Sulundon

Bantay Banat

Ni Rics Cañisarez

Sulondon gayud nga public servant kini si Interior and Local Government Secretary Jesse Robredo kay sa siya pa ang mayor sa dakbayan sa Naga, Bicol Region, iyang gihimo ang tanan kutob sa iyang masarangan hangtud nga ang Naga City naila sa tibuok kalibutan nga most progressive city ug tungod niini, nahimo siyang most outstanding mayor of the Philippines. Lahi ra gayud kon ikompara si Robredo sa uban nga mga public officials kay kon mosuroy nga motan-aw sa mga proyekto sa siyudad, makit-an siya nga maglakaw nga musok-sok lang ug T-shirt nga magtsinelas nga motimbaya sa mga tawo.

Sa dihang natudlo siya nga secretary sa DILG mosakay lang ug bus pauli paingon sa Naga. Uban pa ni siya nganong mosakay man ug bus nga duna may eroplano? Ang ilang balay dili kang katuo kay ordinaryo ra gayud. Ang uban diha nga nagkupot ug taas nga katungdanan ang balay mura na ug mansion. Sa ato pa, si Robredo dili kurakot nga matang nga public servant. Niining kalit nga kamatayon niya, dili kalikayan nga daghan ang nahisagmuyo ug nag-ingon nga daghan man dihang mga public officials nga buloyagon ug mapahimuslanon pa gayud sa salapi sa gobyerno apan wala pa man kuhaa sa Kahitas-an.

Naa pa gayuy gibilin nga legacy si Robredo nga angayan gayud nga sundon sa mga politico. Sa iyang 19 ka tuig nga panerbisyo agig mayor sa dakbayan sa Naga, walay paryente, igsuon o kaha miyembro sa pamilya nga may pwesto sa sulod sa City Hall. Sulondon gayud nga pagka public servant. Nganong siya pa man ang gi-una?

**********

Sa ako nang nahisulat nga makigkita kanako si Barangay Kapitan Elvis Carmelotes sa Barangay Ilaya, Calatrava aron mopakita ug mga papeles aron pagmatuod nga legal kuno ang pama-agi kon ngano nga ingon niini ka dakong kantidad ang na-withdraw gikan sa bangko para sa iyang mga proyekto sa barangay.

Bitaw kapitan tinuod kana, kon walay pagtugot ang mayoriya sa mga kagawad nga ang kwarta gamiton para sa proyekto mapurnada ang imong plano. Sa akong bahin may gitago gayud si kapitan kay hangtud karon walay Elvis Carmelotes nga mipakita. Inay nga tubagon niya ang isyu sa korapsyon nga iyang nahimo sa iyang barangay, sa iya tingaling kalagot, nagsige hinuon ug firing (pabuto sa iyang .45 kalibre nga armas diha kuno sa Ilaya).

Maayo ka man diay mogunit ug armas, kapitan. Unsa man, Kap, may lisensiya ba kana? Tingali baya ug mahutdan ka sa bala ayaw ug kalimot nga daghan diha sa Shooters ug nakahibalo ko, kapitan, kon kinsa sa mga kapitan diha sa Calatrava ang may lisensiyado nga armas kay may lista ko kon kinsa ni sila. Kon magka problema ka parte sa isyu sa pangurakot sa salapi sa gobyerno atubanga, ayaw dugangi ug lain nga problema kay basi baya unya ug mabilibid ka.

**********

Ang angay nimong tubagon mao kini. Sa bulan sa Disyembre 2010 duna kamoy cash withdrawals nga salapi gikan sa pondo sa Barangay Ilaya nga balor P269,338. Sa 16 ka withdrawals mao kini ang gidangatan nga kantidad. Lain pay ato, kapitan, nganong sige man lang mo ug kubra sa kwarta sa barangay? Nadapat ba gayud kaha ning kwartaha sa mga proyekto?

Enero 2011: P20,000; February 2011: P14,800; April 2011: P46,992.008; May 2011: P144,250.34; June 2011: P78,812.08; July 2011: P325,078; August 2011: P52,500.00; September 2011: P85,935; October 2011: P97,610; November 2011: P240,302.96.

Kon sumahon, P1,375,621.70. Ibuhin ang nagasto sa fiesta sa barangay, fiesta sa lungsod sa Calatrava, gasto sa duha ka tangke sa tubig ang usa diha sa Binanigan, ug sa honorarium sa mga opisyal sa barangay, nga bale P772,702.40.

Mao na kini ang akong gipaabot sa kang kapitan Elvis Carmelotes kon duna ba siyay mga dokumentos o kalig-onan kay ang kinatibuk-an ninyo nga cash withdrawals mikabat man ngadto sa P1,375,621.70 unya i-minus ang gasto nga inyong gikasugtan nga bale P772,702.40. Puwes duna kay angay nga i-esplikar sa katawhan sa inyong barangay kon diin paingon ang kwarta nga bale P602,919.70.

Kon matubag kini ni kapitan mas maayo kay nagpaabot ang taga-barangay Ilaya.

**********

Ako ning ilakbit ning reklamo sa taga dakbayan nga ngano kunong walay aksyon ang atong kapulisan niining mga motorsiklo nga labihang sabaa panahon sa kagabhion nga magtaris sa kadalanan. Saba gayud kaayo kay gikuhaan man ug mga silencer ang tambutso.

Unsa may aksyon niini sa atong mga traffic police?