NewsRecord Weekly Publication

Komentaryo 

Ni Dodong Mondragon

Pagbuot sa Ginoo?

Pagbasa nako sa pamantalaan nga misulti si Maria Lourdes Sereno nga ang iyang pagkatudlo bilang Chief Justice sa Corte Suprema pagbuot sa Ginoo, nakapahinumdum dayon nako sa pagdeklarar ni kanhi Presidente Gloria Arroyo sa pamantalaan nga gibutang siya sa Ginoo bilang pangulo sa nasud.

Ug, gi-unsa man ni Arroyo pagdala an gang iyang pagkapangulo?

Dili na lang nato hisgutan kon unsay iyang nahimo kay dayag na man kaayo kon unsay iyang gi-atubang nga mga dagkong kaso karon.

Mao nga dili gayud kasaligan kon ang usa ka tawo sa paghupot sa pwesto mosulti nga tinudlo sa Gino okay usa kana ka garboso nga pahayag sa pagpakita nga siya pinili nga pagkatawo sa Diyos.

Sa pagtudlo ni Presidente Noynoy Aquino kang Sereno bilang CJ, alang kanako dunay sipyat. Ngano man?

Ang kinabag-ang tawo naghandum nga dili unta apilan ug politika ang pwesto sa pinakataas nga hukom apan niining higayon, nabahiran kini ug lapok sa politika. Sa mga nominees, duna pay mas taas ang qualification kay sa kang Sereno apan dinhi tataw kaayo ang gibasehan mao ang favoritism.

Kanus-a man lang siya mahimong associate justice?

Bag-o lang ug wala man gani kuno ni siya maka-practice sa iyang pagka abogado. Apan iyang gilukso-an ang ubang mga senior justices. Sama lang kini sa nahitabo nga gitudlo ni Arroyo si kanhi CJ Renato Corona kay iya kining paborito nga mireklamo si Aquino. Ug karon mura man ug iyang gisuon ang gibuhat ni Arroyo.

Laing implikasyon nga atong mahisgutan mao nga si Sereno musilbi bilang CJ sa sulod sa 18 ka tuig. Usa kini sa labing taas nga termino nga pagahuptan sa usa ka CJ.

Anaay pagtulun-an nga dili maayo nga ang usa ka tawo maghupot ug pwesto sa dugay nga panahon kay mag-abusar kini sa gahum.

Dili katingad-an nga daghang mga associate justices nga dismayado kay silang tanan ni usa wala gayuy higayon nga matudlo bilang CJ sa sulod sa 18 ka tuig.

Niining sitwasyon, moretiro na lang silang tanan si Sereno anaa lang gihapon sa Corte Suprema. Mahimo nga ang duha ka president nga mopuli na unya ni Aquino dili makatudlo ug bag-ong CJ sa ilang tagsa-tagsa ka termino. Adto na man sa ikaupat na president gikan kang P-Noy mahuman ang termino ni Sereno. Pagkataas sa termino, hapit maparehas sa gidugayon sa kang Marcos.

Duna lay gamayng redeeming feature ang pagkatudlo ni Chief Justice Sereno.

Sa termino ni Aquino mahimo nga madiktahan siya sa president kay duna man siyay utang kabobut-on niini apan ang sunod nga tulo kay president sa nasud nga mohipuli kaniya dili makadikta ug lubag sa li-og sa CJ kay dili man sila ang nagpahimutang kaniya.