Insurance

Bantay Banat

Ni Rics Cañisarez

Kinahanglan nga mo-interbenir na gayud ang atong mga lokal nga opisyales sa siyudad tali ining mga insurance company nga mag-ilis ug pangalan kada tuig. Pangutan-on kon legitimate ba kining mga kumpanyaha. Ubay-ubay na sa mga tag-iya sa mga sakyanan nga nagpa-insure sa usa ka company naniguro gayud aron dili masayang ang kwartang ilang gibayad.

Kini ra bang ubang insurance, laway ug guts, kabalo lang morason pero, kon mahutdan ug rason, mosibat, mawala ug makaloluoy lang ang tag-iya sa salakyan.

**********

Husto gayud kining ilang gi-ingon nga sa politika kuno ang imong higala karon mahimo nang imong kaaway ugma. Sa lungsod sa Toboso sila si Atty. Boldek Tan ug si Engineer Edgar Bartolome mitapon na ngadto sa pundok ni Kapitan Maling Dela Cruz nga mao karon ang kandidato sa pagka mayor sa maong lungsod. Dili na hinuon kini katingad-an kay sa mga kandidato gani sa pagka senador mga kongresista ug mga gobernador mokalit lang ug balitok. Hinuon klaro na ang Toboso nga si Kapitan Dela Cruz ang mopapili sa pagka mayor. Wala pa nato mapiho kon kinsa ang iyang kaatbang.

**********

Pinaka unique ang usa ka mayor sa lungsod nga syudad na karon, kay sa adlaw nga Sabado mag-una pa sa ilang kaugalingon nga asyenda sa tubo uban sa iyang mga tinawo sa ilang asyenda. Kon adlaw nga Domingo tua sa plaza nag-basketball. Sa adlaw nga ting-trabaho kanunay gayud ni siya makita sa City Hall. Bisan pa man sa kina-iya sa maong mayor nga makig sandurot sa mga yanong katawhan wala niya hikalimti ang kauswagan sa ilang lugar. Karon, halos tanan nga dalan sa ilang siyudad sementado na ug iya usab gitutokan ang pag-uswag sa pangabuhi sa katawhan. Tagsa ra kita makakita ug mayor sa usa ka siyudad nga sama niya. Siya si Mayor Rene Gurdiel sa Bayawan City, Negros Oriental.

**********

Wala koy katungod nga paserhan na lang ang SCBI. Kay si kinsa man lang ko? Dili nato paserhan ang SCBI bisan pa man sa kadaku sa halit sa atong environment pero, nakatabang lagi kuno sa atong ekonomiya (matud nila). Buyno, kay nagmagahi man ang SCBI sa pagtubag sa isyu ning bahong baklag nga nasinati na sa tibuok San Carlos, naay akong suggestion. Walay gasto kay dili na man kinahanglan ang mga eksperto nga engineer ug mga technician. Dili na kinahanglan nga moadto pa sa mga sitio o barangay aron mag pulong-pulong.

Simple lang kaayo ang inyong himuon, magbutang kamo ug duha ka check points, ang usa diha sa taytayan sa Calingling ug pag-agi sa sakyanan pahunongon ug taga-an ug mga mask para itabon sa ilong sa mga pasahero aron sa pag-agi duol na sa SCBI dili na sila makapanimaho sa baho nga dili masabtan. Ang usa ka check point nga duol sa Crossing Refugio mao usab ang mohatag sa mga tabon sa ilong sa mga pasahero paingon diri sa siyudad. Sa maong paagi dili na sila makapanimaho sa bahong baklag nga gikan sa SCBI. O dili ba sayon ra kaayo?

**********

On test broadcast na kining bag-o nga FM station diri sa San Carlos. Naa kini sa 89.3 megahertz sa FM band. Dugang na usab nga station sa dakbayan. Mas nindot pa gayud kon dunay mobutang ug AM radio kay masayran sa katawhan ang mga matuod nga panghitabo sa isyudad ug gawas pa ang tawo makapagawas sa ilang mga kritisismo o pagdayeg bahin sa kalihokan sa atong mga public officials.

Sa kapit-os sa kahimtang karon, ang kawad-on sa tawo dili matambalan pinaagi sa musika lamang. Kinahanglan gayud ang usa ka AM radio aron ilang mabati-an pinasikad sa mga public affairs program kon unsay sarang nilang buhaton.