NewsRecord Weekly Publication

Bantay Banat

Ni Rics Cañisarez

El or no el

Usa ka balaodnon nga giduso ni Senador Bong Revilla didto sa senado nga ang barangay election idungan sa Presidential Election sa umaabot nga 2016.

Wala pa hinuoy siguro kon makalapos ba kini kay kon idungan, matawag pa ba kini nga non-political? Ug labot pa nga ang termino sa mga barangay officials mosobra pa hinuon sa termino sa congressman, gobernador, mayor, ug mga konsehal kay silang tanan unom ra man ka tuig ang pagpungko sa katungdanan usa mag-eleksyon na pud.

Ang unom ka tuig nga pagserbisyo taas na kaayo sa mga barangay officials nga wala gayuy nahimo sa ilang barangay kon dili pangurakot lang sa kaban sa gobyerno. Malipay ni sila nga ma-extend ang ilang termino aron magpadayon ang ilang malipayon nga adlaw sa pagpahimulos sa salapi sa katawhan pinasikad kunohay sa mga proyekto sa barangay nga laban lang ang pangawkaw. Kinsa lang kaha karon ang kapitan sa barangay nga dili mangurakot sa kwarta sa gobyerno? Kon duna man gayud, kining tulo ka tuig nga termino mubo lang kini para kanila kay sa usa ka gatus ka mga kapitan sa barangay tingali 10 porsyento lang ang dili kurakot.

**********

Kining barangay kapitan sa Ilaya, sa lungsod sa Calatrava sa dihang akong nahinabi nunot ning isyu nga akong gisulat may kalambigitan sa pipila ka mga anomalous transaction sa iyang barangay. Dili ba hukos-pukos ang hitabo kay ang barangay migahin man ug mga P40,000 para kunohay sa road maintenance nga wala may karsada ang Sitio Kawa-kawa padulong sa Manganese?

Naa say Palaro nga dula sa basketball nga wala may nakita nga mga basketball player. Pipila pa lang kini sa mga kwestiyonable nga transaction ug daghan pa ang moabot nga buot nakong ilad-lad dinhi sa Bantay Banat.

Tungod niini misaad si kapitan nga moanhi siya ug dad-on niya ang mga dokumento ug mga papeles nga kuno legal ang iyang gibuhat. Napupos na lang ang semana wala gayuy kapitan sa Ilaya nga mipatim-aw.

Unsa man, Kapitan, may gitago ka?

Inay nga mosa-ad nga dad-on niya ang mga kalig-unan, nang hagit pa hinuon nga dugangan ang akong banat sigon sa akong nahibalo-an tali sa pipila ka hukos-pukos nga transaction diha sa iyang barangay.

Ayaw ug kabalaka kapitan kay naa pay mosunod nga isyu pero, ang daku nga balita nga paabuton sa taga Calatrava mao na ang summon gikan sa Ombudsman nga patubagon ka. Daghan ra ba diha ang nag-ingon nga maayo gayud nga tinud-on aron masampulan.

Sige lang kapitan himuon lang usab namo ang among mahimo. Paabuta lang.

**********

Dili ka una namo alang-alangon, Kapitan Elvis Carmelotes, kay kanang imong gibuhat nga hukos-pukos diha sa inyong barangay ug sa panahon nga mahuman na namo ug utingkay ang mga dokumentos nga magpakita nga supak sa balaod nang imong pag suyop sa kwarta sa gobyerno, pinaagi sa maanomaliya nga transaction, anhi ka na tingali makatilaw ug dili lalim.

Sigon pa sa pipila ka sakop sa Sangguniang Panlalawigan nga akong nahinabi didto sa Provincial Capitol nga sa panahon nga makita ug mapamatud-an nila nga may anomaliya ang paggamit sa kwarta sa inyong barangay, mao na tingali ang panahon nga maka-ingon ka nga tabangi intawon ko ninyo.

Timan-i kapitan nga dili ka ra kapitan sa usa ka highly urbanized city ug ang may katungod sa pag palagpot kanimo ang atong mga Sangguniang Panlalawigan. Ug sa mga Ilonggo pa, Kapitan, mag halong gid sa pag-uyat sang kwarta sang gobyerno.