NewsRecord Weekly Publication

Pikpik sa Abaga

Ni Henry Sandoval

Kaulaw sa?

Dinha sa  dalan Valdevia atbang gayud sa Merkado Publiko dako kaayo nang gibutang nga "GIDILI ANG PAGPANGIHI DINHI DAPITA." Pero nahimong usa ka dakong yaga-yaga ang maong bill board tungod kay ang mga tawo wala magbali sa maong warning. Maayo pa kaayo mo-posing ug mangihi. Mao sad diha atbang sa paradahan sa mga habal-habal nga wala na gyud hinuoy ulaway kay ug mangihi mupapilit ra diha sa koral nga alambre ug mopasirit way bali ug makita si manoy. 

Apan dili lang kana makita dinha sa mga dalan hasta sad diay dinha sa merkado publiko bisan pa man nga adunay CR nga gihimo ang gobyerno para sa pagpangihi ug pagpatawhay sa imohang tiyan.

Matud pa ni Dodong Panunciar duna pa gayud buluyagon nga magdala ug plastic ug dayun pahipli sa mga haligi ug mupasirit salud ang ilahang gipasirit sa plastic. Maayo unta ug ilabay sa insaktong lugar iwakli ra pud sa mga gagmay nga kanal sa merkado. Wa man sad siguro tay balaud nga makamulta ug madakpan nga mangihi sa kadalanan. Kay ug naa pa unta siguro dili unta ni madugang sa baho sa ethanol nga adlaw-adlaw napanimahu-an nato ang labihan kabaho nga baho.  Maulaw baya ta aning baho nga bisan asa na lang sulok sa San Carlos manimaho.

Diay linya sa awit nga "Dakbayan San Carlos Mahal Ko" nga gusto nakong ipukaw sa mga katawhan sa siyudad:  

"Gasa sa diyos, bahandianon mong yuta:

Dagat, bukid ug sapa,

Mga anak mo makapahimulos.

Mahalon ug ampingan,

Angay panalipdan,

Ug ang imong kinaiyahan,

Itagana sa kaliwatan!"

Na mao nay mga linya sa atong siyudadnong awit nga murag komposo kini ni Kagawad Lasco sa Barangay II.

Unsa pa may itagana nimo anang mga sapa, labi na ang dagat nga ug moariya na atong planta sa ethanol moagi ug gagmay mga kanal padulong sa kadagatan? Ug matud pa sa usa ka trabahante sa Mayor's Office nga naatol sa pagbul-og sa pula nga hugaw gikan sa planta nanunga ang mga isda ug mihigop ug hangin nga mabuhi sila. Unya pun-an pa unya nato anang mga maulawon nga mangihi ra bisan asang daplina.

Asa pa man unya ta dapita makahangap ug hangin nga tawhay ug limpyo nga hanggapon? Unsa pa man unyay atong itagana sa kaliwatan nga umaabot?

**********

Usa sa mga programa sa gobyerno ang Government Internship Program (GIP). Kini matud pa para sa mga batan-on nga matabangan nga maka trabaho samtang naka standby pa sa pagpangita ug trabaho. Nagsugod ang maong programa sa tulo ka Orientation Program usa kini sila misulong sa usa ka trabaho sa mga barangay.

Usa sa mga grupo sa mga kabatan-onan nga na prioridad sa mga trabaho mao ang grupo nga PYAP. Ang kalipay na resulta sa kabalaka sa mga batan-on nga sa dihang sa ilahang pag-undang aduna nay miguwa nga istorya nga pipila lang kuno ang masweldohan ug dili pa gayud ma insakto sa adlaw nga ilahang gi-trabahuan. 52 ka adlaw ang ilahang trabaho ug gipahibalo sila nga maka sweldo sila ug tag P270 matag adlaw. Bagtas sa kabukiran ug sa patag ang 300 ka mga batan-on nga nanrabaho.

Ang tanan nag expect nga  sa tag P 270 ang adlaw sa 52 ka adlaw may dawaton sila ug bali P14,040 nga sweldo. Nabalaka ang myembro sa PYAP nga 50 ka buok kay sa ilahang pag meeting mahimo kuno nga dili na kanang kwartaha ang ilahang madawat. Maayo na lang unya kuno ug duna silay madawat nga P4,000.

Matud pa sa usa nga akong nahinabi nga ug dili motupa ang ilahang sweldo nga insakto sa adlaw nga ilahang gitrabahu-an ilahang dad-on ang ilahang kawsa sa kadalanan para madunggan ang ilahang agrabyo sa ahensya nga responsable.                           

Matud sa akong nahinabi hinayhinay ra ba nga nahilom ang maong isyu ug nahadlok sila nga dili mao ang ilahang madawat. Aduna silay nakuha nga impormasyun nga sa Agosto 3 sila makadawat sa ilahang hinaguan. Hulaton na lang na namong adlawa usa mi muhatag sa among komentaryo.