Meron o Wala

Pikpik sa Abaga

Ni Henry Sandoval

Bisan asa kang painitan dinhi sa San Carlos dili gayud malikayan nga mahilambigit ang mga isyu sa politika labi na nga dunay mga holohongihong nga nabungkag ang grupo sa taas. Basta may kontra na gani ang politiko nga managan magkatol ang palad sa mga bumuboto. Sadya man kuno kay ang mga kandidato nga may mga kontra abtik nga mohulbot sa ilahang pitaka kay lagi 'andam ug tagana nga mutabang sa mga kabus ug nagkinahanglan.' Magpahimulos pud pag-ayo ang mga oportunistang dagko kay lagi nagkinahanglan man ang mga kandidato. 

Apan may kontra ba gyud?

Dungog na nga si  Bise Gobernador Genaro Alvarez, Jr. maoy mokontra kang Gobernador Alfredo Marañon, Jr. ug kana miguwa na sa mga pamantalaan national. Ang nakahatag ug dakung pangutana kay si Board Member Nene dela Cruz mikuyog man kang gobernador. Ug sa mga unang interview sa among kauban nga si Rics Cañizares misulti man siya nga dili siya mokontra ni Congressman Jules Ledesma IV.

Pero aning bag-o lang milapnag ang balita nga mudagan siya pagka representante sa unang distrito. Kuno-kuno pa lang kini ha.

Nagsugod kining balitaa didto sa siyudad sa Escalante. Ug matinuod gayud nga mudagan siya pagka congressman duna gyud ni silay ituboy nga mga kandidato sa kada lugar sa primero distrito, dili ba?  Kay pareha diri sa San Carlos nga ug imo lang ning tiaw-tiawan kulatahon man gayud ka aning 18 ka barangay nga ang tanang mga kapitan loyalista sa congressman.

Ug pananglitan nga mapormal na nga madeklarar sa partido nila ni Ledesma nga bakante ang puwesto sa usa ka board member sa unang distrito, kinsa man pud kayha ang mapuli niini?

May gidungog nga ngalan nga usa ka adunahang yutaan ang mapuli apan istorya sa hangin pa lang kana. Dili sad siguro mahimo nga walay ibutang isip hulip kang Board Member Nene dela Cruz. Sa siyudad lang sa San Carlos adunay 55,329 ka botante wa pay labot sa mga bag-o nga naka rehistro nga gi-approbahan karong bulana. Ug sa mechanics sa politika kuhaan ug 20 percent sa dili makaboto aduna na lay 44,264 na lang. Less pa na siya sa tres porsyento nga ma imbalido nga boto duna na lay mahabilin nga 42,937 ka botante sa San Carlos. Unya kay pila na ka beses nga na testingan nga ang kontra ni Ledesma dinhi sa San Carlos ma biyaan man ug tag pila ka kilometro. 

Dili mo mangandam?

**********

Samtang nanglakat ang duha ka batan-on nga sila si Jhon Ray Libre ug usa ka dalagita diha tungod sa may post sa Barangay Tanod kalit lang nga gilabnot ang cellphone sa duha. Perting gukod sa laki nga gilabnutan pero wala makaapas. Mga alas otso ang takna sa gabie nga nahitabo kini niadtong Agosto 27 sa Purok Molave, Barangay I.

Naka responde gidayun ang mga barangay tanod sa Barangay I ug ilahang giadto ang balay niini kay na-identify man siya sa babaye nga iyahang gilabnotan. Nakuha ang suspek sa ilahang balay si Elmer 'Ongkoy' Despi nga may standing warrant na usab kini sa pagpanlabnot usab ug cellphone niadtong milabay nga mga bulan.

Ang malas lang kay sa dihang gisakay sa motorcab miambak ug nagginukdanay nga hasta pulis nga nanihapon pa unta si Police Officer Lacson ug si Police Officer Nobleza sa ilahang balay sa New Town miapil na lang sad ug gukod kay saba naman sa guwa. Wala gyud madakpi ang suspek niadtong gabhiuna. Ug matud pa sa mitan-aw sa maong hitabo 'padakop pay kagang tong kawatana to.' Insakto gyud.

Pagka Agosto 28 may mi report sa Barangay Hall nga si Ongkoy naa sa ilahang balay. Pero sa pagresponde sa mga barangay tanod wala na diha ang suspek. Mihimo ug usa ka inisyatibo  nga lihok si Kagawad Toto Lopez ug sa iyahang pag-adto sa lugar ni Ongkoy Despi sa Kalingling na negosyar niya ang ginikanan ug mi-surrender ang maong suspetsado didto ni Kagawad Lopez.

Mao nay Kagawad kantigo mutan-aw sa mga inisyatibong ilihok kun unsa-on pagpahumok ang gahi nga butang para mabalik sa normal ang pagpuyo sa mga tawo sa barangay.