NewsRecord Weekly Publication

Bantay Banat

Ni Rics Cañisarez

Skandalo sa sentro

Niay balita nga nagpahipi o gituyo nga gihinago aron dili masayran sa kadaghanan kay ang natungdan sa maong balita anaa man nagtrabaho sa buhatan sa gobyerno nga unta mao man ang magsapupo kon dangpanan sa mga menor de edad.

Nganong gihilom man ning maong balita? Sa mga ginikanan palihug hinuktuki kuno ninyo ning maong balita. Niay usa ka casual nga nagtrabaho diha sa Women's Center sa City Social Welfare and Development Office (CSWDO) nga ang akong pagtawag ani niya 'mapahimuslanon.' Palihug basaha gayud ninyo ni pag-ayo kon ngano nga gihilom nila ning maong balita.

Ang atong kapulisan karon hugtanon gayud sa pagpatuman sa curfew hours sa mga menor de edad nga mulaag bisan pa man sa des oras sa kagabhi-on. Sa mga nadakpan sa mga pulis may mga batang babaye nga didto gi-turn over sa Women's Center sa CSWDO.

Ambot kon unsa ang nakita ni Mr. 'mapahimuslanon' ning usa ka menor de edad kay matud pa sa report gidubdoban man gayud. Nahibalo baya kuno ang labaw diha sa CSWDO. Pero, ang iyang aksyon mao lang ang pagbalhin kang Mr. ‘mapahimuslanon‘ ngadto sa laing departamento.

Syaro, wala gayud gi-impose ang stiff penalty? Menor de edad baya nang iyang gidubdoban. Nganong gibalhin man lang? Kay diay, sa akong nasayran, ang inahan niining mapahimuslanon suno kuno sa labaw diha sa CSWDO. Sa panahon nga akong mahinabi kining maong menor de edad, anhi na ninyo mahibaloan kon kinsa ni si Mr. ‘mapahimuslanon’.

                    **********

Usa usab kuno ka mahuyang nga nag-casual maayo lang kay wala dubdobi ang uban nga menor de edad nga babaye, ang iyang natripan, syempre lalake dili ba? Ang gihilabtan mao ang mga nadakpan nga menor de edad nga mga lalaki. Hoy! Naunsa na man mo diha nga nagpasaway man mo!

Ang report nga akong nadawat nga kini si Mr. tarutot gitang-tang kuno sa trabaho (Dili tingali suod sa labaw diha sa CSWDO ang imong amahan, Mr. tarutot, no? Kay nganong gitang-tang ka man dayon?)

Makaulolaw nga panghitabo diha sa CSWDO. Unsa man wala bay mo-aksyon niini? Inyo lang ba ning patulog-tulogan?

                          **********

Ambot kon nakaabot na ba sa atensyon ni Mayor Ginggo Valmayor kining sentimento sa uban nga casual nga kapin na sa 20 ka tuig nga nagtrabaho diha sa City Hall apan, hangtud karon casual lang gihapon. Maayo unta kuno kon matagaan ug igong pagtagad kini sa halangdon nga mayor tungod kay naa kunoy uban diha nga mga unom lang ka bulan nga nagtrabaho na-regular man dayon. Tan-awon lang nato kon unsa ang mahimo ni Mayor Valmayor tali ini nga sentimento sa mga casuals nga ang uban nangapo na lang pero, hangtud karon casual lang gihapon.

                        **********

Ining umaabot nga eleksyon daghan baya ang naghandum nga mosulay pag-intra sa politika pero nahadlok kay matud nila nia man gud kuno ning tikas (PICOS machine). Bag-o na ni karon imbes PICOS machine tekas machine na. Well, mga amigo ayaw wad-a ang paglaum kay ang senado sigon sa balita nga akong nakalap testingan ang usa sa mga machine nga gamiton sa tuig 2013 nga eleksyon.

                       **********

Ang usa ka punoan sa kahoy makahimo ug minilyon ka palito sa posporo pero, ang usa ka palito sa posporo makasunog ug minilyon ka puno-an sa kahoy.

Dinhi sa San Carlos usa lang ang Newsrecord nga kanunay nga nagbakbak ining polusyon sa San Carlos Bioehtanol, Inc., ang bahong baklag nga nakadaot sa panglawas sa tawo ug sa marine life. Ning bag-o lang ang taga Barangay Punao nireklamo na kay ang ila kunong tubig nga ilimnon apektado na sa kagaw sa tubig tungod sa polyusion sa SCBI.

Ining karon lang sigon sa taho nga akong nadawat ang enrollment sa mga batang nagtungha diha sa eskwelahan atbang sa SCBI nikunhod tungod lagi sa bahong baklag sa SCBI.

Ang akong higala nga tua na karon sa Toledo nagtrabaho, misukmat kanako. Ug matud niya, "Naunsa na man nang inyong syudad uy! Pwerte na man nang baho-a!" Pero, bisan pa man niini nga reklamo sa kadaghanan, ang mga tawong responsable sa SCBI, maayo lang gihapon ang pagkahinanok. Maayo ra unta ug uromon kay dili man maulaw.

Palit unta mo diha sa CD sa Asin, kanang ilang kanta nga "Masdan Mo ang Kapaligiran" aron makamata mo! Dili na kinahanglan ang usa ka palito sa posporo kon dili ang intervention na lang sa atong mga public officials aron mapakgang kining pag-abuso sa atong kina-iyahan gumikan sa walay pagpakabana nianang mga tawo nga nagpaluyo diha sa SCBI.