NewsRecord Weekly Publication

Pikpik sa Abaga

Ni Henry Sandoval

Hata-hata 

pa lang

Basta dili pa maka-file ug Certificate of Candidacy (COC) ang usa ka nag-ambisyon nga mudagan alang sa usa ka posisyon ang tanan puro pa lang hata-hata.

Kun sa pasol pa paon para nga mutokob ang kontra. Pero bisan hata pa ang uban nga mga ngalang nangguwa murag mao na gayud ning mudagan sa linya sa kang Bise Gobernador Genaro Alvarez, Jr. nga mupapili pagka gobernador  ug ang iyahang bise-gobernador nga magpapili sad mao si kanhi mayor sa San Carlos City sa sulod sa siyam ka tuig nga si Eugenio "Bong" Lacson.

Sa pikas si Gobernador Alfredo Marañon, Jr. magpapili ug usab ug wala pay siguro ang iyahang napili-an nga running mate nga si Mayor Juliet Ferrer sa La Carlota City. Ug madayun ang maong engkwentro parehong kusgan ang duha ka kampo ug may balwarte ug musamot pa gayud kakusgan ug mabendisyunan ang usa ni 'Ambassador.'

Ug dili malikayan nga sa kampanya aning duha magpasikat gayud ni sila ug unsa ang nahimo nila samtang nagserbisyo pa sila sa ilahang mga katawhan kaniadtong opisyal pa sila sa ilahang lugar. Sa distrito nga level klaro man dinhi sa Unang Distrito nga si Congressman Jules Ledesma magpapili sa iyahang katapusang termino. Ang iyahang board member mao sila si incumbent Sanggunian Panlalawigan Member Rene Gustilo ug si kanhi sad Mayor sa Escalante Lando Ponsica. Kana sigun sa among impormasyun.

Sa pikas bahin, ang miguwa nga ngalan nga nasulat nako sa miaging isyu nga mudagan pagka bise-mayor sa Calatrava dili diay si Dick Dedicatoria kay siya diay modagan sa pagka board member. Mao na akong giingon nga hata ba. Wa pa sad gayud maklaro ug kinsa ang mudagan sa pagka congressman kontra ni Ledesma sa Unang Distrito. Wala pa sad mahibaw-i ug kinsa ang pares ni Dedicatoria sa pagka board member ubos sa tiket ni Governor Marañon.

Dinhi sa siyudad sa San Carlos akong nadunggan nga kumpleto na ang linya sa mga konsehal sa adminsitrasyun. Usa ka doctor ug usa ka engineer ang napuli sa duha ka mo-graduate nga mga konsehal.

Ug sa basketball pa kumpleto na ang mga players nga modula. Pagka suwerte ning mga tawhana kay hangtud karon wala gayud hinuoy ngalan nga nangguwa nga mudagan bisan konsehal na lang unta. Naa na unta to nalanay man sad murag bokya nga ug mabutang sa mala malanay.

Pero sa ako nang giingon basin hata ni ang tanan sa natad sa politika. Basin dunay hangin pula kalit lang mangguwa. Bisan tinuod naka sandig ug dakong bato ang kandidato sa administrasyun dili pud makatulog ang uban kay basig ma jackpatan. Ang jackpot ra ba walay sipyat.

Sa Calatrava, ako ug ang akong kauban nga si Rics Cañizares misulay pagsuroy sa ubang mga nag-aspirar nga magpapili pagka-konsehal. Pastilan wala gayud mi naabtan! Puro wala!

Murag nanuroy na ug sugod-sugod ug pamikpik na sa abaga. Ingon ana ra ba gayud nang mga style sa mga politiko. Ug masuroy ug painitan hambol kaayo kay moingon ra ba dayun nga sila ray bayad sa giinom nimong kape. Usahay ug makaabot ug mga tapok nga may mga inahan gakugos ug bata dayun pud kuha sa bata ug kuguson pud. Ug dunay hugaw ang bata sa nawong kuot dayon sa iyahang panyo itrapo sa bata. Ug sa pinulungan pa, "Pamugas-bugas ba".

**********

Ang eligibility dili gayud permanente nga maoy yawe aron mahimo kang regular sa gobyerno.

Nahisgutan man gud nako ni tungod kay may casual kong nahinabi mahitungod anang pagka-eligible sa usa ka tawo nga duna nay dako kaayong tsantsa nga mapermanente.

Miingon siya nako nga dili siya motuo kay ang iyahang gitudlong kauban niya nga lalaki nanilhig ra man pero kato siya usa ka graduate sa college ug eligible pa gayud. Wala kuno magsilbe kay ang lig-on gayud kuno kanang duna kay 'Political Eligibility.' Wala sad ko mosupak kay mao man na ang kamatuoran.

Pero sa akong pagkahinumdum sa panahon ni Mayor Rogelio Debulgado ug ni Mayor Bong Lacson ubay-ubay sad tong nadakpan sa Civil Service Commission nga mipasar peke diay kay lain man ang mikuha.

Nadakpan kay may usa nga gapakuha unya kay dugay miguwa ang resulta miadto sa Cebu ug nangutana sa result sa exam. Nailhan iyahang ngalan ug sa pagtan-aw sa application dili man mao iyahang nawong. Didto gasugod ang utingkayay. Ug swerte na gyud unta to sila kay ang kalabanan nagtrabaho na gayud pero naabtan sa malas. Ambot kayha no ug naa pa bay nahabilin?

Pero bisan pa ug wala sila madakpi atong higayuna ug ma-promote ang ilaha man gyud nawong ang ibutang sa papeles sa promosyon. Madakpan gihapon ug basi anha na ka tsantsa ang atong mga tinuod nga passers sa Civil Service Exam nga karon silhig pay gikaptan.