NewsRecord Weekly Publication

Pikpik sa Abaga

Ni Henry Sandoval

Lisensya

Ang lisensya sa armas maoy usa ka papeles nga maghimo sa imohang paghupot ug armas nga legal. Kung may lisensya ang armas dili makuha ni bisan kinsa sa sulod sa imohang panimalay gawas kon kini gigamit nimo sa pagpabuto diha sa inyohang panimalay o gigamit sa illegal nga pamaagi.

Kalabanan gatuo nga ug naa kay lisensya sa armas pwede na kining dad-on sa guwa sa panimalay.

Daghan man gud ang nangutana sa nahitabo nga pagdakop sa usa ka tawo nga ga-inom ug kape dinha sa may Palma's Coffee. Gikuha ang iyahang armas nga bisan pa man kumpleto kini sa papeles, may lisensya ug may Permit To Carry Firearms (PTC).

Matud pa sa mga nakaila, ngano kunong nadakop man nga kumpleto man sa papeles? Tinuod na nga kumpleto apan ang papeles nga gi-issue sa Firearms and Explosive Division (FED) sa Camp Crame aduna kanay mga prohibition. Sa luyo sa lisensya anaa nakapakit ug atong mabasa ang mga gidili sa mga armas nga lisensyado. May mga lugar kung diin dili pwede madala ang armas, pananglitan sa simbahan.

Ang nadakpan kumpleto sa papeles. Apan ang pagdala sa armas nga isoksok sa kilid sa usa ka tawong dili pulis usa sa gidili alang sa mga sibilyan nga may lisensyadong armas. Ang PTC gatugot nga makadala ug armas 'outside residence' apan isulod kini sa usa ka bag nga dili mailhan nga armas ang gidala.

Ang nahitabo sa pagdakop sa usa ka tawo ug pagkuha sa iyahang armas usa ka ehemplo sa mga mahiligon motaklos ug armas sa ilahang kilid nga dili man pulis ug labaw pa walay lisensya ug PTC. Kay lagi matud pa sa uban nakasandig na ug semento nga koral mao nang dili mahilabtan. Bitaw maka ingon pud ka nga tinuod nakasandig sa pader pero matud pa sa mga panulti-on: "Wala ra bay mahay mag-una, permi gyud sa ULAHI."

Kumpleto sa papeles-may lisensya, may PTC gidakop pa sa usa ka painitan sa San Carlos. Ang naka lahi ra ani kay wala ni siyay kaso nga atubangon except nga ug dili supisyente ang iyahang katarungan nganong nadala niya iyahang armas mahimong ma revoke ang iyahang lisensya ug madeposit ang iyahang armas sa FED, Camp Crame.

Kamo unyang mga mahiligon motaklos huna-hunaa ninyo nga gidakop gani ang kumpleto ug papeles samot na unya mo.

**********

Sadya na ang mga lugar nga miporma na ang oposisyun sa umaabot nga eleksyon.

Sa siyudad sa Escalante matud pa sa akong amigo kusog na kaayo ang ngalan ni Barcelona ug Lumayno nga mudagan pagka mayor ug pagka bise-mayor sa maong siyudad.

Sa Toboso usab mao sad ang nahitabo nga duna say mudagan nga lig-on sad.

Sa Caltrava milutaw ang ngalan ni Pekdoy Leonor ug Dedicatoria nga mudagan ug mayor ug bise-mayor. Mura nag naa sa sanlagan ang duwa sa politika sa maong mga lugar. Ang uban nga balay nga imohang adtuon sayo pa wala na kay milakat sa bukid.

Dinhi sa San Carlos aduna usab mga ngalan nga dili pa nato masulti dinhi sa NewsRecord nga murag misikad ang tiil sa pagdagan pagka konsehal. Ug mahitabo nga madayun ni ug dagan ang mga naa na sa posisyun dili makahatag ug kumpyansa kay ug imong hunahuna-on si Amay Lezama nga midagan niadtong miaging politika wala gayuy kwarta nga gipanghatag pero nakakuha pa ug kapin sa 15,000 ka boto.

Labi na ron nga gidungog-dungog nga si Board Member Nene dela Cruz mudagan pagka congressman. Mahimo nga kaning mga tawhana anha sa ilahang grupo.

Kining tanan dungog-dungog pa lang ug wala pay klaro.