New frat?

Bantay Banat

Ni Rics Cañisarez

Naa koy nasagap nga impormasyon nga diha kuno sa Sitio Maraguos, Barangay Nataban kini kunong bana sa usa ka maestra mao kunoy nagmugna aning grupo-grupo sa mga estudyantye nga nagpangidaron ug siyam hangtud onse ka tuig. Ang mga ginikanan nabalaka kaayo tungod kay kining mga bataa may mga armas na nga kutsilyo.

Unsa man kini mga fraternity na usab? Murag kuyaw na kini da. Wala ba makapanimaho ang school principal niini? Unsa man usab ning bana sa usa ka maestra, myembro ba usab kini siya sa usa ka fraternity dinhi sa San Carlos?                               Hoy, kon kinsa ka man ayaw baya intawon i-umid kanang mga bata diha! Kon gusto kang mokaon ug kalayo ikaw lang ayaw ug tun-i ug kabuang kanang mga bata

**********

Kon dili masulbad ning pagkawatak-watak sa pundok sa United Negros Alliance (UNA) karong umaabot nga Agosto 29, mahinayon gayud ang engkwentro nila ni Gobernador Freddie Maranon ug Bise-gobernador Genaro Alvarez, Jr. Daghan ang nag-atang niini.                                 Ang akong nasayran nga kon dili pa gayud mahusay ang duha ka mga politiko nga nag-ambisyon nga modagan pagka gobernador, duna pa kunoy usa nga moapil usab sa ilang duwa.

Kinsa kaha kini siya? Kon mahitabo, ma-three cornered fight ang bugno sa pagka gobernador sa lalawigan sa Negros Occidental.

**********

Ang priviledge speech ni Calatarava Sangguniang Bayan Member Dick Dedicatoria niadtong ilang regular session, Agosto 13, mao karon ang gitutokan sa mga Calatravanhon.

Sa yanong pulong supak siya nga mohulam ang lungsod ug bale P15M sa bangko aron ipalit ug surplus nga heavy equipment ug unya ang mag-abaga sa bayranan sa maong utang mao ang mga yanong lungsuranon.

Aron ninyo mahibaloan ang tanan kon nganong supak si Dedicatoria niining pagpangutang sa Lungsod sa Calatrava ug minilyon, palihog lang ug basa nianang mga kopya sa priviledge speech niya kaniadtong Agosto 13 nga gipakatap na karon diha sa Calatrava.

Sa akong paghinabi sa kang Mayor Araceli Somosa, matud niya nga nag-apply sila ug loan sa bangko nga bale P15 M para ipalit ug surplus nga heavy equipment aron gamiton sa pagtrabaho sa mga dalan sa kabukiran.

Ako siyang gipangutana kon nganong surplus man ang paliton. Matud pa niya nga kon bag-o kuno ang paliton modangat ngadto sa P 25 M ang magasto.

Dugang nako nga pangutana ug kon nganong gi-atol man nga nagkaduol na ang eleksiyon ug basi dunay magduda nga gamiton nila ang kwarta sa kampanya. Matud pa usab niya nga karon kuno siya na man gani ang gipangutana sa mga tawo kon kamusta na man ang iyang saad nga buhatan niya sila ug mga dalan ang kabukiran. Ang iyang tubag sa katawhan, "Dili na magdugay matuman na."

Laing pangutana ngadto kaniya, "Tinuod ba nga may awto nga ihatag ang supplier sa surplus ug walay labot sa 10 porsyento?"

Iyang tubag, "Sukad ko nagpungko bilang mayor sa Calatrava, wala koy gidawat bisag usa ka daku nga commission ug kana mga pagduda lamang tungod kay nagkaduol na ang eleksiyon."

Ang ako lang kay pulos man nato suod kining duha, sa panahon sa kampanya plataporma de goberno lang ang iplastar sa katawhan.

**********

Sa nag-anam nga pagkapupos sa mga inadlaw sa katuigan, dili lang hibaw-an nga saulogon na usab namo sa NEWSRECORD ang ika 27 ka tuig nga anibersaryo. Busa, ang kinatibuk-an nga puwersa sa NewsRecord makinasingkasingon nga magapasalamat kaninyong tanan sa pagsunod ug pagsuporta sulod sa 27 ka tuig na nga pag-alagad sa katawhan. Ang Kahitas-an na maoy among katambayayong ug hinungdan nga kami ani-a gihapon andam nga moalagad sa katawhan.

PANGINBULAHAN SA NEWSRECORD SA IKA-27 KA TUIG NGA ANIBERSARYO!