NewsRecord Weekly Publication

Pikpik sa Abaga

Ni Henry Sandoval

Sunog!

Mga alas tres pasado sa kadlawon niadtong Hulyo 2, nagsugod ang sunog diha sa dalan S. Carmona. Ang maong sunog miugdaw sa duha ka balay tapad  sa Petron Gasoline Station. Matud pa sa silingan nga mitabang sa maong hitabo dali ra kaayo nga misilaob ang kalayo tungod sad sa mga dapat sa balay nga mga karaan na. Ang usa ka balay ila kang Boy Palomares ug ang usa giabangan ni Madam Ma. Linda Dejecacion.

Apil ang duha ka multi-cab, usa ka owner-type jeep, ug usa ka karaan nga motor ang naugdaw ug apil sa maong insidente. Mga alas kwatro sa kaadlawon nadawat sa Fire Station ang tawag gikan sa usa ka nagpahibalo. Mga alas sais y medya matud pa ni Chief Fire Marshall Jonathan Badel nga na clear ang maong sunog . Mitabang usab ang Chinese Chamber of Commerce Fire Brigade, ang Calatrava Fire Station ug ang San Carlos Bioethanol Inc.

Sigun sa imbestigasyun ni SFO2 Jovencio Rodriguez, fire investigator, ang hinungdan sa sunog mao ang short circuit sa electrical wiring.  Mga P 500,000 ang estimated nga danyos sa maong sunog.

Matud pa ni Badel angayan gayud nga ang matag usa magpakabana ug maglikay sa mga fire hazard kay ang sunog usa sa grabe nga makapaguba sa mga plano sa kinabuhi. Ipa check-up gayud sa usa ka electrician ang linya sa kuryente sa panimalay. Angayan gyud nga magbantay kay pait nga ang mga gipundar sa pila ka tuig nga pagtigom para makatukod ug usa ka balay mahanaw lang daw aso.

**********

Nahulog sa kataw-anan kaning baho nga gisabwag sa kahanginan nga murag hugaw sa iring gikan sa planta sa SCBI. Kasamtangan nga nag-istorya ang casual nga anaa sa buhatan sa usa ka konsehal diha sa City Hall nga kalit lang mimuro ang gatabi kay gatuo siya nga ang usa sa iyahang giistorya ang mipaguwa ug usa ka bomba . Nagtutukay ug kalit lang nga mikatawa kay ilahang nasuta nga ang baho gikan sa ethanol.

Pastilan ang ako sang amigo samtang galakat diha sa may merkado nakadungog sa istorya sa duha ka dalaga nga gasunod niya nga nagkanayon, "Walay batasan ning tawhana nagpataka rag paguwa sa iyahang bomba!" Milingi akong amigo ug miingon nga ang etahnol maoy nanimaho ug dili siya.

Sa way puangod nga baho nga gisabwag sa kahanginan sa planta sa ethanol maalaan ka nga wala kay batasan. Dili ta ka pasangil diri sa siyudad apan daghan ang kaso karon sa ubo sa mga bata ug sa dagko. Sa usa ka komposo nga kanta sa bandang Asin may linya nga ilahang gikanta nga nagkanayon: "Wala ka bang napapansin sa ating kapaligiran; Kay dumi na nang hangin pati na ang ilog natin; Di naman masama ang pag-unlad at malayo-layo na ang nararating; Masdan mo ang tubig sa dagat dati kulay asul ngayon naging itim; Ang mga dumi na ikinalat sa hangin ay huwag na nating  paabutin sa langit; May mga batang  ngayon isinilang may magandang hangin pa kayang   matitikman? May mga puno pa kayang aakyatin?"

Ang kada linya nga gikanta ining grupoha makapahinuklog nato tanan kung angayan ba kitang katawhan magpakabana. Kamo, ug gusto mong dili mahitabo ang mga linya nga gikanta sa grupo nga Asin magpakabana ta.

**********

Linya ug martsa! Mitubag sa hagit sa training ang mga tanod sa dakbayan sa San Carlos. Sila miagi sa makuting pagbansay-bansay ilaulom sa kapulisan sa siyudad aron sa ilang presentasyon niadtong Hulyo 1.     

Sa miaging 52nd Charter Anniversary sa siyudad dili ka makatuo ug dali-dali nga kabansay mo martsa ang mga barangay tanod nato dinhi sa siyudad sa San Carlos. Ang maong Parade and Review gitambongan sa mga dagkong politiko dinhi sa siyudad ug sa Lalawigan sa Negros Occidental. Kauban si Mayor Ginggo Valmayor sa pag Trooping the Line sila si Vice Governor Alvarez, DILG Officer Ms. Custilo, Board Member Rene Gustilo, Police Chief Col. Harold Tuzon, BJMP Officer sa siyudad  ug uban pang mga opisyales sa Sangguniang Panglunsod.

Ang mga Barangay Tanod nga miintra sa Parade and Review gihagu-an kini pag training ni PO3 Fidel Alcuma sa San Carlos Police Station. Matud pa ni PO3 Alcuma hinay-hinay lang nga iyahang gibansay-bansay ang mga barangay tanod hangtud nga may kumpyansa na sila sa ilahang kaugalingon.