Arangkada na sad

Pikpik sa Abaga

Ni Henry Sandoval

                Nanimaho na ang bugnong lugaynon sa Unang Distrito. Sa silinganang lugar ning syudad sa San Carlos may mga ngalan nang mitumaw nga mudagan pagka mayor ug pagka bise-mayor. May holohungihong  nga sa Calatrava mahimo kunong  tulo ka korner ang kombate sa politika. Apan murag sa among tan-aw duha ra gyud. Ang incumbent nga mayor ug ang sa pikas nga grupo.

                Sa tulo ka lugar, Calatrava, Toboso, ug Escalante City, makita dinha ang kompetisyon sa politika. Dinhi sa ato debuynas ang mabindisyunan kay murag nakasakay na sa jet plane. Wala na may kisaw ang mga kanhi midagan niadtong milabay nga eleksyon. Dunay mitumaw nga usa ka engineer nga mudagan kuno kini sa pagka konsehal dinhi sa syudad sa San Carlos. Kinsa kahay palaran nga masulod sa grupo sa administrasyon nga naa may mo-graduate nga konsehal?

                Sa pagka kongresista, murag walay engkwentro si Congressman Jules Ledesma. Apan dimalas ning mga kandidatuha kay ang filing of candidacy karon mang Nobyembre ug dili gyud kini maka-eskapo sa mga bumubuto sa mga pinaskuhan sa mga kandidato unya. Murag di gyud ni ka pahiple sa daplin kay magpa pogi na man ni sila. Kung sa Tagalog pa, KANYA KANYANG GIMIK YAN! Unya ang mga botante basta panahon sa election ang kandidato mahimo na nang DOCTOR. Mapuno na sa resita. PREPARAR SA BULSA.

**********

Summer kick. Mao kini ang mga miapil sa Inter-Crishar Taek Won Do Tournament nga gipahigayon niadtong Marso 25, sa Gaisano San Carlos. Ang mga misalmot gikan sa Bacolod, Talisay ug San Carlos City. 

                Reklamo sa usa ka trabahante nga natingala sya anang usa ka opisina dinha sa City Hall nga inug abot sa alas kwatro di  na man molihok ang papeles nga ilahang gi-follow up. Mura bag duna silay cut-off time nga inug abot sa alas kwatro di na mudagan ang mga papeles sa maong opisina. Ang empleyado nga mapundo ang ilahang papeles matud pa niya mag sige ug guwa unya magpa bulhot sa sigarilyo. Naa pud kunoy casual nga na assign diha nga opisina kung maka astar mura pud ug regular. Wala na diay nay tracer ang inyohang papeles nga i-process?

                Sa akong nahibaw-an walay cut-off time ang gobyerno.  Sa panahon kanhi sa mipanaw na nga Mayor Roger Debulgado ug malangan ang papeles labi na gyud ug payroll sa casual ang ma-delay tawgon ang in-charge sa maong lamesa nganong nadugay ang maong papeles. Kay matud pa ni kanhi Mayor Debulgado sa pag delayed sa mga payroll sa casual mapugos na lang sa pagdagan sa mga iho nga anaa nagpahulam ug kwarta sa City Hall.

                Para mahunong nang ingon ana usa ipasulod ninyo anang opisinaha pauban ug usa ka security aid sa City Mayor's Office para makita gyud ug di ba gyud ipadagan ang inyong papeles.

**********

                Sa pipila na ka tuig nga milabay mipaguwa tag isyu dinhi nga adunay usa ka opisina sa gobyerno nga ug mubayad na gani ta ang kambyo dili isukli. Sa kadaghan sa mibayad nga mi-reklamo nasulat nato kato sa NewsRecord.

                Karon na sad duna na say botika nga ug mupalit ta ang senintabos nga kambyo dili iuli. Maayo ra ba unta nga ug inug hatag nila bisan dulse na lang ibalik wala gyud. Ang uban nga botika nga ug alang-alang sa kambyo muhatag man ug dulse. Pero kining botikaha muhatag ra diretso sa kambyo pero kanang senintabos dili na ma-uli nimo. Maayo untag inug cash count ani nila nga ug masubra ang cash ma suspended ni sila. Dili siguro.

                Ako mismo sa kadugay na nakong pinalit diha nga botika gireklamo gyud nako sa nag-duty niadtong gabhi-una kay ang tambal nakong gipalit P 14  gikambyuhan ra man kog singko sa akong P 20. Uy! Usa ka buok bulad na man na mapalit sama namong mga kabos.