miingon nga adto kana padulong sa informant ug may miingon pud nga adto na padulong sa operation unit nga mi-operate sa maong operasyon. Pero ug naa man gyud informant ato nga operasyon pwede siya tagaan apan ang 44 ka namatay ug usa ka SAF COMMANDO nga bugtong saksi sa maong engkwentro ang tagaan. Ang kurat lang ug adto ra na padulong sa mga kukhang dagko.

   Karon lang na balita sa telebisyon nga si suspended PNP Chief Allan Purisima mi-resign na sa iyahang katungdanan ug matud pa sa balita gidawat kuno kini sa atuang presidente. Ug kani karon nga hitabo gisakyan sa mga grupo nga kontra sa gobyerno nga anad kaayo magmartsa sa kadalanan Nag- awhag sa pagpa-resign sa presidente sa Pilipinas. Kalandrakas na sad ning karsada sa Manila kay naa  na sad nang mga plakards nga dagko kaayo ug siniguro ko nga ang hulagway ni Uncle Sam ug ni PNoy ana sunugon. Ug unsa na man kahay mapadulngan sa kaso ni PNP CHIEF ALLAN PURISIMA nga karon mi resign na siya sa pwesto?

   Labaw sa tanan, kinsa sad kayhay mudawat sa unom ka milyon dolyares nga patong sa ulo ni Marwan?