Pikpik sa Abaga "Pirmahe"



Pikpik sa Abaga
Ni Henry Sandoval

Pirmahe

            Adunay kisaw sa mga kanhi barangay kapitan ug ang uban kapitan gihapon hangtud karon sa lungsod sa Calatrava mahitungod sa Tracer Letter sa Commission on Audit, Special Services Section, Special Audit Office, Quezon City mahitungod sa Priority Development Assistance Fund (PDAF) ni  Congressman Julio Ledesma IV diin kining kwartaha nga nagbalor ug  P 10 M. Gi request kini sa Nab-Cor  ug gigahinan kini sa PDAF ni Cong. Ledesma. Ug gikan sa record sa Nab-Cor  naggahin ug kwarta ngadto sa Kabuhayan at Kalusugang Alay sa Masa Foundation Inc. (KKAMFI) para sa pagpanghatag sa mga barangay dili lang sa Calatrava kun dili sa unang distrito dinhi sa Negros Occidental ug usa ka Livelihood Kit Volume I-V.

            Mao kini ang nakapaukay kay  ang gihisgut nga tuig sa pagpanghatag dili naman sila mga Barangay Official ug labot pa gyud wala sila kadawat sa maong Livelihood Kit nga karon gisubay sa taga COA. Ang ikaduha nila nga reklamo nga ang mga pirma labi na sa usa ka kanhi barangay kagawad nga nahinabi sa akong kauban nga si Rics Cañisares dili iyaha kuno nga pirma ug ang katunga sa mga tawo nga gisulat dili taga Barangay Agpangi. Kani nga mga Livelihood Kit gipanghatag kini sigun sa sulat sa COA sa mga bulan Hulyo hangtod Disyembre 2009.

            Ang mga kapitan sama sa Barangay Refugio, Patun-an mibalibad nga wa gyud sila kadawat anang Livelihood Kit nga gi distribute sa KKAMFI. Ang bag-ong kapitan sa Barangay San Isidro miasoy kanako nga nakadawat sya ug mga libro atong bag-uhay pa sya nga mipungko sa pagka kapitan sa maong barangay.

            Para maklaro ang maong isyu among gihangyo ug kontak sa opisina ni congressman dinhi sa San Carlos nga mahinabi namo si Mr. Marton Cui  sa iyahang opisina. Mga alas otso sa gabii nga nakahigayun mi paghinabi ni Mr. Cui sa maong problema sa mga Kapitan sa Calatrava. Matud pa niya nga tinuod na kay gani bag-o lang si SB Marlyn Era sa Calatrava nga mi-refer sad sa maong problema. Apan matud pa niya nga nakahibalo na sya sa mga mulo sa mga kapitan dili lang sa Calatrava apil na ang tibuok distrito. Iyahang gipakita ang sulat usab nadawat ni Era gikan sa COA. Didto among nakita nga hasta na si Kapitan Sadi Gadiane ug Kapitan Mahinay sa Ermita anaa usab sa maong nakadawat kuno sa Livelihood Kit. Ug walay labot sa Livelihood Kit aduna pa gyuy 750 ka seedlings sa Rambutan ug 850 ka seedlings sa mangga.

Matud pa ni Mr. Cui niadtong milabay nga fiesta sa Bagonbon gipatapok ni Kapitan Chan sa ilahang balay ang uban nga kapitan sa Calatrava ug mga kagawad sa ilahang barangay. Ug giingnan sila sa sinaligan sa opisina ni congressman nga ang reply form nga attached sa maong querry sa COA iyahang gipabutangan ug notation nga, "Wala mi kadawat sa maong mga items ug ang pirma nga anaa sa sulat dili among pirma."

            Ug miadtong milabay lang nga semana iyahang gitawgan ang opisina sa Nab-Cor sa maong problema.  Pagka sunod semana  nahiabot ang tulo ka personel sa Nab-Cor ug mihangyo kini ug tabang kaniya. Iya pang gipangutana kung diin sila mokuha sa mga ngalan sa tawo nga gibutang sa maong papel. Matud pa sa taga Nab-Cor sa Internet daw. Mibalik ang tulo sa Manila nga wala gyud kuno makadawat ug tabang kaniya. Matud pa usab ni Mr. Cui ang tanan nga komunikasyon nga gikan sa opisina adunay selyo nga nagpamatuod nga original kanang sulat nga gikan sa opisina sa congressman.

            May namatikdan lang mi sa sulat nga nadawat sa duha kanhi kapitan sa Calatrava. Ang usa gikan sa NLDC ug ang usa gikan sa Nab-Cor. Ikaduha nga ang sulat nga nadawat sa SB sa Calatrava may sulat nga gikan sa House of Representative nga dili selyado ug walay pirma sa tawo nga nagsulat. Unsa na man ni? Hain kayha tinuod sa duha ka sulat? Ikaw, Kapitan Sadi, kahibalo ka ani?