NewsRecord Weekly Publication

Bantay Banat

Ni Rics Cañisarez

Gi-uli ra man kuno

Daghan na kaayo ang nisukmat kanako bahin niadtong akong nasulat nga may usa ka kawani diha sa ibabaw sa public market nga naka-dispalko kuno ug kwarta sa gobyerno. Tungod niini mura usab ug dili ko katuong may ingon pa niini karon sa administrasyon ni Mayor Ginggo Valmayor ug naka-ingon gani ko nga, "Isuga gud!"

Ako ug akong kauban miadto gayud sa usa ka departamento sa ibabaw sa merkado publiko aron pangutan-on kon tinuod ba gayud nga opisin ang may kawani sa iyang departamento nga naka-dispalko ug kwarta. Ang tubag sa maong department head mao nga wala gayud na mahitabo sa iyang departamento.

Mi-insister gayud siya nga dili ug dili gayud kuno mahitabo ang maong pagdispalko. So, wala kamiy mahimo kay wala gayud kuno ug amo siyang gipasalamatan ug dayon ming gawas sa iyang opisina.

"Salamat kaayo, Sir!"

**********

Kay wala man gayud kuno matud ni Sir busa mangutana lang ko nimo, Sir, kon ngano man nga ang usa ka casual employee gitugutan man nimo nga mahimong cashier? Gipa-put up ba kini siya ug bond? Sa Civil Service Code, pwede bang ang mag ti-ayon makatrabaho sa usa ka departamento? Ang nakaga-an lang sa maong isyu kay sigon sa taho, ang kwarta nga nahilabtan gi-ilisan na. Wala ba kamoy lagas niini?

A crime has been committed.

**********

Bentaha gayud ning may isganan nga oposisyon sa senado kay kon wala, dili maukay ning operation sa mga illegal nga sugal sa nasud. Si Senador Miriam Defensor Santiago nitagawtaw na nga ang administration ni Presidente Noynoy Aquino walay nahimo sa pagkuyanap sa mga illegal nga sugal sama sa jueteng sa nasud.

Ug unya si Senador Ping Lacson usab sa iyang bahin nipabuhagay nga ang usa ka regional director sa PNP magdawat ug mga P 2 to 3 M matag bulan ug ang mga police provincial commander P 500,000 hangtud P1.5 M kada bulan.

Unya ang mga chief of police pila man ang gidawat? Ayaw ko ug patuho-a nga wala ni silay gidawat. Mao diay ni nga dili gayud maundang ning masiao sa probinsiya. Tungod niini, ang Senate Blue Ribbon Committee mo-conduct na ug imbestigasyon bahin sa expose ni Lacson.

**********

Napagan lang hinuon ang Small Town Lottery nga unta maoy makasanta sa mga illegal nga sugal tungod kay gihimo na man hinuon kini nga front sa mga buloyagon nga mga illegal nga sugal. Ako naluoy baya sa mga nagtrabaho diha sa STL pero, unsaon ta man kay pagbuot man sa presidente. Tapos na ang maligayang araw! Good bye STL!

**********

Mga politiko, palihug basaha kini.

Pila na lang ka adlaw mahibal-an na sa mga tawo kon kinsa gayud ang managan para sa nagkalain-laing elective positions kay duol na man ang filing sa Certificate of Candidacy karong Oktubre 1 hangtod 5. Human maka-file sa COC, mahimo ba kini silang makakampanya?

Ang Commission on Election, nag-ingon nga, "No one can be charged for premature campaigning" o susamang violations kon kini nga mga ginbuhaton sa dili pa ang Enero 2013. Ang election period unya pa sa Enero 2013 ngadto sa Hunyo 12, 2013. Under sa COMELEC Resolution 9385 ang balaod sa election tataw nga dili pa applicable.

Gani dili katingad-an nga duna nay mga politiko nga nagpasi-atab sa ilang mga personalidad, mga proyekto duna ganiy uban kanila nga ang ilang hulagway sa tarpaulins (mura gayud ug artista kunohay) ug dili usab katingad-an nga may mabati-an na kita nga advertising materials sa mga kandidato ug magsi-aw na usab ang mga block timers sa radio.

Nindot ni, wala lay pinusilay ha?