Mag-ooling

Bantay Banat

Ni Rics Cañisarez

              Lisod na kaayo ang kahimtang karon sa mga tawo nga mamutol ug kahoy unya olingon ug ibaligya aron lang makapalit ug bugas sa ilang pamilya. Ingon man usab niadtong mga mobaligya ug oling, kay karon kinahanglan na nila nga mokuha una, ug Barangay Certification ug clearance gikan sa Department of Environment and Natural Resources, kay kon dili ka katuman niini, hunong gyud ang pamutol ug ingon man ang imong negosyo.

Kon mao unta ang gibuhat sa atong gobyerno kaniadto, hayan nga dili unta maupaw nang atong kabukiran. Sigon sa akong mga kaila nga manug-oling nga wala na gyud silay mahimo gumikan kay mao na man kini karon ang patakaran sa gobyerno. Ang solusyon niini, mao unta kon dunay livelihood assistance nga mahatag ngadto sa atong mga igsuon nga nag kinahanglan ug panabang sa gobyerno.

                                                                **********

                Naunsa na man intawon ning atong Pangkabuhayan ng Pamilyang Pilipino Program kon 4Ps. Daghan na man kaayo ang reklamo nga matud nila nga kaniadto kompleto pa nga P2,400 ang ilang nadawat, pagkasunod, P2,000 na lang.  Misaligbat usab ang laing beneficiary nga miingon, “Ah! Maayo ka gani kay duna ka pay nadawat. Ako, wala na gyud kay napapas ang akong ngalan.” Sus, naunsa na man ni? Sa mga nagdumala sa 4Ps diri sa atong syudad, esplikahe kuno ninyo ang mga tawo nga nagmulo kon nganong na-ingon na man ang kahimtang karon niining 4Ps.

                                                                  **********

                Kon ang tawo gani ang moreklamo batok sa pulis nga nakahimo ug salaod wala gyuy motagad, walay bisag usa sa atong mga opisyal o kaha ang hepe sa atong kapulisan (siguro ko nga dili magtagad ang atong hepe kay sya man ang nagpasi-ugda sa sayop nga binuhatan). Pero, dako ang akong pagtuo nga kon gipadangat unta sa tagreklamo ngadto sa Peoples Law Enforcement Board (PLEB), hayan nga matubag unta ni P/Supt. Harold Tuzon kadtong hitabo nga nagpa-derby sila sa adlaw nga Sabado. Para sa unsa man tong derbyha? Hangtud karon wala pa gyud makapadala ug explanation si Sir Tuzon dinhi sa NewsRecord. Asa man mo reklamo ang mga tawo?

                                                                    **********

    Utro sad ning SCBI, kining planta sa ethanol, nga bisag unsaon nato ug banat dinhi sa NewsRecord kining ilang bahong baklag nga pollution wala gyuy pagtagad.  Kaniadtong nakalabay nga semana na-atlan gyud nga nag-ariya sila sa ilang hugaw gikan sa lagoon dili gyud ma-agwanta ang kabaho kon dili ka lang tingali lig-on ug ginhawa nimo makasuka ka gyud pero, bisan pa man niini, wala gihapo’y pagtagad ang SCBI.  Sa taga San Carlos, okay ra man tingali kay naanad na man sila ning baho-a pero, sa mga passers-by, dili ba mo maulaw?

                                                                      **********

   Isyu sa payroll padding ang naka-aghat kanako nga padul-an ang buhatan diha sa City Hall aron sa pagmatuod kon duna bay usa ka engineer nga nagdumala sa usa ka proyekto sa syudad nga naghimo na usab ug milagro ug kini, mao ang payroll padding.  Matud sa akong nahinabi nga ila na kining gipasusi, ug dugang pa niya nga imposible nga mahimo ni nila karon kay gawas nga ang Mayor mobisita na gyud sa mga project site daghan pa gyud nga lamesa ang agi-an sa mga papeles aron pirmahan. Gani sa mga natungdan, ayaw na gyud mo ug patuga-tuga nga mag payroll padding kay lahi kaniadto ang administrasyon ni Mayor Ginggo Valmayor karon.

                                                                        **********

Kon sa pagwapo-gwapo lang ang hisgutan dili na tingali hilabuan ang Barangay Hall sa Guadalupe pero, ang nakamaut lang kay ning bag-o lang, mura man ug mawala ang kagwapo kay nasakpan sa mga linemen sa VRESCO nga nag illegal wire tapping ug abi ninyo kon pila na ka tuig nga nag illegal wire tapping ang barangay hall? Sus! Sigon sa taga VRESCO nga akong nahinabi, mokabat na sa unom ka tuig. Matud pa gyud nila nga didto ni sila nag wiretap gikan sa street light. Sa ato pa diay sulod sa bale lima ka tuig walay gibayran ang barangay hall sa kuryente nga ilang gigamit gikan sa VRESCO? Sa pagplastar diay sa ilang budget syaro, ang barangay kapitan diay ug ang mga kagawad wala diay sila mogahin para sa bayranan sa koryente? Galing unsa may badyetan kay nag illegal wire tapping man ang barangay? Sa kadugay nga panahon nasakpan ra gyud sa illegal wire tapping ang Guadalupe Barangay Hall.

                                                                     **********

                Kon  basehan ang taga VRESCO nga mokabat na kuno, matud pa unom ka tuig, diin man sila nagkuha ug kuryente sa electric welding nga ilang gigamit sa pagtukod sa barangay hall? Ug ang koral diha nga puthaw palibot sa barangay hall, ayaw ko ug ingna nga inyo ra nang gi-welding sa inyong laway. Kon kwentahan mo sa VRESCO sa inyong back billing, dili ba kaha mo kuyapan niini? Gitaoran na ra ba sa taga VRESCO ug metro check, kon pila ang back billing sa Barangay Hall sa Guadalupe, sus pila kaha no?

Kinsa may dili makuyawan niini kay sigon sa nalatid sa PD 7832 sa illegal wire tapping ang madakpan sa illegal wire tapping, mahimong mabilanggo sulod sa 12 ka tuig ug multa nga bale P 20,000, kay mga officials man mo sa barangay, dili na lang ko maghisgut kabahin aning reclusion perpetua. Kamo na lay sabot kon unsa kini.  Grabe no? Kay sa 18 ka mga barangays sa San Carlos ang 17 nagbayad gyud sa ilang koryente nga nagamit pero, ang Guadalupe ra ang wala, kay lagi nag illegal wire tapping man.