NewsRecord Weekly Publication

Pikpik sa Abaga

Ni Henry Sandoval

Hold-up sa C-Mall

Usa na sad ka hold-up ang nahitabo niadtong milabay nga Mayo 19. Si Siegred May Liagas, dalaga, nagpuyo sa Hope, Barangay V, gikan ningsuroy didto sa pista sa Pantalan, Barangay VI, ning-adto pud sa Center Mall. Matud pa sa inahan nga nag-asoy kanako samtang nangihi ang usa niya ka kauban kalit lang may miduol kanila nga duha ka batan-on ug dayun ti-un sa hunting knife ug mideklarar nga "Hold-up!"

Nadala gayud ang cellphone sa duha ka mga hold-upper. Na blotter ang maong hitabo ug dali nga miresponde ang kapulisan apan wala na diha ang mga suspetsado.

Kanang hold-up diha sa Center Mall dugay na ug daghan na ang nabiktima dinhang lugara. Ambot ug may nadakpan na ba ang atong kapulisan dinhi sa San Carlos. Murag wala pa man gayud ko kadungog nga dunay nadakpan. Ug labot pa ang back-to-back nga patrol car sa pulis anha man lang makita sa may Shell Gasoline Station mag standby. Ug duna pa lang untay mo-standby dinha sa Center Mall sigurado ko nga dili na magsige ug himo nang mga mangtas sa kagabhi-on diha sa Center Mall.

Kalas siguro ang gasolina ug adto maglibot libot sa Center Mall ang sakyanan sa atong kapulisan. Kanang dalan padulong sa City Hall bisan adlaw nga dako labnotan ka sa mga snatcher. Ang asawa lang ni Tata Marani samtang mangumpra unta dinhi sa merkado kalit lang nga gilabnutan sa iyahang bag ug maayo gayud nga pagkadala ang bali P14,000 nga inug kumpra unta. Sa adlaw dako manglabni ug wala pa gayud madakpi ang maong snatcher.

Di pud ko motuo nga mas intelehente pa ni sila sa Intelligence Unit sa kapulisan sa San Carlos. Kadako sa gigahin sa siyudad sa Intelligence Fund unya nganong wala man gayud ni taga-i ug espesyal nga pagtagad para masikwat ning mga tawhana. Wala man sad ta kadungog nga adunay gihimong buy-bust operation ang atong kapulisan sa parte sa droga. Gamiton unta nang kwartaha para mahunong na nang krimen dinha sa Center Mall. Kanus-a pa man na gamiton kanang wala nay mosuroy ug Center Mall?

**********

BRIGADA ESKWELA kaniadtong milabay nga petsa Mayo 21. Makita nimo nga malampuson kay kadaghan sa ginikanan nga miapil ug mga NGO nga miapil sad. Bisan pa sa pagkamalampuson sa maong kalihukan dunay ubang ginikanan nga nakasaway sa usa ka eskwelahan nga sa dihang giisa ang Bandera sa Pilipinas nagkagutay-gutay ug pus-aw na sad ang kolor. Abri eskwela na man unta wala man gayud kuno kapalit ug bag-o.                             

Ilisi pud na Madam ang bander para nindot pud tan-awon ug nindot sad ang pagkanta sa Pambansang Awit. Sikat na ra ba na imohang eskwelahan kay han-ok gayud dinha tanan.NRWP