Kaulaw sa?

Pikpik sa Abaga

By Henry Sandoval

Walay gi arang ang atong kapulisan sa San Carlos kung adunay mga report nga dunay illegal nga mga lihok nga gihimo sa kabukiran ug dinhi sa siyudad.

Usa ka ehemplo ang nahitabo sa Sitio Sowa, Barangay Quezon. Sa kabukiran gidakop ang oling nga atua nahimutang sa maong dapit. Bali 210 ka sako nga oling ang naimbargo sa kapulisan tungod sa paglapas sa Section 77 of P.D. 705 as amended. Ang mga oling nakuha gikan sa propriedad nila ni Apolinario Gacang, lumad sa maong sitio, ug nakuhaan ug 65 ka sako, Asuncion Fajardo, taga Sitio Burlad, 70 ka sako, Asuncion Fajardo Pansoy, Sitio Burlad, 60 ka sako, ug Renato Eredera, taga Sitio Habuyo, 26 ka sako nga mga oling ang nasaktmit. Ang mga sinako nga oling nga mi suma total ug 210 ka sako gipalit kini ni Fortunato Canas, taga dalan Carmona, niining siyudad.

Nadala ang 210 ka sako dinha sa istasyon sa atong kapulisan. Ug sa maong pagimbargo sa maong mga oling, naabot ang maong kaso sa Department of Environment and Natural Resources (DENR).

Dako nang hasol sa buyer sa maong mga oling kay dili tiaw-tiaw ug mudakop ang atong kapulisan. Muatubang gayud siya sa insaktong lugar ug diin mapunta ang maong violation. Laliman ba gud ka nga ang balor sa maong sinakong oling mokabat ug

P 37,850. Ug mapamatud-an nga illegal ang pagpangumpra ug oling samot pa gyud ang problema. 

Nakadawat ang respondent nga si Canas ug notice of hearing gikan sa DENR niadtong bulan sa Mayo nga nagpahibalo kaniya nga aduna silay hearing sa DENR, CENRO, San Carlos City.

Didto sa maong hearing gi establisar ang mga facts sa maong kaso. Didto nahibaw-an nga si Canas 20 na ka tuig nga ganegosyo ug pamalit ug oling didnhi sa siyudad sa San Carlos. Didto sa maong hearing nang guwa ang mga ebidensya kung unsa ka lehitimo ang iyahang negosyo sa oling. Ug tungod sa mga ebedensya nga gipakita niya ang 210 ka sako gi-release sa order ni Renato M. Sabinian (Pre-Seizure Hearing Officer-Designate/Chief Forest Management Sector) ug gi-conform kini ni Andres T. Untal, CENR Officer.

Na-release ang maong mga sako sa oling sa kustodiya sa Police San Carlos kaniadtong milabay Hulyo 21. Walay kulang ug walay sobra ang oling nga giuli didto ni Canas. Apan bisan pa man nga nauli ang iyahang oling ning hatag kini kaniya ug dako nga kahasol. Kay matud pa niya wala siyay tarong tulog tungod kay daku-dako sad nga kantidad ang na apil sa maong mga oling.

Mao nang kanang uban nga nagnegosyo ug oling paninguhaa gyud ninyo nga ug mupalit mo ug oling sa kabukiran kumpleto ang inyong papeles. Kay ug wala madoble ang inyohang problema.

**********

Maayo unta ug maka pasar ug ordinansa ang atong Sangguniang Panglunsod mahitungod aning mga motor nga hilabihang sabaa ug mudagan na sa dis oras sa gabie. Bisan pa man gani ug adlaw madistorbo ka sa kasaba sa andar sa ilahang motor. Gipangkuhaan ug silencer ang ilahang tambutso di ka kasabot ug para gyud unsa nga kuhaan man. Kani nga reklamo sa mga residente dugay na kini.

Dili ba kayha kini mahimong dakpon sa pulis ang mga motor nga hilabihang sabaa gyud? Ug dili ba kayha dili ma isyuhan ug mga renewal sa LTO kung walay silencer ang motor. Ug dunay masakiton matiwas tungod sa kakusog sa andar. Ang panawagan sa mga ahensya sa gobyerno nga unta ila kining mahatagan ug pagtagad kay hasol kini sa mga tawo nga nahikatulog na sa kagabhi-on.