Bantay Banat "Politikang livelihood"

Bantay Banat

Ni Rics Cañisarez

Politikang livelihood

             Naunsa na man ning SCBI wala pa gani makasulbar sa ilang water pollution nia na pud nagplano na sad nga mawala nang agiw. Kining agiw gikan sa panghaw sa SCBI, sa mga linabhan kon motupa, usab ka na pod ug laba maayo lag walay mantsa. Sa kadugay nang nag-operate nang planta hangtud karon plano lang gihapon?

            Wala ba kamo makaadto sa Barangay I nga kaligoanan kaniadto ang  dagat? Karon ang mga tawo dili na gani manghinaw sa dagat kay ang kolor mura nag kape unya bahong baklag pa gyud. Mga Sir/Mam kon dili vested interest nang inyo ug kon duna moy pagpakabana sa atong KALIKOPAN ug KINA-IYAHAN molihok na unta kamo. Dili baya mo maulaw sa mga moagi diha sa highway atbang sa motorpool nga ang baho permanente na lang. Magsige lang gihapon ko ug banat mentras tanto magpabilin kanang inyong bahong baklag.

**********

            Bag-ohay lang didto sa kaulohan duna may usa ka dakong kompaniya ang gipaserhan sa DENR kay ang hugaw nga gikan sa ilang planta nakamugna man ug kahasul sa katawhan sa ilang lugar tungod sa water pollution. Milihok ang mga tawo ug gireklamo sa DENR. Wala maabti ug semana gipaserhan dayon. Pero dinhi sa San Carlos ang buhatan sa DENR naa ra sa atubangan gyud sa SCBI pero, walay nahimo nianang baho. Nganong na-isyuhan man ug Environmental Compliance Certificate (ECC)? Laing pangutana, nganong wala man usab magpakabana ang atong mga public officials dinhi sa syudad sa isyu sa pollution?

**********

            Si Mr. Jojo Salvador miingon sa akong higalang taga radyo sa Bacolod nga ang ash fall dili kuno gikan sa ilang panghaw, gikan kuno sa mga asyenda nga gidaoban ang mga kansyaha. Nan, kinsa man ang nagsugid sa matuod ang taga SCBI ba o ang Bantay Banat? Usa ka pangutana nga dili gyud matubag sa taga SCBI: Are you environmental friendly?

**********

            Ang mga palaliton karon hilabihan ang pagtaas sa presyo, bugas, mga delata ug uban pa. Ang presyo sa mga isda ug karne sa baboy murag dili na gyud kaya sa yanong manugpalit. Mulo sa pumapalit  maong wala bay Price Monitoring Council nga gi-ugmad ang syudad aron magbantay o mag-monitor sa mga palaliton diha sa atong merkado? Sa akong naobserbahan, kanang bili sa isda kon didto ka mopalit sa Bulwangan o dili ba diha sa Mabuni ang kilo makapalit ka lang ug tag P 70, pero diha sa merkado tag P 150. Nakasabot ko nga tungod sa ilang bayranan sa lamesa ug ticket daku man usab pero, sobra ra man kaayo ang presyo nga gipatong.

            **********

            Naunsa na man ning atong pamolitika dinhi sa San Carlos? Mura na man ug gihimo na nga livelihood! Serbisyo para unta sa katawhan nakalimtan na man. Kalabanan gyud sa mga politiko nga anaa sa pwesto karon kon dili ang asawa patrabahu-on, mga anak dili ba kaha mga igsuon.

            Mapili ra gyud nang anaa sa pwesto karon nga tinud-anay gyud nga nag-alagad sa katawhan pero, kalabanan gyud gihimo na nila nga livelihood ang politika dinhi sa San Carlos.