Daghang salamat, Sir!

Pikpik sa Abaga

Ni Henry Sandoval

                Gisubay sa Licensing Department ang isyu nga akong gipaguwa atong milabay nga semana mahitungod sa mga lisensya sa pedicab nga walay tatak nga L.C. O.R. number sa likod sa maong lisensya sa pedicab. Nagka istorya kami sa usa sa dako sa maong opisina ug ako silang giingnan nga subaya ninyo kay naa nay daghan nga miguwa niana. Wala magdugay diha sa may NOVO nakakuha gidayun sila ug I.D. sa pedicab ug ilang na-confirm nga dili kini gikan sa ilahang opisina. Nadala sa Police Station ug didto nangguwa ang ngalan sa mga involved sa maong palusot sa peke nga mga I.D.

                Matud pa sa impormasyun nga akong nakuha duha ka traffic enforcer ug usa ka casual nga empleyado dinha sa City Hall ang nahilambigit niini. Wa sad kuno magpaabot ang maong empleyado sa City Hall mihiklin ra sad sa iyahang mga gamit ug wala na motrabaho. Pasalamat na lang sad ko sa Pedicab Driver nga mipakita sa iyahang I.D. ngadto sa among mga field researcher  sa News Record.

**********

                Mayor ROGELIO R. DEBULGADO, ang tawong naila sa iyahang pagka-maayo nga pangulo sa siyudad. Ang tawo nga nag-abri sa kauswagan sa San Carlos. Kinsa ba ang magdahum nga ang tubig nga dugay gihandum sa katawhan sa kabukiran maabot sa ilahang panimalay? Kinsa ba ang magtuo nga ang kabukiran aduna nay mga appliances nga de koryente? Mga damgo sa katawhan sa kabukiran nga nahimo ug natuman sa panahon nga sya ang nahimong mayor sa syudad. Ang pagbu-ak sa kabukiran nga gitawag ug '70 Million Project' nga wala mangutang ang atong syudad maoy usa ka dako nga proyekto nga gibilin ni Mayor Debulgado.

                      Ang pagtapos niya sa City Hall, ug ang pagpabarog sa usa sa pinaka magarbohon nga terminal sa Pilipinas. Ang People's Park nga maoy usa sa mga anindot nga lugar nga suruyanan  sa mga turista. Ang giingon nilang Ohong kaniadto nga mao ang Auditorium nga karon mao ang dunggu-anan sa mga aktibidades labi na ug panahon sa ulan. Ang Fatima Village nga diin ang mga skwater kaniadto naghandum nga maka angkon ug kaugalingon nga yuta pinaagi sa programa ni kanhi Mayor Debulgado, "ANG YUTA PARA SA MGA KABOS." Ang pag relocate sa mga pipila ka panimalay ngadto sa payatas nga karon ilahang gitawag ug Riverside Village.

Suporta gihapon. Mga taga Fatima Village nga nag-atang sa  kilid sa Eco-Tourism Highway sa ulihing byahe ni kanhi Mayor Rogelio R. Debulgado.

                Sa iyahang katapusang byahe ang mga tawo nga dili mawala sa ilahang kasing-kasing ang utang kabubut-on ngadto sa mipanaw nga mayor nangguwa sa ilahang panimalay. Ang Riverside Village, ang Purok Kaingat ug ilabi na ang Fatima Village nga kanhi gitawag ug Urban Poor nangguwa sa karsada ug aduna silay banner nga may gisulat "WE LOVE YOU FOREVER! Salamat, Sir!"