NewsRecord Weekly Publication

Pikpik sa Abaga

Ni Henry Sandoval

Sa kilid sa dalan

Nahimo nang katulganan sa mga pamilya nga dunay balay apan ganahan gyud matulog diha ubos sa mga estraktura diha kilid sa kanhi  Continental Tower. 

Sa mga nanlabay nga mga bulan dili kaayo na sila daghan diha nga mga tulog. Ang nakasulaw sa konsensya nga mga alas siete pa pasado sa kagabhi-on magbuklad na sila sa ilahang mga karton aron ilang matulgan. Unya sa karon murag nagka daghan na sila nga mangatulog. 

Ang nakahatag nako ug pagkabalaka nga duna nay mga  dalagita nga nagyaka diha sayo pa sa gabie. Duol kaayo kini sa disgrasya labi  na karong daghan na  kaayong ‘drugstore’ dinhi sa siyudad sa San Carlos. 

Naa man gani koy usa diha nga nakit-an nga magkugos na sa iyaang anak nga magpakilimos sa mga botika dinhi sa  siyudad ug usahay anha sa mga bakery. Nahinabi nako ang usa sa mga dako sa City Social Welfare and Development Office (CSWDO) si Madam Vicky Boteros ug matud pa  niya dili kay kausa sila gipahimangnu-an sa pagbalik na sa ilahang panimalay apan mawala lang kuno ug usa ka gabie pagka ugma naa na sad. 

Matud pa ni Ma’am  Boteros  duna kini silay mga panimalay. Ug naa pa gyuy lain nakong naobserbaha  nga dunay mga tawo nga wala sa ilahang tarong nga panghunahuna nga dia gasuroysuroy sa atuang siyudad nga uban dili taga ato kay ang uban nila mag-Hiniligaynon man. 

Mga talan-awon nga dali ra kaayo madiparahan ug angay nga tagaan ug pagtagad, mao kining mga butanga. Sama anang nangatulog sa daplin sa mga building ug pangusgan gyud na sa CSWDO uban sa atong mga Barangay Opisyal ug kapulisan sa pagsikop kanila matag gabie. Kaning mga katawhan usab nga magpakabana aning mga wala sa saktong pangisip sa pagbantay ug kinsa ang gahulog aning mga tawhana dinhi sa atong siyudad. Siguro makat-on kining mga tawhana sa pagpuyo sa ilahang mga panimalay ug maputol na usab kining mga sakyanan nga mohulog ani nila diri sa ato. 

Ang atong siyudad padulong na sa pag-uswag ug dili na gyud ni mahitabong muatras pa ni ug balik ubos aning mga opisyales nga nagdala sa renda sa pangagamhanan sa siyudad sa San Carlos. Tabangan nato sa paghinahinay pagsumpo ang mga sagbot sa katilingban para maklaro nato ang atong padulngan sa ulahi.