NewsRecord Weekly Publication

Komentaryo

Dodong Mondragon

Pasi-aw lang

Kasagaran sa tapok-tapok aron sa pagpalabay sa kalaay duna gayuy pasi-aw nga sugilanon nga makapakatawa kanato. Sa daghan nga mga sugilanon, dunay say pasi-aw nga dili lang makapakatawa, kon dili duna say leksyon.

Sa pipila niini, duna koy nahinumduman nga ingon niini nga pasi-aw. Kini usa ka sugilanon bahin sa usa ka bungi. Kini siya usa ka estudyante sa kolehiyo nga sa higayon nga motungha sya sa eskwelahan moagi gayud siya sa dalan nga may tindahan nga diin dunay tulo ka estambay nga mag-atang kaniya.

Kon maduol na siya sa tindahan, mosiyagit dayon kining sila ug "Bungi! Bungi! Bungi!" Ang tawo intawon modungo na lang ug nagpailub luyo sa kaulaw. Ug sa pagpauli na sad niya gikan sa tunghaan, moagi gihapon siya sa maong tindahan ug singgitan siya sa tulo ka estambay, "Bungi! Bungi! Bungi!"

Ingon niini kada adlaw ang iyang madunggan nga pagyaga-yaga sa tulo ka estambay kon moeskwela na siya. Usa niana ka adlaw, sa gaatang ang tulo ka estambay, wala na nila makita ang bungi. Pagka sunod adlaw, wala gihapon kini igkita hangtod ning-abot ang semana, bulan ug hapit na lang matapos ang tuig wala na nila makita ang bungi.

Usa ka adlaw niana, ilang nakita ang bungi nga naglakat sa dalan nga nagsul-ot na kini ug uniform ug nagsalib-it ug armalite ug padulong kini sa tindahan nga ilang gibarugan.

Sa nagkaduol na kini siya nila, gitutukan sila pag-ayo sa mata ug unya gipangutana, "Unsa man ko bungi o dili?" Sa kahadlok sa tulo ka estambay, mitubag sila dayon, "Dili!" Misinggit ang bungi, "Bakakon!" Ug dayong duslak sa kuto-kuto sa usa ka estambay sa sumbohan sa armalite. Naluko kini sa daplin nga nag-agulo sa kasakit.

Ang ikaduhang estambay gipangutana usab. "Unsa ko bungi o dili?" Tungod kay nakita niya ang iyang kauban nga naluko ug nag-agulo sa daplin sa kasakit gumikan sa pagpamakak, mitubag siya sa pangutana, "Medyo bungi-bungi lang ug gamay." Misinggit ang bungi, "Bakakon gihapon!" Ug dayong duslak sa armalite, ug naluko ug nag-agulo na sab sa kasakit ang ikaduhang estambay.

Ug gani giduol sa bungi ang ikatulo nga gidudho na gayud ang nawong nga nangutana, "Unsa man ko bungi o dili?" Nagtan-aw siya sa duha niya ka kauban nga pastilang bun-uga, naglibog siya kon unsay itubag aron dili masuko ang bungi. Sa iyang huna-huna aron dili siya maparehas sa duha niya ka kauban midesider na lang siya nga dili mamakak ug mosulti na lang siya sa tinuod ug ang iyang tubag, "Bungi!"

"Hinawayon!" Ug ang bungi dayong mipaarak sa iyang armalite. Patay ang hinawayon.                    

Ang leksyon niining sugilanon nga dili gayud maayo nga manaway ug mobiay-biay ug tawo kay dili nato mahibal-an ang sangputanan sa umaabot nga panahon.

Laing pasi-aw nga sugilanon akong nakutlo sa usa ka sermon sa pari sa iyang misa. Matud pa niya, adunay maayong tawo nga namatay. Ug tungond kay usa siya ka maayong tawo, nakasulod dayon siya sa langit.

Ug miingon si San Pedro, "Usa ko ikaw dad-on sa imong pinuy-anan, isuroy ka nako sa nagkalain-laing dapit sa langit." Ug sa ilang pagsuroy-suroy, naabot sila sa usa ka dakung bodega. Giablihan kini ni San Pedro ug nanulod sila. Sa dako niyang kahingangha, nakita niya ang pagkadaghan ug nagla-undok nga mga dila sa tawo. Dunay dila nga tag-as, dunay mugbo, taliwis, dumpol, pula, puti, nagkalain-laing hugis sa dila.

Wala siya kapugong sa iyang kahingangha iyang gipangutana si San Pedro. "San Pedro, nganong nangulekta ka man ug daghang dila sa tawo?"

Ug mitubag si San Pedro. "Kining mga dila, dila kini sa tawo nga maayo lang sa sulti, pero ang ilang binuhatan sukwahi sa ilang gipanulti. Tungod kay maayo man lang sila sa sulti, ang ilang dila mao ray nahalangit ug ang ubang bahin sa ilang pagkatawo gilabay sa impyerno."

Ug misumpay pa gyud si San Pedro. "Kalabanan niining mga dila ang tag-iya politiko."