NewsRecord Weekly Publication

Pikpik sa Abaga

Ni Henry Sandoval 

Raid dili sa CNC

Tulo ka balay ang gi-raid sa grupo sa Negros Occidental Provincial Police Office (NOPPO) kaniadtong  Hulyo 13. Ang maong grupo gipanguluhan ni P/Supt. Jefferson Descallar. Ang raid pinasikad sa Search Warrant No. 002-2012 ni Judge Estefanio Libutan, Jr., RTC Branch 50, Bacolod City for Violation of PD 1866 as amended RA 8294. Ang warrant para kang Margarito Broce, Benjamin Perigua, ug Fortunato Cañas. Ang tulo gi-alegar nga adunay M16 Armalite, Carbine, .45 caliber pistol ug mga ammunition.

Si Perigua miboluntaryo  sa pagsurrender sa iyahang.45 kalibre nga pistola nga adunay serial number nga 110457, Colt ug adunay walo ka bala nga sulod ug usa ka ID nga nagpamatuod nga siya usa ka confidential agent sa usa ka grupo sa militar. Ang balay nila ni Margarito Broce ang gisunod sa pag-search ug nasuta nga negatibo kini sa mga gi-alegar nga armas ug ang katapusan mao ang balay nila ni Cañas nga sama usab kang Broce negatibo sa mga armas nga gi-alegar. Aduna usab nakuha nga M16 armalite rifle pero dulaan ug usa ka boga nga pininturahan ug itum.

Nadala usab ang mga armas sa duha ka guardya. Usa ka shotgun ug usa ka X9 pistol. Ang maong mga armas sa guardya pareho nga adunay kumpleto nga papeles apan nalimtan pagdala. Apan matud pa sa in-charge sa Ravenous Security Agency ug  Negros Veterans' Security Agency makuha ra nila ang armas didto na sa opisina ni Descallar sa NOPPO.

Daghan ang nangutana nga nganong gi raid man ang CNC nga eskuylahan man kini. Kay ang miguwa nga istorya ang CNC maoy gi-raid. Ang tinuod ang usa sa balay sa gi-raid anaa sa sulod sa compound sa nahisgutang eskwelahan. Dili ang eskuylahan ang gironda.

Ang uban ug bisan gani ako natingala nga nganong naapil si Cañas nga usa man lang siya ka negosyante ug  kahoy nga anaa ga-abang sa yuta nila ni Mrs. Broce. Sa dihang nahigayunan nako siya sa pagpangutana matud pa niya, "Loyalist man gud ko ni Brutus," maong naapil siya sa maong pagronda.

Ang kaso sa nakuhaan ug .45 kalibre nga pistola na file na didto sa piscaliya niadtong Hulyo 17. Nagka anam ug kalawom ang kaso sa managsuon nga away. Una ang pag take-over  sa duha ka igsuon sa CNC, ug karon usab ang pagronda sa balay sa mga mi take-over.

Unta ni ug dunay mga adviser o mga tawo nga miapil aning away sa managsuon ang kabugnaw unta ang itambag dili ang pagsugnod ug dugang kalayo nga pwede ra mapalong sa maayong panag-istorya. Mahimong makaapil niini ang religious sector kay nailhan kini nga pamilya nga mga relihiyoso ug kanunay nga gasimba. Basin pa nga mahusay sila pinaagi sa inigsuonay nga husay.

Ang tanang bahandi diri sa kalibutan dili madala ug mupauli ka na sa laing kalibutan pero ang pusod nga gasumpay sa inahan dili malalis nga pareho kamog sinumpayan. Mao bitaw nang ang pusod gipakita na sa Ginoo para mahinumduman nato nga sa siyam ka bulan gasumpay ta sa tina-i sa atong inahan. Way katarungan nga dili mahusay basta ibutang sa tunga sa duha ka grupo nga managsuon sila ug walay angay nga bangi-an kun magkaabot sa usa ka huna-huna.

**********

Dia say barangay tanod sa Barangay Punao  nga naghatud ug usa ka summon para papirmahan sa akusado  nasuko nga mibalibad ang akusado nga mag-ilis sa siya nasuko ug milakat balik sa Barangay Hall. Si Jaime Santillan, 58, nagpuyo sa Sitio Ibual, Barangay Punao,  samtang mibalibad usa siya nga mag-ilis usa mopirma sa iyahang summon nga gihatud.

Nasuko ang barangay tanod ug miingon nga, "Suplado jud ka!" Dayun kunong ingon nga, "Sunod unya diri." Mibalik kuno ang tanod sa barangay hall ug sa dihang mibalik gadala na ug batuta dayun bunal kang Santillan ug iya kining nasagang sa walang parti sa iyahang bukton ug may segunda pa nga bunal sa iyahang tuhod.  Nahitabo kini niadtong Hulyo 13.

Naunsa man sad ning tanod nimo Kapitan Abadies nga mamunal man dayun? Ug wala man lay pagsukol ang gi sumonan sa imohang tanod dili angay nga sakiton ang tawo. Dili man siya ang kontra ug angay ra man nga ug mo serve ka ug summon magpakita sad ka sa imohang pasensya ngadto sa mga tawo. Kapitan Abadies saging nga kabilin sa ginikanan ni Santillan ang na involve sa maong kaso ug gani napuril gayud kay ang yuta nga gitamnan dili man iyaha. Wala man gyud gani kuno bisan gamay nga gibayad sa maong bag-ong tag-iya sa yuta.

Paimna na imong tanod ug tambal sa high blood para dili dayun masuko. Parti na sa trabaho niya nga makasugat ug suplado ug but-an nga sumonan. Pero ang pagpanakit sa tawo angay lang na sa mga tawo nga walay nakamahu-an sa iyahang trabaho.