Magdalena gisikop

Pikpik sa Abaga

Ni Henry Sandoval

                Bisan pa man sa isyu nato nga gipaguwa niadtong milabay nga tuig nga gipanguluhan ug Mga Magdalena sa Kawayanan padayun gihapon nga makita nato kini sila sa daplin sa karsada diha sa gitindahan ug kawayan sa may eskina National Haighway ug Dalan S. Carmona. Dili man sad nato mamahayan nga naa ra sila dinha nagpadayun sa ilahang trabaho kay wa man say nagbuyag nila. Sa mga parokyano sad nga hilig kaayo sa kadiyot nga kalipay giganahan ra pud kay sayon ra pangita-on.

                Niadtong milabay nga gabie, Abril 11, mga alas otso ang takna, kalit lang nga gidakop sa mga pulis uban ang City Social Welfare and Development Office (CSWDO) ug City Health Office (CHO) personnel sakay sa ilahang patrol car ang mga magdalena nga nag stand-by sa daplin sa karsada. Matud pa sa mga tawo nga naka saksi murag nag abat-abat ang pulis ug ang mga magdalena kay nanagan man kini. May nasakay gyud sa patrol car ang mga pulis nga ilahang gidala sa Police Station.

                Ngano kayhang gidakop man? Siguro adunay mi reklamo nga parokyano nga misyagit na ug 'Tarzan!' Ug di ba ang uban dinha nga ga stand-by wala na mo pa check-up sa CHO para magpalimpyo sa ilahang lawas. Ug dili ba mireklamo na ang mga relihiyoso nga grupo dinhi sa syudad.  Ug di ba ang mga pumuluyo dinha nga gisabaan sa tungang gabie. Karon sa may National Highway mingaw na ug wala nay makita nga mga magdalena sa daplin sa karsada nga namungko.

 **********

                Samtang gatapas ang mga tapasero diha sa Sona 41, Sitio Hagna, Barangay Buluangan kalit lang nga nagka gubot tungod sa usa ka kalabera nga nakita sa kampo nga ilahang gitapsan. Matud pa sa usa ka barangay tanod sa maong barangay nga si Desederio Enarciso may  5'6" ang gitas-on sa maong kalabera ug sa ilang tan-aw lalaki kini. May bangag sa iyahang kilid sa agtang nga milapos usab sa pikas bahin sa ulo. Ang iya nga ubos nga bag-ang nahibulag sa ibabaw nga bag-ang ug aduna say liki sa kilid sa may dalunggan nga bahin. Daghang buak sa nawong sa maong tawo. Wala kiniy senina  nga makita nga nadunot timailhan nga hubo kini nga gibutang sa sulod sa kampo.  Walay  indikasyun nga taga Barangay Buluangan ang maong biktima kay matud pa ni Kagawad Tolcidas wala may nawala nga tawo sa ilahang barangay. Ang kalabera gisulod sa sako ug gibutang kini sa kilid sa dakong krus sa ilahang menteryo.