Mga aso sa katilingban

Pikpik sa Abaga

Ni Henry Sandoval

Dili na ti-aw ang mga panghitabo karon dinhi sa siyudad sa San Carlos. Dili lang to dugay nga may gitulis patay didto sa may Puso Tres, Barangay Guadalupe. Ang hinungdan mao ang pag-interes sa mga tawo nga dautan sa pagkuha sa kwarta sa ilahang biktima.

Tungod tingali kini sa kalisod na sa panahon nga ang uban gusto na lang mohimo ug dautan para makakuha ug kwarta sa uban para ibuhi sa ilahang mga pamilya. Apan dili man sad gayud ka magdugay kay sa higayun nga mobuhat ka ug dautan mosingaw nga murag aso nga dili gayud nimo matago moguwa gyud.

Usa sa mga nag tulis-patay atong usa ka negosyante diha sa may Hacienda San Jose nadakpan sa kapulisan ug anaa na karon sa mainit nga lugar, naghimas ug mabugnaw nga puthaw. Duna pa gayuy wala madakpi, matud pa, nga master mind sa maong tulis apan nailhan na kini siya.

Uy, dong, asa man ka padulong nga bisan unsa kataas sa prosisyon mubalik gayud na siya ug simbahan? Sama sad nimo nga wala pa madakpi, asa man ka human unya magasto nimo ang kwarta nga imohang nakuha sa inyong gipatay? Magka anam ug ka gamay ang imohang lugar nga gituyokan kay lahi ron ang mga pulis nato maminaw ra inug ka taud-taud mobuto ra ka. Paglipay sa kay sa mabugnaw nga puthaw na ra ba ka padulong.

Niadtong milabay nga Agosto 16, diha sa may dalan H.C. Rigor, usa ka 12 anyos nga bata ang naghulat ug salakyan kay lagi muadto sa balay sa iyahang magulang sa Tibucong Dako kon Purok Molave kay fiesta lagi.

Mga alas sais pasado na sa kagab-ihon nga may miaging usa ka motor pasahero-an ug kini iyahang gipara ug dayun niyang sakay padulong unta sa Tibuko. Sa ka dako niyang ka tingala nga didto man padulong sa may Galicia ang motor nga iyahang gisakyan. Isog kaayo ang driver ug matud pa sa iyaan nahadlok intawon nga muambak sa motor ang bata kay basig maunsa siya. Diha siya gihunong sa may kampo ug didto gisulod ang 12 anyos nga bata.

Saysay sa iyaan gihubu-an ang bata apan wala malampos ang iyahang tuyo kay bisan unsaon sa salbahis nga driver dili man gyud mahimo kay bata pa lagi.

Ang ako lang nabiliban sa kaisog sa maong driver kay gihatud pa niya ang bata sa balay sa iyaan didto sa Tibuko.  Wala dayun mulakat ug naminaw pa ug ang bata mitug-an ba. Sa dihang nakamatikod nga nagubot ug kalit mipabulhot sad dayun sa iyahang motor nga wala gyud maapsi sa naggukod. Naghilak pag-ayo ang bata nga gidala sa Police Station.

Ug lagi sa ako nang giingon nga walay aso nga makumkum nailhan, ang motor nga iyahang gisakyan nahibaw-an gayud ug si kinsa ang gamaneho ug suwerte gihapon ang manyak nga dako kay sa pagresponde na sa kapulisan nakalakat na kuno. Ug ang asawa sad mibalibad nga wala siya kaila sa tinuod apelyedo sa maong giila niyang bana. Madahan sad may anak namo?

Pero asa man na siya padulong adto ra gihapon na sa mabugnaw nga puthaw, kay kuyaw siyang klase sa linalang, manga-on ug sagbot nga linghod.