Usbaw sa pensiyon

Bantay Banat

Ni Rics Cañisarez

Kinsa man gud ang dili malipay nga mga pensiyonado sa Government Service Insurance System (GSIS) kay sugod sa bulan sa Enero tuig 2013 ang ilang pensiyon pasaka-an na.

Sigon ni Robert G. Vergara, ang presidente ug general manager sa GSIS nga gi-aprobahan na ni Presidente Noynoy Aquino ang umento sa minimum monthly benefits para sa mga old age and disability pensioners sa P 5,000 kada bulan. Sa samang higayon kadtong mga pensioners nga nagdawat ug mobo pa sa P 5,000 kada bulan, sugod sa tuig 2013 makadawat na sa minimum. Kadtong nagdawat ug kapin sa P 5,000 hangtod P 8,000 hatagan ug extra nga bale P 200 ang bulan.

Sigon sa kang Vergara, bisan pa man sa maong usbaw sa minimum pension, ang GSIS magapadayon sa pag-apply sa 1.5 percent increase on old-age benefits sigon sa ginbut-an sa board resolution nga na-aprobahan niadtong Desyembre 2009.

**********

Ni-ay usa ka barangay kapitan nga angay gayud moatubang sa iyang mga tawo sa iyang lugar kon gi-unsa niya pag gasto ang kwarta sa barangay. Wala bay nakatambag ning maong kapitan? Naka-ingon ko niini kay pastilan kon malili-an ni sa Ombudsman ambot lang kay para nako mamuti ka gayud sa bilangguan, Kap! Sa mga tigbasa lang niini nga mantala-an, Kap, morag dili na ka kalusot.

Niadtong Desyembre 2010 ang Barangay Ilaya sa lungsod sa Calatrava mi-release ug kwarta nga balor P 30,000 ug ang ikaduha nga release mikantidad ug bale P 39,100 para kunohay sa road repair. Sigon sa akong nahinabi nga taga barangay Ilaya, wala kuno makakita ang mga residente ug tawo nga nagtrabaho sa kalsada.

Niadtong Hunyo tuig 2011 dunay mga 20 ka tawo nga gipaubra para gihapon sa road repair sa Sitio Kayawkaw paingon sa Sitio Manganes nga ang gi-release nga kwarta sa barangay mga P 40,000. Ang tawo nga nag-ubra kuno matud pa, tag P 100 ang adlaw. Unya ang katingad-an kay wala gayuy dalan nga nag-angto niining duha ka sitio.

Unsa man sad ning uban nga kagawad diha kagaw lang? Ni-adtong Hulyo 1 hangtud petsa 20 laing P 40,000 ang gi-release sa barangay para kunohay sa road repair gikan sa Sitio Santillan padulong sa Kabulihan, laing 20 ka tawo na usab ang gipatrabaho sa tag usa P 100 adlaw.

Laing P 39,000 ang giduga sa barangay para kuno sa Palaro 2011(Sadya-a gud!) kay 25 man ka adlaw nga basketball tournament. Pero, unsa gud ning dula-a, Kapitan kay wala may team nga nakit-an sa katawhan nga nagdula! Unsa man ning inyong lugar, Kapitan, hasta ba ang mga tamawo modula ug basketball? Makaabot ni didto sa Ombudsman, ulbo gayud ning imong kaspa ug ako pa nimo mag shampoo ka na lang daan Kapitan Elvis Carmelotes.

**********

Karon pa gayud mahitabo kining kaguliyang sa bugnong lugaynon sa lungsod sa Calatrava nga ang kandidato sa pagka mayor duha ug duha usab sa pagka vice mayor. Si Vice mayor Virgilio Tan nga mao ang vice mayor karon, atbangan ni SB Member Dick Dedicatoria karong 2013 nga pinili-ay.

Sa akong paghinabi kaniya, siya mi-ingon nga wala nay makapugong kaniya nga mokandidato sa pagka vice mayor (Wala na bay maka patch-up sa duha?) ug akong gipaminaw ang tanan niyang gisay-say kon ngano nga desidedo na gayud siya.

Ako usab nga gihinabi si incumbent Vice-mayor Virgilio Tan kon unsa ang iyang reaction sa giluwatan pamahayag ni Dedicatoria nga andam na siya nga moparang karong 2013 sa bugnong lugaynon. Ang tubag ni vice mayor nga, "Sa bagay, we are in a free and democratic country. Busa akong respetohan ang desisyon niya nga moatbang kanako."