NewsRecord Weekly Publication

Bantay Banat

Ni Rics Cañisarez

Sa usa ka tindahan

"Sugod karon dili na ko mamalit pa ug bisan unsa nga palaliton dinhi sa Libra Mart."

Mao kini ang reaksyon sa mga mamalitay diha sa maong tindahan kaniadtong Mayo 18. Kini gud ang Libra Mart, kon adlaw nga Biyernes ug Sabado maghuot gayud ang mga pumapalit nga halos dili na kaagi ang mga costumer nga inug kahuman nga makapili sa mga palaliton isulod sa plastic basket ug molinya padulong sa cashier aron mobayad. Ingon niini ang patakaran sa maong tindahan. Bisag unsa ka taas ang linya kinahanglan molinya ka gayud pasunod ug kon ikaw ulahi molinya ka gayud. Niadtong adlawa apil usab ako sa taas kaayo nga linya bisan tinuod nga gamay ra nga kantidad ang akong napalit. Pero, duna lang koy namatikdan apil na ang uban nga naglinya. Dihay usa ka tawo nga puno-puno ang push cart nga nagpasumada sa cashier. Busa, ako ug ang uban nga naglinya nga human sa sulod sa push cart mohawa na ug mosunod na usab ang lain nga naglinya. Unsa gud diay pagka unsa-a nga duna pa man diay laing push cart nga puno gihapon pero, wala sa linya ug pagka human duna pay lain nga push cart nga nag sunod-sunod nga wala mo-apil sa linya.

Tungod niini, ako ug ang uban nga naglinya naaghat nga nireklamo ngadto sa supervisor kung nganong ang uban nga pinalit nga sulod sa mga push cart wala man i-apil sa linya ug ngano nga nauna man lagi ug sumada kadtong mga push cart kaysa namong naglinya. Ang tubag sa supervisor tungod kay daku lagi kuno ug bill ang customer ug labot pa, aron kuno matud pa, dili mabalda ang computer adding machine. Kon mao kini, murag maguba na ang patakaran nga linyahanay.                          

Hain man ang mas maayo sa Libra Mart, pahimo na lang mo ug push cart nga murag bus ka daku kay aron ang mga mamalit dili na mag linya kay inyo man kaha palabihon ang mga dagku nga costumer. Ingna unya nang tag-iya sa maong tindahan nga padak-an kay maghu-ot nang pumapalit. Ang mga pumapalit nag-antus sa kadugay nga barog sa linya, ha-in man ang mas maayo nga adto na lang mopalit sa uban nga tindahan bisan tinuod nga molabaw ug pila ka sentimos pero, dili ka mag-antos ug barog?

Magsalig man gud ning tindahana kay walay kompetensya. Ang nakasinati niadtong adlawa ni-ingon nga, “Sukad karon dili na gayud ko mamalit diha sa Libra Mart.” Bitaw, naa dihay usa ka tindahan nga kompleto pa nganong dili man kita moadto didto kon mamalit? Ug alang sa supervisor diha, duna bay pahanugot ang tag-iya nga kon dunay daku nga customer mao inyong palabihon? Ang maayo tingali kanimo, adto ka mag supervisor sa ukay-ukay.

**********

Garbo ug dungog kining pag-duaw sa Azkals o Philippine Football Team diri sa San Carlos. Mianhi sila sa dakbayan para sa tulo ka adlaw nga football summer training camp uban usab ang junior team (U-22) nga mao ang magpahigayon sa football clinic ngadto sa mga mahiligon sa football. Sa akong nahibaloan, walay gasto ang syudad para sa ilang transportation kay ang nag-abaga mao man ang ilang mga sponsors. Hinuon, ang pag preparar sa football field ug sa mga security mao ang gisangon sa siyudad.

Maayo unta kon magsige kining pagduaw sa mga sikat nga team nga walay labot sa Azkals o kaha mga sikat nga players sa volleyball dili ba kaha mga teams sa PBA kay nasiguro nako nga dugokan kini sa mga tao ug ang resulta daku nga tabang sa atong ekonomiya kay ang mga hotel makakwarta man. Gani, ang mga restaurant ug uban pa nga establisemento makapasalamat kon may moabot pa nga mga bisita dinhi sa dakbayan. Sa laktud nga pagkasulti, kanang mga football field diha sa Center Mall bisan tinuod nga mga sagbot lang makaaghat sa mga players pareho sa Azkals nga mo-anhi gayud sa San Carlos. Unsa kaha kon duna pa kitay usa ka daku ug nindot nga auditorium?

Nalipay lang ko nga wala moagi  ang team sa Azskals gikan sa Bacolod via Escalante paingon dinhi sa San Carlos, kay simbaku diha niagi sa highway atbang sa ethanol, ug nakapanimaho sa bahong baklag, maka-ingon unya nga, "Ito ba ang amoy nang San Carlos?" Naunsa baya ning SCBI nga nag pabungol-bungol man lang? Kana ra bang inyong bahong baklag moabot na ra ba na sa pantalan kon mohuyop ang hangin. Dili na gayud na madala sa pahumot-humot. Kon mo-ingon mo nga dili makadaot sa panglawas sa tawo, mas maayo tingali nga kanang hugaw gikan sa lagoon nga hakuton sa trak, anha na lang ibubo sa compound sa SCBI, tan-awon nato kon dili ba mo managan. NRWP