NewsRecord Weekly Publication

Bantay Banat

Ni Rics Cañisarez

Mga barangay kapitan

Ubay-ubay na gayud ang report nga nakadangat dinhi sa Bantay Banat bahin sa uban nga barangay officials nga naggamit sa ilang katungdanan. Maayo unta kon gigamit ang katungdanan sa maayo nga pagserbisyo sa barangay.

May report na dinhi kanako nga ang ilang kapitan mangulata ug sa husay sa barangay ang paryente maoy dapigan. Duna say report nga ang ilang kapitan mao na karon ang nagdala sa jai-alai. Lain pa ning ang ila kunong kapitan kon maka-inom magmaoy ug duna pa gayuy uban kuno nga tagsa rang motungha sa barangay hall.

Dunay usab kunoy barangay official nga manyakis. Naa pud may record nga nangawat ug carabao, namago ug dakong kantidad sa bulangan wala pay labot ning kapitan sa Ilaya, Calatrava nga sige nako ug banat gumikan kay sa record klaro man gayud nga dili maka-eksplikar sa kwarta sa barangay kon gi-unsa niya paggamit.

Tungod ining mga reklamo, naka-ingon ko nga mas maayo na lang tingali nga mahinayon ang barangay elections karong sunod tuig para mapulihan ug mga barangay officials nga tarong ang mga latang kamatis. Kay kon mao kini gihapon ang matang sa mga opisyales ang magpabilin diha sa inyong barangay, mag-agwanta ra kamo gihapon.

**********

Ang principal sa Quezon National High School miduol kanako ug misaad nga gusto niyang tubagon 'in writing' kadtong isyu bahin sa iyang sulat ngadto sa school guard nga nag-ingon nga siya na lang ang mo-punch in-punch out sa mga maestro/maestra bisan wala sa eskwelahan apan, ang buotan nga school guard hugot gayud nga mibalibad. Hangtud karon wala gayud mibalik si Mr. Principal. Sa akong pagsabot naglibog tingali ang iyang huna-huna tungod sa nahitabo sa pagkamatay sa usa ka estudyante sa maong tungha-an.

Ang balita nga akong nahipos nga si Sir kuno ang nag buot-buot sa Plan B. Ambot kon gikan ba kaha kini sa schools division superintendent kining Plan B. Ang buot ipasabot nga ang klase sa mga bata kutob lang sa alas 2:20 sa hapon kay lagi matud pa sila ang mo-host sa Buwan ng Wika. Busy tingali sila si Sir kay sayo man gipapauli ang mga bata pero, ang uban mihapit man sa sapa ug nangaligo.

Disgrasia kay may usa nga nalumos ug gikataho nga namatay.

Daku nga problema kay ang ginikanan nireklamo (syempre namatay gud). Para tingali nga dili na modaku pa ang problema, gi-areglo na lang ang ginikanan nga nagbangutan misugot na lang kuno nga bayaran ang kamatayon sa ilang anak nga nalumos. Nag bagulbol ang PTA ug ang mga magtutudlo kay nakatampo pa aron ibayad ngadto sa ginikanan sa namatay nga bata.

Pila kuno ang kwarta nga natigom para ibayad? P 12,000 ra! Mahal pa ang baka! Ambot kon nganong misugot man ang ginikanan. Ikaw Sir, hinaut pa unta nga mag matngon ka na!

**********

Wala molampos ang panagtigom sa mga dagkong politiko sa Negros aron mobutang ug common candidate nga kandidato sa pagka gobernador sa Negros Occidental. Ang pili-an mao sila si Gov. Alfredo Marañon, Jr. ug si Vice-Gov. Genaro Alvarez, Jr.

Sigon pa nila nga kadto kunong Agusto 29 "was a crucial day" sa taga Negros Occidental. Nganong ma crucial man nga sila ra man kining mga dagkong politiko ang mabulahan kay mura mag sila na hinuon lang ang mobutang ug kandidato sa pagka gobernador?

Nalimot tingali ni sila nga ang katawhan ang magbuot kon kinsa ang angayan nga politiko ang ibutang sa pwesto. Puwes, dili crucial para sa mga Negrense kining pagpili sa mga dagkong politiko kon kinsa ang ilang gustong kandidato nga ihungit sa mga botantes.

Pastilan ning politika sa atong nasud kon kinsa ang ilang gusto nga kandidato mao usab ang ihungit sa mga botantes.

**********

Lain na usab ang grupo sa kapulisan ang mogukod aning nagkuyanap nga illegal nga sugal dinhi sa Western Visayas. Kini gibutyag ni Police Regional Office VI Director Chief Supt. Agrimero Cruz. Giwala na niya ang Regional Special Operations Group (RSOG) ug gi-ilisan ug laing grupo. Kining wala pa mahinganli nga grupo, pagadumalahan ni Supt. Manuel Payos gikan sa Mindoro. Tan-awon ta gayud ni kon dili ba gihapon ma-impluwensyahan sa mga dagkong politiko.

Sugid lang ni si General Nic Bartolome! Asa man tong imong One-Strike, Sir? Wala may napapha nga hepe sa kapulisan bisan pa man nga grabe na kaayo ning jai-alai. Mura na man gani ug legal na ang operation kay ang kapulisan sa San Carlos mo-lingiw ra man.

**********

Naay report nga midangat kanako nga matud pa diha kunoy usa ka sakop sa Bureau of Jail Management and Penology nga naka-inom ug nagmaoy diha sa Chef Nitoy's Restaurant. Matud pa, sa iyang kahubog misuka pa!

Kinsa kaha ang iyang gi-maoyan kay nagkrak-krak sa iyang service firearm nga .9mm nangalagpot kuno ang mga bala. Ang akong nahibaloan nga kini siya duna nay kasong administratibo nga gi-atubang unya nia na usab mi-arte na pud. Pastilan ug magdaghan kuyaw, maayo gayud kon mapitol.