NewsRecord Weekly Publication

Pikpik sa Abaga

Ni Henry Sandoval

Letter

Adunay kisaw sa mga kanhi barangay kapitan ug ang ubang kapitan hangtud karon sa Lungsod sa Calatrava mahitungod sa Tracer Letter sa Commission on Audit, Special Services Section, Special Audit Office. Kini mahitungod sa Priority Development Assistance Fund (PDAF) ni Congressman Julio Ledesma IV.

Kining kwartaha nagbalor ug P 10 M ug gi-request kini sa Nab-Cor  ug gi gahinan kini sa PDAF ni Congressman Ledesma sa maong kantidad. Ug gikan sa record sa Nab-Cor, naggahin ug kwarta ngadto sa Kabuhayan at Kalusugang Alay sa Masa Foundation Inc. (KKAMFI) para sa pagpanghatag sa mga barangay dili lang sa Calatrava kun dili sa unang distrito dinhi sa Negros Occidental ug usa ka Livelihood Kit Volume I-V.

Mao kini ang naka paukay kay ang gihisgutang tuig sa pagpanghatag dili na man sila mga barangay official ug labot pa gyud wala sila kadawat sa maong Livelihood Kit nga karon gisubay sa taga COA.

Ang ikaduha nila nga reklamo nga ang mga pirma labi na sa usa ka kanhi barangay kagawad nga nahinabi sa akong kaubang si Rics Cañisarez dili kuno iyahang pirma ug ang ka tunga sa mga tawo nga gisulat alang sa Barangay Agpangi dili taga dito.

Kani nga mga Livelihood Kit gipanghatag, sigun sa sulat sa COA, sa mga bulan sa Hulyo hangtud Disyembre 2009. Ang mga kapitan sama didto sa Barangay Refugio ug Patun-an mibalibad nga wala gayud sila kadawat sa maong Livelihood Kit nga gi-distribute kuno sa KKAMFI. Ang Barangay San Isidro nga bag-o ug kapitan miasoy kanako nga nakadawat siya ug mga libro atong bag-uhay pa siya nga mipungko sa pagka kapitan sa maong barangay.

Para maklaro ang maong isyu among gihangyo among kontak sa opisina ni congressman dinhi sa San Carlos nga mahinabi namo si Marton Cui  sa iyahang opisina. Mga alas otso sa gabie nga nakahigayun mi paghinabi kang Cui sa maong problema sa mga kapitan sa Calatrava.

Matud pa niya, sa dihang amo siyang gipangutana miingon siya nga tinuod na kini ug gani bag-o lang si Sangguniang Bayan Era sa Calatrava nga mi-refer pud sa maong problema. Apan matud pa niya nga nakahibalo na siya sa mga mulo sa mga kapitanes dili lang sa Calatrava apil na sa tibuok distrito. Iyahang gipakita ang sulat nga nadawat usab ni SB Era gikan sa COA. Didto among nakita nga hasta na si Kapitan Sadi Gadiane ug Kapitan Mahinay sa Ermita anaa usab sa maong nakadawat kuno sa livelihood Kit. Ug walay labot sa Livelihood Kit aduna pa gayuy 750 ka seedlings sa rambutan ug 850 ka seedlings sa mangga.

Matud pa ni Cui niadtong milabay nga fiesta sa Bagonbon gipatapok ni Kapitan Chan sa ilahang balay ang uban nga kapitan sa Calatrava ug mga kagawad sa ilahang barangay. Ug giingnan sila ni Cui nga ang reply form nga attached sa maong query sa COA iyahang gipabutangan ug notation nga "wala mi kadawat sa maong mga items ug ang pirma nga anaa sa sulat dili among pirma." 

Ug miadtong milabay lang nga semana iyahang gitawgan ang opisina sa Nab-Cor sa maong problema.  Pagka sunod semana  nahiabot ang tulo ka personnel sa Nab-Cor ug mihangyo kini ug tabang kaniya. Iya pang gipangutana kung diin sila mokuha sa mga ngalan sa tawo nga gibutang sa maong papel. Matud pa sa taga Nab-Cor sa Internet kuno. Mibalik ang tulo sa Manila nga wala gyud kuno makadawat ug tabang kaniya. Dugang pa ni Cui, ang tanan nga komunikasyon nga gikan sa opisina sa adunay selyo nga nagpamatuod nga original kanang sulat nga gikan sa opisina sa congressman.

May namatikdan lang mi sa sulat nga nadawat sa duha ka kanhi kapitan sa Calatrava. Ang usa gikan sa NLDC ug ang usa gikan sa Nab-Cor. Ikaduha nga ang sulat nga nadawat sa SB sa Calatrava may sulat nga gikan sa House of Representative nga dili selyado ug walay pirma sa tawo nga nagsulat.

Unsa na man ni. Hain kayha ang tinuod sa duha ka sulat? Ikaw Kapitan Sadi, kahibalo ka ani?

**********

Bodol-bodol ang ilad nga hi-tech.

Ako hapit mabiktima aning mga tawhana. Nanawag nga kumpleto sa detalye. Kaila sa ngalan sa akong igsuon sa guwa. Kaila sa ngalan sa iyahang bana ug diin naka station ang akong brother-in-law ug unsa iyahang rangko. Kaila siya sa myembro sa pamilya namo. Hapit nako maprenda ang titulo sa balay sa akong Mama kay natirohan lagi ang bana sa akong magulang. Ug dili maka istorya akong magulang kay na shock sa maong hitabo. Kinahanglan ug P80,000 para madali pag-opera ang bana sa akong magulang nga miiskapo gikan sa Amerika padulong dinhi sa Pilipinas.

Ang akong igsuon nga nakabantay nga bodol-bodol na maoy naka pamata nako sa ilad gayud unta nga mahitabo.

Ang akong amigo nga ang igsuon seaman nanawag kuno sa iyahang igsuon nga babaye nga magpadala ug bali P 5,000 worth nga card sa cellphone nadali gayud. Nakahulam ug ipadala kay iyawat n alang kuno makaginansya kay mahal iyahang baligya sa mga card sa iyahang kauban nga seaman. Pagka gabie nga gitawgan nila ang maong number dili na motubag. Didto nakahibalo dayun sila nga ilad na to.

Ngano maning mga tawhana nga maayo man kaayo ug detalye sa pamilya nga ilaronon nila? Dili kayha ang sniper ani taga dinhi ra usab sa San Carlos?

Ug madakpan mo, Dong, may na lang mong lat-an sa kaldero sa Indian nga gabukal sa kadaghan na sa tawo nga inyong gibiktima.