NewsRecord Weekly Publication

Bantay Banat

Ni Rics Cañisarez 

Sugang pula

Sa Metro Manila, kining Red Light District mao kining lugar sa mga babaye nga kundatan kon babaye nga mugbo ug lupad.

Dinhi sa San Carlos, duna sad tay Red Light District pero, dili distrito sa mga babaye nga pula ug wa-it kon dili lugar sa mga mamaligya ug mga isda ug karne. Daghan ang mangutana nga mamalitay nga ngano nga kaniadto walay bisag usa diha nga mogamit ug pula nga sugang dagitab (bombilya) kay matud sa report dili mosugot ang market supervisor apan karon nganong daghan na man diha ang naggamit ug pula nga bombilya?

Sa akong pakisusi sa uban nga tinder sila nag-ingon nga ila kanang gibuhat tungod kay kanang suga nga pula dili kuno mahibaw-an sa pumapalit ang isda kon ang karne  medyo dubok na kay lagi gawas sa kolor nga pula hidhiran pa gayud ug dugo aron kunohay lab-as pa gihapon tan-awon.

Kaniadto gidili kini diha sa merkado pero, karon napasagdan sa atong market supervisor kini nga kausaban. Aron unta maprotektahan ang mga consuming public dapat unta ang atong market supervisor bisag panalagsa lang unta mosuroy pud diha sa lab-asan aron mahibaw-an ang tinuod nga kahimtang. Mahimo ba kaha kini ni Ma'am Estela Mamac?

                        **********

Mi-react man kuno si Mrs. Cynthia Mirande diha sa City Social Welfare Department Office (CSWDO) bahin sa akong nasulat tali niadtong usa nila ka casual employee nga nag among-among sa usa ka menor de edad nga babaye. Medyo nasuko si Mrs. Mirande sa usa namo ka kauban kay lagi matud pa, wala kuno nako siya konsultaha antes ko misulat bahin sa panghitabo diha sa CSWDO.

Uy! Unsa man diay siya doktor nga mangonsulta pa man ko?

Ma'am Cynthia, this is a serious offense. Nganong mo-ingon ka nga imo pa kining imbestigahon? Sa ato pa diay nga karon ka lang mahibalo niini? Kon wala ka mahibalo ngano nga imo man gi-transfer dayon kining maong suspetsado didto sa laing opisina under gihapon sa CSWDO?

Pero, kining mahuyang nga casual pud diha sa CSWDO nga matud pa, gisaksupon ang batuta sa usa ka menor de edad nga lalake nganong napapha man lagi dayon? Kay nabalahuba man, dili ba? Sige, Ma'am kay matud nimo nga imo man gayud ning imbestigahon, padad-i lang unya ko sa mahitabo nga resulta kay murag nangatol na ra ba ning akong kamot sa pagdukdok sa computer aron ibulgar na sa publiko kining ngalan sa usa ka casual employee sa CSWDO nga gi-alegar nga nag among-among sa usa ka menor de edad nga gi-turn over sa atong kapulisan kay nadakpan sa paglapas sa Curfew Ordinance.

                          **********

Maka-ingon tingali kamo nga bias ko pero, sa tinuod lang ang Rizal Barangay Hall  maoy pinakanindot, pinakalimpyo ug kon may idugang kamo nga pinaka, kamo na lay dugang kon makaadto  mo diha sa maong barangay hall. Makita nimo ang ilang health center, multi-purpose nga covered court ug uban nga building sa sulod mismo sa sementadong koral. Kini si Kapitan Paciano Olvido magkalahi kami ug baruganan sa politika pero, sa akong nakita kon gi-unsa niya ang Barangay Rizal, maka-ingon ko nga 'da best' siya kay nahimo niyang modelo ang iyang barangay. Dinhi sa San Carlos, ang Barangay Rizal hitupngan apan, dili malabwan. Alang sa kang kapitan Paciano Olvido, keep up the good work, Kap!

**********

Dakong bentaha sa mga barangay kon ang ilang kapitan dili mga bata-bata sa mga asyenderong politiko. Kay kini gong uban nga kapitan sa barangay nga tuta sa mga asyenderong politiko, syempre ang ilang unahon ang asyenda gayud kay gi-sweldohan man, antes mo-adto sa barangay mosuroy ug molibot una sa asyenda unya pa mo-adto sa trabaho sa barangay alas diyes na. Ang tawo nga may tuyo sa kapitan usahay malibat na ang mata sa kagutom. Tan-awa nang uban nga kapitan nga wala magtrabaho sa asyenda, ma-atiman gayud ang kinahanglanon sa barangay.