NewsRecord Weekly Publication

Bantay Banat 

Ni Rics Cañisarez

Inyong SALN

Nahuman na gayud ang Impeachment Trial batok sa kang Chief Justice Renato Corona ug niining kapin sa 40 ka adlaw, nahukman sa 23 ka Senator-Judges nga guilty si Corona gumikan kay wala niya ideklara sa iyang statement of assets, liabilities and networth (SALN) ang minilyon niya nga deposito sa bangko.

Tungod sa desisyon sa mga senator-judges, dili kalikayan nga duna say mo-ingon nga dili kuno balanse, pero ang Catholic Bishops Conference of the Philippines (CBCP) mipadayag sa ilang pagrespeto sa desisyon sa mga senador. Busa, maka-ingon ko nga magsilbing leksyon kini sa mga ana-a sa gobyerno nga ideklara gayud ang ilang kabtangan sa insakto.

                                    **********

Dinhi sa San Carlos, ato kunong sulayan sa pagbusisi diha sa City Hall kon kinsa ang wala makadeklara sa ilang mga SALN kay kadto lang ganing usa ka clerk of court nga si Mrs. Flores napapha sa iyang trabaho sanglit kay wala niya gideklara ang iyang gamay nga negosyo.

Pagbantay mo kay duna na ra bay mga mata nga nag tan-aw ug mga dalunggan nga nag monitor ninyo.

                                    **********

Dunay pipila ka casual nga empleyado diha sa City Hall nga mireklamo diri sa Bantay Banat gumikan kay matud nila ang ilang sweldo gikan sa petsa uno hangtud sa 15 buhinan ug bale dos P 200 ug sa petsa 15 hangtud sa 30, P 200 gihapon ang ibuhin.

Aron matubag ning maong reklamo akong gipangutana si City Administrator Francisco Tolcidas kon tinuod ba gayud. Sigon sa kang Tolcidas nga ila na kunong gi-meeting ang mga non-rotating ug rotating casuals aron ilang mahibaloan  kon nganong ingon niini ang nahitabo sa ilang sweldo.               Mandatory kuno kini matud pa ni Tolcidas ug dili angay nga mabalaka ni sila kay kana nga kwarta nga gibuhin sa ilang sueldo pwede na nila makuha sulod sa napulo ka tuig nga dunay interest ug mahimo na usab silang maka-loan sama sa housing loan ug uban pa.

Pero, bisan pa man niini, duna pay uban nga nag-ingon nga kon mandatory man gayud, nganong hangtud karon wala pa man sila kadawat ug Pag-ibig membership number nga sige man ug deduction ang ilang sweldo.

Ug kining mga project based workers nga ma-terminate sa ilang trabaho kay lagi wala na may project, mauli pa kaha ang kwarta nga gibuhin sa ilang sweldo? Kay kon dili ka kuno makahatag pala-on man ang imong ngalan sa job order.

                                     **********

Si Congressman Eddie Gullas sa Cebu mipasar ug balaodnon didto sa kongreso nga i-oktaba ang barangay eleksyon karong 2013 ngadto sa tuig 2015.

Sa ingon niini nga rason, nasayud si Gullas nga ang barangay eleksyon non-political ug dili angay idungan sa tuig 2013 eleksyon. Pero, unsa man nga barangay eleksyon nga dili apil-apilan  ug mga politiko? Duna say mo-ingon nga mas maayo nga idungan na lang ang barangay eleksyon sa tuig 2013 kay usa ra ka gasto ang gobyerno.