NewsRecord Weekly Publication

Pikpik sa Abaga

Ni Henry Sandoval

Bag-o sa LTO

                Ignon ani man gyud ning tawo reklamo basta madakpan. Tag-iya sa motor nga Star X/MC ang nadakpan sa LTO San Carlos. Expired na ang rehistro kaniadto pang 2004 hangtud karon. Dako-dako gyud ang namulta sa tag-iya. Laliman kag mikabat sa

P 8,487 ang nabayad niya. Unya ang nakasakit kay dili na gyud marehistro ang maong motor kay manual ang rehistro niini. Nakuha man tuod niya iyahang motor apan dili na niya kini mapadagan kay dili man marehistro ug balik. Para gyud matagaan ug esplikasyon ang maong mireklamo kanako akong gisulayan ug hinabi ang Hepe sa LTO San Carlos ug mao ni iyahang gitubag kanako sa dihang akong kining gipangutana ang resibo nga gi-type ra ug wala muagi sa Computer.

                Matud pa ni Mr. Tampus nga duha ka paagi ang ilahang resibohay dinha sa ilahang opisina. Ang usa ka paagi mao nga muagi sa computer ug ang usa manual. Matud pa niya pareha anang motor nga nadakpan dunay item sa bayad dinha nga dili madawat sa computer mao nang ila na lang kining gi-manual ug intak ang mga resibo niini ug kumpleto usab kining gipadala ngadto sa kauluhan. Kato ganing nadakpan iya pang ginatambagan nga "Dili na lang mamulta kun dili mabakal na lang mga reposes da nga mga motor" kay kun madakpan pa kuno ug balik ang maong motor "madugta na lang kay indi na malukat."

                Nalipat lang ko ug pangutana ni Mr. Tampus nga kung mupalit na lang syag mga reposes nga motor makuha ba niya ang iyahang motor nga nadakpan? Dili siguro. Ug dili kaanugon sad no nga naa ra imong makit-an nga madugta diha sa LTO office ang imong motor. Na kani pahibalo lang sa mga motor nga manual ang rehistro murag dili na gyud na ma-renew nang rehistro ana. Kay aduna silay nadawat nga Memorandum Circular niadtong November 29, 2011 gikan sa Central Office nga nagpahibalo sa tanang Regional Directors, Head of Agencies, ang LTO IT System nga ang Central Office dili na mo-proseso o mo-implementar ug request for MV Data Take-On from field Offices. Mao nang ug duna moy motor nga pipila na ka tuig nga na rehistro ug manual pa ayaw na lang kana padagana kay ug madakpan kana dili na gyud kana makuha pa. Ang maayo na lang ana i-convert ang makina ug galingan sa kape mapuslan pa na.

**********

                Sa Nasugbu, Batangas  nagkahiusa ang  NGO, LGU, ug mga grupo sa mga estudyante sa pagpananum ug bakhaw sa daplin sa kabaybayunan. Matud pa sa lider, nga importante gyud nga mudaghan ang bakhaw sa ilahang daplin sa baybayon tungod kay dako kaayo ug kapuslanan.  Usa sa iyahang gihisgutan nga dinha sa bakhawan nangitlog ang mga isda. Kay kung mahurot ang maong mga tanum sa dagat asa na man lang unya kuno mangitlog ang isda?

                Dinhi sa atua, sa nagtrabaho pa ako sa kang Konsehal Dixon Yu, usa ang nursery sa bakhawan sa among gidu-aw dinha sa Maloloy-on.  Malampuson ang maong proyekto. Labihan kadaghan sa bakhaw nga gipananum sa mga tawo nga gi-sweldohan sa gobyerno.  Siniguro gyud ang mga itloganan sa isda.  Apan karon hilabihan na intawon ka imposible nga ang isda maka- itlog pa sa mga bakhawan sa daplin sa atong kabaybayonan labi na gyud sa Maloloy-on padulong sa baybayon sa Barangay I.

                Matud pa sa mga manunudsod nga akong nahinabi diri na sila sa may pantalan sa central nanudsod kay didto sa baybayon sa may ka Preking gawas sa wala nay makuha kaayo nga pasayan katol pa gyud ang dagat.  Ang gamay nga sapa-sapa nga lusot diha sa may Nefcor wala kana kaayoy makita nga alingkara ug agokoy nga mao untay tima-ilhan nga dili kontamenado ang dagat.

                Niadtong milabay nga semana adunay mibisita didto nga tulo ka grupo. Ang Department of Environment and Natural Resources, San Carlso Bioethanol, Inc., ug Barangay Official sa Barangay I mikuha sa punong ug sample sa dagat duol sa may NEFCOR. Ug pananglitan, aduna nay resulta sa pag-examine atong gikuha nila nga sample, unsa kayhay mga alternatibo nga paagi kung makita nga positibo sa makadaot sa mga isda sa dagat ang maong hugaw nga gipaagas dinha sa gagmay nga kanal sa tapad sa eskwelahan?

Nahinumdum ko sa sulti ni Mr. Jojo Salvador nga ang uban nianang hugaw nga gikan sa SCBI gi-bisbis sa mga katubhan ug mga punong.  Pero murag dili kahurot pagyabo sa mga kampo ug punong.  Mulat-as gyud sa gamay nga punong diin gipundo kanang mga hinugas sa ethanol. Labi na gyud kung mubaha mokusog ang ulan tiwas ang mga tigas nga alimango nga naa sa daplin sa mga punong.