Nakigsulti ang Ginoo ni Manny?

Komentaryo

Ni Dodong Mondragon

               Nakalitan ko sa pagbasa sa headlines sa Philippine Star nga matud pa ni Manny Pacquiao ang Ginoo misulti kaniya pinaagi sa damgo nga paundangon na sya sa boxing. Wala kuno hino-on sya sultihi kon kanus-a sya moundang. Sa pagbasa nako niini, naglibog ko kung angayan ba syang dayawon o kataw-an sa iyang pamahayag.

                Sa akong gamay nga nahibal-an kabahin sa Bibliya, sa tibuok kasaysayan sa tawo, pipila lamang ka personahe nga nahisulat nga ang Ginoo nakighinabi sa tawo. Usa sa akong nabasahan mao si Noah. Matud pa sa sugilanon, ang Ginoo nagmahay nganong gimugna pa niya ang tawo nga ang resulta dili man maayo kay sa ilang pagpuyo sa kalibutan nahimo man kini silang mga dautan. Napuno sila sa mga kasal-anan mao nga nakahukom ang Ginoo nga puokon ang tawo pinaagi sa dakong lunop.  Pero makita sa Ginoo nga may usa pa ka maayong tawo nga mao si Noah ug sya dili maka-ako nga madalahig sa silot si Noah.

                Busa iyang gisulti-an si Noah nga magtukod ug dakong arko nga iyang sikupon ang iyang pamilya ug nagkalain-laing hayop ug sila magpuyo sulod niini aron sila maluwas gikan sa dakong lunop.

Image source:  http://celebrityandcelebrity.blogspot.com/2011/08/manny-pacquiao-filipino-boxing-player.html

                Ang usa nga akong nahibal-an mao si Moses. Nakighinabi ang Ginoo ni Moses kon unsaon niya pagdala ang mga Hudeo ngadto sa kagawasan gikan sa pagka-ulipon sa Ehepto. Ug sa pagsaka niya sa bukirang Sinai aron makamugna sa napulo ka sugo, mipakita ang Ginoo pinaagi sa nagdilaab nga kalayo ang usa ka puno-ang kahoy. Ug dinhi misulti ang Ginoo kabahin sa napulo ka sugo nga angayang tumanon sa katawhan.

                Usa usab ka higayon nga nakigsulti ang Ginoo sa mga pipila ka nakasaksi nga si Jesus gibunyagan ni San Juan sa sapa nga matud pa sa kasulatan ang langit mi-abli ug milanog ang dakong tingog nga miingon, "Mao kini ang akong anak nga akong gikahimot-an pag-ayo." Mao kini ang mga dagkong panghitabo nga diin ang Ginoo nakigsulti sa tawo.

                Duna kitay nailhan nga mga tawo nga nakahimo ug mga maayong butang alang sa katawhan sama sa kang Mother Theresa nga usa ka madre nga ginatawag ug 'living saint' pero wala gyud kini sya mag-ingon nga ang Ginoo nakighinabi kaniya. Ang usa usab, si Pope John Paul II nga karon gideklarar na nga usa ka santo. Bisan sa atong pagtuo nga kini sila du-ol kaayo sa Ginoo apan sa buhi pa sila wala gyud kini sila mamahayag nga ang Ginoo nakighinabi kanila bisan lamang sa damgo.

                Unya karon ani-ay usa ka Pilipino nga boksingero moingon nga ang Ginoo misulti kaniya pinaagi sa damgo. Sa binilyon ka tawo sa kalibutan sya pa ang gigahinan ug higayon sa Ginoo nga sulti-an kabahin sa iyang karera sa boksing?

                Unsa mahinungdanon na gyud kaayo ang iyang boxing sa Ginoo? Pagkayamat baya niini!

                Dunay ginaingon sa mga nagtuon bahin sa pangisip, "If you talk to God it is prayer but if God talks to you, you have psychosis." Hinaut nga si Manny Pacquiao na misquoted lang o nagkomedya lang. Kon mo-insister sya nga ang Ginoo misulti kaniya, mabalaka na ko kabahin sa iyang hustong pangisip.