NewsRecord Weekly Publication

Pikpik sa Abaga
Ni: Henry Sandoval

Eleksyon 2016

Mura na ug ginamos nga mawos ang umaabot nga politika karong 2016 sa sunod tuig ang kalabanan karon nga gi-istoryahan sa mga tawo bisan pa man nga wala pa maglihok ang mga yawe sa politika dinhi sa Unang Distrito sa Negros Occidental. Kami nga taga sa media ang kanunay nga mapangutana sa mga yano ug uban nga anaa sa tag-as nga lintang sa katilingban. 
Kalabanan nga mga pangutana sa lokal nga politika kung kinsa ang mahulip sa mga kandidato nga mogradwar na sa ilahang pagka opisyal sa gobyerno lokal sa siyudad sa San Carlos? Ikaduha nga pangutana nga ug kinsa man sad kayha ang mudagan pagka-kongresman sa unang distrito? 

First District Board Member Rene Gustilo

San Carlos City Tourism Officer PJ Maisog

                                                             




  







Kani nga mga pangutana lisud tubagon kay wala pa gayud mudeklarar ang administrasyon kung kinsa ang mga posibilidad nga managan karong 2016. Tinuod nga dunay mga ngalan nga nangguwa pero istoryang kapehan lang ug dili sa mga paradahan ug motor lang nimo madunggan. 
Matud pa nila nga mudagan man kuno si Board Member Mark Cui sa pagka-konsehal sa siyudad? Si Allen Gustilo, si PJ Maisog, si Ted Quisumbing, si Barangay Kapitan Yoyong Laguda, si kanhi konsehal Greg Santillan mubalik kuno pagdalagan, si Amay Lezama ug si kanhi Barangay Kapitan sa Barangay 3 Boy Librodo? 
Amo man lang usang tubagon nga paabot mo sa umaabot nga mga bulan kay kanang inyong tanan nga pangutana matubag kana kay ang inyo mismong mga kapitan sa barangay ang mo-anunsyo niana. Ug labaw na gyud silang excited sa mudagan pagka kongresman sa Unang Distrito ug kinsa gyud kuno sa duha ka ngalan nga gidungogdungog ang sabakon sa administrasyon? 
Mao kini karon ang mga pangutana sa katawhan sa siyudad sa San Carlos. Ang San Carlos sayud kita nga gidominahan kini sa administrasyon ug pila na kahigayon nga dunay misulay ug bangga niini pulos napukan. Niadto lang milabay nga eleksyon mura ug giagian ug unos ang pikas partido sa resulta sa eleksyon. Mura na lang ni ang lokal nga eleksyon ug patas-anay sila kung kinsay humot sa tawo. Paabot lang ta kay ianunsyo ra gyud na sa dili madugay.
Ug ang balantayan ani kaning mga batabata sa mga kandidato nga mutaas ang ihi ug matagaan ug maayo nga pagtagad sa mga kandidato muabuso na. Dia lay nakaila nako nga nakasandig ug konsehal musulod na sa konstraksyon hubog ug muparegla pa dayon ngalan sa iyahang boss ang dad-on nga mao ni ako. 
Hinayhinay lang, Dong, kay basig sa sunod maipon ka sa gimasa sa mga tawo. Konsehal pa gani imong nasandigan mura na man kag sobra pa sa imong amo. Hinumduman nimo nga ang imong amo ligdong ug tadlong manrabaho sa gobyerno. Ayaw mansahi. Karon dili pa nako imitlang imong ngalan sa sunod nga muparegla ka kapitalon nako. Pagsulat ang imohang ngalan ug sigoruon taka nga makatulog ka sa mabugnaw nga lugar. Usba kay mailhan nimo ug tinuod ba ning akong gisulti dinhi.
Nanawag nako ang nag follow-up sa lisensya sa bar nga akong na isyu niadtong miaging semana. Kay lagi kuno gi-anha na sila sa myembro sa LET ug nasuta nga wala mulapaw sa ordinansa nga ginadili paglapaw sa 40 decibels ang sound sa ilahang instrumento. Wala lang ko kapangutana ug unsang orasa mianha ang grupo sa LET. Ako ra siyang giingnan nga halos kada gabie gareklamo ang mga tawo nga duol ninyo. Ato lang tagaan nga wala mulapaw ug 40 decibels apan lapas namo sa alas dose gasiyagit pa nang inyong karaoke dinha. Gani ang barangay tanod nga naa naka poste duol diha sa inyong bar gi on niya ang iyahang radyo para madunggan sa barangay hall. Nakasabot man ko nga negosyo nang inyo pero sabta sad ang pumuluyo nga naa tapad sa imong bar.