NewsRecord Weekly Publication

Bantay Banat

Ni Rics Cañisarez

Kawat sa kuryente

Mura mag nauso na karon ning illegal wire tapping. Ato na lang klaruhon, kini mao ang pagpangawat sa kuryente.

Una, ang Barangay Guadalupe nga nasakpan sa mga taga VRESCO nga didto sila nag-tap sa daan nga metro. Ang nakaparat pa gayud kay sulod sa unom ka tuig kini nahitabo usa pa nasakpan nga nag illegal wire tapping ang barangay. Ang gihimo sa VRESCO, ilang gitakdan ug meter check ug didto nahibaloan ang kuryente nga ilang nagamit ug ilang bayranan nga matud pa, mokabat sa kapin sa P 200,000. Maayo lang kay nakahangyo. Maayo man usab ning taga VRESCO, no? Kay pwede rang mahangyo, labi na kon ang natungdan opisyal sa gobyerno. Pero kon sa ordinaryong tawo makahangyo ba kaha?

Ang ikaduha mao ang Barangay Prosperidad. Human nga nasakpan sa mga linemen sa VRESCO kon nakabayad na ba kay ang Barangay Guadalupe hangtud karon wala pa man, kay ang barangay hall ngit-ngit pa man gihapon. Laing barangay pa gayud mao ang Nataban. Ang balita nga akong nahipos, didto kuno sila nag-tap, matud pa, sa daan nga barangay hall. Pila kaha ang ilang nabayad sa kuryemte nga ilang nagamit. Ato unya ning usisaon didto sa VRESCO.

**********

Ngano man usab ning VRESCO nga dili man nila ma-implementar ang balaod sa illegal wire tapping? Kini ra ba nga salaod kon mapamatud-an sa korte, 12 ka tuig ang pagka bilanggo ug P 20,000 ang multa aron motagam na kining mga nagbuhat sa ingon kay murag dili mahadlok. Aron wala nay mangawat ug kuryente kinahanglan tinud-on na gayud sa VRESCO bahala na kon kinsa ni sila.

**********

Karon pa molihok ang taga Engineering Department nga butangan gayud ug limitasyon ang mga paninda diha sa dalan V. Gustilo ug sa uban pa gayud nga mga lugar sa atong dakbayan.                    Tan-awa kay gitinuod na gayud sa taga Engineer's Office, hapsay na kaayo nga tan-awon ang agi-anan sa tawo dili na makabalda ang mga paninda nga anaa sa atbang sa mga tindahan.

Dili ba nga duna tay City Ordinance nga naghatag lang ug bale usa ka metro ang distansya gikan sa pultahan sa tindahan? Karon duna kunoy nagreklamo nga konsehal, iya pa ganing gi-meeting ang mga side walk vendors aron maghiusa nga moreklamo  bahin sa maong ordinansa nga usa ra ka metro  ang gitugot para sa paninda. Dili ba nga usa ka man sa mipirma sa maong ordinansa, Sir? Unsa man diay ka law maker or law breaker?

**********

Nia kunoy barangay opisyal  nga kon mo-apply ka ug trabaho, kinahanglan mohatag ka ug usa ka kanding o dili ba manok para sigurado kang madawat. Hastilan, no? Kon daghan ang bakante sa ilang barangay, daghanang kanding ug manok ang madawat sa maong barangay opisyal. Naa pa ba diay ni karon? Sa kapigaduhon karon ang tawo mosugot na lang aron makatrabaho, maluoy intawon ka, Sir, uy!