NewsRecord Weekly Publication

Komentaryo 

Ni Dodong Mondragon

Human sa Edsa

II. Pagbalik sa Kagawasan ug ang Nasud Karon

                Wala mosaler ang mga tanke de guera nga gipadala ni Marcos tungod kay ginadilihan kini sa mga bagang katawhan.  Ignon niini ang sitwasyon sa pipila ka adlaw ug adunay posibilidad nga madangat kini sa dugu-ong konprontasyon kay nabahin na ang military.  Ug kini nakita sa gobyerno sa Amerika nga nakadaut kini sa ilang interes sa Pilipinas busa ilang gikumbinser si Marcos nga manaog na sa gahum ug mobiya sa Pilipinas.  Malagmit nakita ni Marcos nga wala na sya'y padaug kay wala na sya'y mandato sa katawhan nga kon magmagahi-un sya, ang Amerika na ang mohipus niya. Kauban sa iyang pamilya milagiw sila patubang sa Hawaii ug sa Pebrero 25, 1986, nahibalik ang kagawasang demokrasya sa Pilipinas gikan sa diktatoryang rehimen.

                Kon ang pangutana, human sa EDSA unsa na? Ang tubag niini mao ang sobra na 26 ka tuig nga milabay ang mga Pilipino nakatagamtam ug kagawasan ug nawala na ang kahadlok ngadto sa gobyerno tungod kay ang nanag-iya mao na man ang katawhan.  Busa angay gyud nga hinumduman ang EDSA Revolution kay bunga kini sa pakigbisog sa katawhan batok sa mga malupigon nga kon wala kini mahitabo, unsa kaha kita karon?

                     Bahin sa ekonomikanhong kinabuhi sa Pilipino, angayan natong hisayran nga sa pagbiya ni Marcos sa Pilipinas, ang ekonomiya pastilan nang guba-a. Matud pa ni Ninoy Aquino, sa gipangutana sya kon mawala na si Marcos, unsa may madangatan sa Pilipinas.  Ang iyang tubag, nga ang makapuli ni Marcos maglisud ug magkapuliki sa pagpabarug ug balik sa ekonomiya sa nasud kay nahimulbulan na pag-ayo ni Marcos ang kaban patigayonan. 

                Ug matod pa sa anak sa kanhing Central Bank governor, nagsulti kaniya ang iyang amahan nga sa wala pay Martial Law adunahan ang nasud nga dili na unta angayan mangutang sa IMF-World Bank kay ang "gold reserves" sa Central Bank bastante na kaayo nga ibayad sa utang.  Pero unsay nahitabo, sa panahon sa Martial Law? Gipagawas ni Marcos ang tanang gold reserves sa Central Bank ug ambot diin dad-a hangtod karon wala dungoga.

                Malagmit ang nahabiling pamilya Marcos mao ray nasayud.  Sa panahon ni Marcos, nagpatuyang lang sya pangutang sa gawas alang sa mga proyekto, apan ang kinabag-ang kantidad niini napunta sa lawom nga bulsa niya uban sa iyang mga cronies.                                 Ang nasud karon, pastilang pobreha ug mahinaot lang kita nga ang nagpuling nagdumala magmatarong ug dili parehas sa ubang naagi nga pastilang mga kawatana.  Ang atong pangabuhi dili diha-diha dayon mo-umento kay nagkinahanglan kini ug pasensya ug paningkamot natong tanan.