Bantay Banat
Ni Rics Cañisarez
Agosto 15
Ang balita nga akong nasagap gikan sa mga kasaligan
tinubdan nagkanayon nga sa umaabot nga Agosto 15 mahibaloan na kon kinsa ang
mga may kagaw sa politika nga mokandidato sa umaabot nga pinili-ay tuig 2013.
Bisan tinuod wala pa kini sila maka-file sa ilang Certificate of Candidacy
(COC) kay sa umaabot pa man nga Oktubre 1 hangtud 5 ang gikatakda sa filing sa
COC sa tanan nga mokandidato.
Dinhi sa San Carlos, duna ba kahay mosulay nga moparang sa
administrasyon sa congressman, mayor, vice mayor ug sa konsehal? Sa pagka karon
wala pay balita murag mingaw man, tingali nahadlok sa controlled votes o kaha
tungod sa 'tikas' machine mao kini ang ingon nila. Kon wala man gayuy mosulay,
ang eleksyon mingaw pa sa Tirana.
**********
Pastilan baya ning uban nga politiko pagka maayo baya nga
mopasalig. Gamiton ka kon may kinahanglan pa siya kanimo apan sa panahon nga
mabutang na sa pwesto, talikdan ka na.
Kini ang kasinati-an sa usa ka tawo nga karon nag sungko-sungko
na sa tawo nga padul-an aron matabangan siya sa kaso nga iyang gi-atubang.
Kaniadto kunong mi-aging eleksyon sa ilang lugar, siya ug mga kauban gi-aporan
ug mga dekalibreng armas aron manghasi sa mga botante sa bukid aron mobotar sa
kandidato nga ilang gidapigan.
Apan, subo kaayo kay didto sa bukid nadakpan siya sa Phil. Army
ug nakuha-an ug armas nga uzi ug .38 kalibreng paltik. Tungod sa nahitabo,
gikasuhan. Busa iyang giduol ang politiko nga nagpasalig kanila apan, las-ay na
kuno ang tinagdan sa maong politiko ug karon dili na kuno motagad.
Leksyon na kini niadtong pipila nga magpagamit sa mga politiko
nga walay baroganan.
**********
Balit-ad ang nahitabo, kay niay usa ka politiko nga nisa-ad nga
kon siya ang mabutang sa pwesto, tinud-anay gayud nga alagaran niya ang
katawhan. Matinud-anon
gayud si Vice-mayor Virgilio Tan sa lungsod sa Calatrava kay gawas sa iyang
pagka vice-mayor, sa dili pa moadto sa iyang buhatan, sa iyang balay ubay-ubay na ang mga tawong
magpakonsulta. Mao usab sa iyang opisina daghan pa gayud ang mosulod aron lang
mangonsulta sa ilang mga balati-an.
Ako siyang gipangutana kon hasta ba diay ang konsulta nga walay
bayad apil pa sa iyang opisina? Ang iyang tubag, "Kabahin kini sa akong
serbisyo sa katawhan sa Calatrava." Okay ka Doc! May your tribe prosper.
**********
Nia kunoy usa ka eskwelahan diri sa San Carlos nga nanukot ug
tag
P 200 sa mga estudyante sa third year high school para kuno sa
National Career Assessment Examination (NCAE) review kay kon dili kuno
makahatag, dili maka-review.
Pastilan no? Kon magdaghan ang sections sa third year high
school daku usab ang kwarta nga makolekta, dili ba?
Ug labot pa, wala may bayad kon mo-take ang mga studyante ug
NCAE? Ang nakaparat niini kay kon pananglitan mo-undang ang studyante o kaha
mo-transfer nada lang ang ilang gibayad. Aprobado ba kaha kini sa PTA?
Kay sigon sa balita nga akong nasagap, ulahi na man gi-meeting
ang mga ginikanan bahin sa P 200 nga alamutan sa mga studyante. Sakit-sakit
tinuod sa bulsa sa mga ginikanan kining amutan pero kon aprobado man gayud sa
PTA (Patay si Tatay sa Amotan) wala tay mahimo.
No comments:
Post a Comment