NewsRecord Weekly Publication

Bantay Banat

Ni Rics Cañisarez

Patup-a kuno

Pastilan ning barangay kapitan diha sa Ilaya, Calatrava mura na man ug nasudlan ug ok-ok ang ulo. Dili ba kaha kay nataranta na tungod kay hangtud karon dili gayud maka-eksplikar kon makatubag sa isyu bahin sa mga cash withdrawals nga ang uban ambot kon diin paingon? Mitupa ba gayud ang kwarta sa mga proyekto sa barangay o kon gibulasa ba?

Pastilan, Kapitan, ubay-ubay ra ba gayud sa imong kagawad ang mapagan niini. May report akong nasagap nga ni-adto kunong inyong regular session petsa sa Septembre 6 nagubot kuno matud pa ang inyong session, kay duna na say laing resolution nga magahin na usab kamo ug laing P 40,000 para konuhay sa road maintenance. Tungod niini may usa ka kagawad nga nangutana nga nganong nia na pod kini nga may resolution na man nga na-aprobahan nga wala man gani ma-implementar kay may mi-kuwestion nga usa nila ka kauban.

Dinhi naglagot ang kapitan ug may gikuha gikan sa iyang bag ug gitakin sa iyang kilid ug miingon nga, Basig ikaw unya ang matiplang!"

Ug mi-ingon usab ang kagawad nga, "Patup-a."

Maayo lang gani kay may nagpatunga.

Hoy! Kapitan Elvis Carmelotes, ayaw lang ug gamita ang imong kaisog, gamita ang diplomasiya kay tingali baya duna pay isog nga nagpakahilom ra. Relaks lang kay duna bayay uban diha nga tag-as pa nga kalibre sa armas ang gidala-dala pero nagmonitor lang kanimo. Kalma lang kay ni-a pay laing isyu kanimo.

**********

Angayan gayud nga himuong prioridad ni Mar Roxas, ang bag-ong secretary sa Department of Interior and Local Government  (DILG), ang pagsumpo sa mga kahiwi-an sa mga local government unit particular kining jueteng ug jai-alai. Matud ni Archbishop Emeritus Oscar Cruz, kanhi Presidente sa Catholic Bishops Conference of the Philippines, ang paglimpyo sa mga LGU usa ka dakong hagit para kang Secretary Roxas. Dugang pa ni Archbishop Cruz, kini ang pinaka-una.

Ang ulihi mao ang korapsyon sa mga local government levels. Ug baga kuno matud niya ang korapsyon, from the mayor to the governor, ug kon mo-ingon kita ug korapsyon tanan kalakip na ang illegal nga sugal.

May punto gayud si Arsobispo Cruz nga maglisud si Roxas sa pagpatuman sa reporma labi na nga manug kandidato siya sa sunod nga presidential election. Dinhi nato makita kon tinuod ba gayud nga may itlog si Roxas kon iya ba gayong mapuhag ang korapsyon. Tinuod, it is very crucial gumikan kay bisag unsay himuon niya (Roxas) may epekto kini sa iyang politika.

Akala ko bay nasa matuwid na landas na tayo, ganon pa rin pala, bulok pa rin.

**********

Pila na lang ka adlaw ang atong paabuton mahibal-an na kon si kinsa ang mahimong mga kandidato dinhi sa primero distrito sa Negros Occidental para sa umaabot nga mid-term elections.

Sa Escalante City, si Mayor Beboy Yap-Atty. Maravilla ang mo-tandem, ug ang kaatbang nila mao si former Mayor Maymay Barcelona ug iyang bise nga si Engineer Lumayno nga mao ang ABC president. Sa Toboso, Maling dela Cruz ug vice mayor Edilberto Sayat batok kang Richard Marañon ug Dodong Valencia.

Sa Calatrava, Mayor Araceli Somosa ug Vice-mayor Virgilio Tan.

Sa San Carlos, wala pa maplantsa kay sa pagka karon, wala pay ngalan nga mitumaw kon kinsa ang mahimong kaatbang nilang Mayor Ginggo Valmayor ug Vice-mayor Edgardo Quisumbing mahibal-an kini karong Oktubre 1 to 5, human sa filing sa certificate of candidacy.

Sa pagka kongresista, Jules Ledesma gihapon ug ang moparang, gihugon-hugon nga si Board Member Nene dela Cruz.

**********

Ni-ay balita nga gihilom lang ug matud pa, may usa diha ka kawani sa ibabaw sa public market (ako lang ning susihon kon sa unsa nga departamento) nga naka-dispalko kuno ug kuarta kapin sa P 20,000. Tsk! Tsk! Kuyaw ni da! Mahibal-an ra ninyo kon kinsa ni siya, lalaki kon babaye?

**********

Nia na usab ning SCBI, nagpakita na sad sa ilang pagka 'untouchable' ug mipagawas na pud sa ilang bahong baklag. Abi nako kay nawala ang bahong dili maagwanta, naguba na, nipahulay lang diay kay off-season. Karon mipagawas na usab sa bahong baklag.

Bisag unsaon nato ug kulata ning mga tawong pasaway diha sa SCBI, magkatawa lang. Pero ning higayona, mahimo nang akusahan ko ninyo ug economic sabotage kay kon ako, usa ka sugar cane planter, dili na ko ipagaling sa akong tubo diha sa SCBI gumikan kay kini sila ang hinungdan sa pagka guba sa atong kina-iyahan (environment). Sa mobong pagkasulti, mentras tanto nga walay solution ang SCBI nga makontrol ang air and water pollution, maayo pa nga bug-ang na lang ug budyawi ang inyong ipagaling. Hulata lang ninyo kon mawala na ang baho.